دەقی ڕاگەیەندراوەکەی مەکتەبی سیاسیی #پارتی دیموکراتی کوردستان#:
ئەمڕۆ (چوارشەممە، 18ی 1ی 2023) مەکتەبی سیاسیی پارتیمان بە سەرۆکایەتی سەرۆک مەسعود بارزانی کۆبوونەوەی ئاسایی خۆی ئەنجامدا، سەبارەت بە پێشهات و گۆڕانکارییە سیاسی و حکومی (ئیداری)ەکان لە هەرێم و ناوچەکەدا، لەم کۆبوونەوەیەدا پارتیمان جەختی لە چارەسەری کێشە و گرژیەکانی کە هەن لە پەیوەندیمان لەگەڵ یەکێتی نیشتمانی کوردستان کردەوە، بەگوێرەی پرەنسیپ و ماددەکانی ڕێککەوتنی سیاسی و ئیداری نێوانمان و کارنامەی کابینەی نۆیەمی حکومەت کە بەڕەزامەندی هەردوولامان نووسراون و ئیمزاکراون.
لە کۆبوونەوەدا ئەم تەوەرانەی خوارەوە مناقەشەکران و بڕیاری پێویستیان لەبارە‌وە درا:
یەکەم/ تەوەری ناوخۆی کوردستان: پارتیمان لە ڕوانگەی پاراستنی دەستکەوتەکانی گەلەکەمان کە بەخوێن و خەبات بەدەستهاتوون و هەستکردن بە بەرپرسیاریەتی و ئەزموونی دەیان ساڵەی خەباتی بێوچان لەپێناو ماف و ئامانجەڕەواکانماندا، هەروەها لەپێناو پاراستنی قەوارەی هەرێمی کوردستان و ئاسایشی هاووڵاتیان، هەمیشە کۆبوونەوە و گفتوگۆ بۆ چارەسەری کێشە و گرفتەکانی بەڕێگای دروست و ڕاست زانیووە، هەروەها لەڕوانگەی باوەڕبوون بە پێکەوەژیانی نەتەوەیی و ئایینی و سیاسی و پاراستنی مافی مرۆڤ، هەوڵی دروستکردنی پردی پەیوەندی و پێکەوەکارکردن و متمانە دروستکردنی داوە.
بۆ ئەم مەبەستە و بە پڕاکتیککردنی ئەم باوەڕ و تێگەیشتنەمان و، بۆ یەکڕیزی گەلی کوردستان بەرانبەر ئاڵەنگاری و گرفتەکان و جێبەجێکردنی بڕیاری کۆنگرەی 14ی پارتیمان و بڕیاری سەرۆک مەسعود بارزانی، هەڵدانەوەی لاپەڕەیەکی نوێمان لە پەیوەندیەکانماندا ڕاگەیاند‌، بۆیە لێرەوە هەر وەک پێشتریش دەستپێشخەریمان کردووە بۆ کۆبوونەوەی دووقۆڵی لەگەڵ یەکێتی نیشتیمانی کوردستان و لە وەڵامی بروسکەشیان بەڕوونی ئاماژەمان پێداوە کە هەبوونی تێبینی و گرفت بە بروسکە یان باسکردن لە ڕاگەیاندن چارەناکرێت، بەڵکو ڕێگای سیاسی و مەدەنیانە کۆبوونەوەی دووقۆڵی و باسکردن و مناقەشەکردنی تەواوی تێبینی و گرفتەکانمانە بەمەبەستی دۆزینەوەی چارەسەر، ئێستایش دووبارەی دەکەینەوە ئێمە لە پارتی دیموکراتی کوردستان ئامادەین بۆ کۆبوونەوە و گفتوگۆ‌ و چارەسەرکردنی گرفتەکان، هەر ئەمەش بەڕێگایەکی دروست و هاوچەرخ دەزانین کە لەگەڵ یەکێتی نیشتیمانی و تەواوی لایەنه ‌سیاسییەکانی کوردستان دەستدەکەین بە گفتوگۆ و بیروڕا گۆڕینەوە.
دووەم/ تەوەری حکومەت: هەروەک لە خاڵی (4)یمی ڕێککەوتنە سیاسیەکەی نێوان پارتیمان و یەکێتی دا هاتووە، دەبوو هەردوولامان پاڵپشتی حکومەتی هەرێمی کوردستان بکەین لە هەموو ڕوویەکەوە، بەداخەوە نەک پشتیوانی حکومەت نەکرا، بەڵکو‌ بەپێچەوانەوە زۆر ئاستەنگی بۆ دروستکرا و ئیستایش کێشە و گرفتەکان بەشێوەیەک نیشانی هاووڵاتیانی کوردستان دەدرێن کە گوایە ئەم بابەتانە لەگەڵ شەخسی بەڕێز سەرۆکی حکومەتە‌، لێرەوە ڕایدەگەیەنین ئێمە دژی بە شەخسەنەکردنی کێشەکانین و ئەم جۆرە هەوڵانە ڕەتدەکەینەوه. سەرۆکی حکومەت بەگوێرەی ماددە و بڕگەکانی ڕێککەوتنی سیاسی و ئیداری، هەروەها کارنامەی کابینەی نۆیەم ڕەفتاریکردوە، ئەم هەوڵانەیان بۆ پەردەپۆشکردنی ئەم کەموکوڕیانەیە کە دروستیدەکەن و ڕێگا لە چاکسازی و شەفافیەت دەگیرێ، بۆیە ڕایدەگەیەنین کە ئەم جۆرە ڕەفتار و مامەڵەکردنە لە کاروباری حکومەت خۆدزینەوەیە لە ڕێککەوتنی سیاسی و ئیداری و کارنامەی کابینەی نۆیەم کە هەرسێکیان بەهاوبەشی و بە پەسندی هەردوولامان ئامادەکراون و ئیمزاکراون.
شایەنی باسە کۆبوونەوەی مەکتەبی سیاسی بەتەواوی توانا پاڵپشتی هەڤاڵ مەسرور بارزانی سەرۆکی حکومەتی هەرێمی کوردستان و کابینەکەی دەکات و، ڕێگای چارەسەری کێشەکان بەردەوامیدانە بە گفتوگۆ لە کۆبوونەکانی ئەنجوومەنی وەزیران نەک خۆ پەراوێزخستن و بەکارهێنانی دەزگاکانی ڕاگەیاندن.
سێیەم/ تەوەری هەڵبژاردنی پەرلەمانی کوردستان: زۆر هەوڵماندا، پڕۆژەمان ئامادەکرد و پێشکەشمانکرد لەو کۆبوونەوە هاوبەشەنەی کە بەڕێز سەرۆکی هەرێم پێکیدەهێنا و سەرپەرشتی دەکردن، هەروەها لەو کۆبونەوانەش کە نوێنەری UNبەشداردەبوو، بەڵام بەداخەوە دواجار لەڕووی ناچاری و لەپێناو پاراستنی قەوارەی هەرێم بژاردەی درێژکردنەوەی تەمەنی پەرلەمانمان پەسەندکرد، ئێستایش مەکتەبی سیاسی جەخت لەوە دەکاتەوە کە دەبێت چیدی پەرلەمانی کوردستان کۆبونەوەکانی پەکنەخرێ و لە زووترین کاتدا کۆبوونەوەی ئاسایی ئەنجامبدات و ئەم هەنگاوانە بگرێتە بەر:
-هەمواری یاسای هەڵبژاردن ئەولەویەتی پێبدرێت لەگەڵ چەسپاندنی بابەتی چوار بازنەیی و بەکارهێنانی تۆماری بایۆمەتری دوایین هەڵبژاردنی ئەنجوومەنی نوێنەرانی عێراق.
-هاوتەریب لەگەڵ دەنگدان لەسەر هەمواری یاسای هەڵبژاردن کۆمسیۆنی سەربەخۆی هەڵبژاردن و ڕاپرسی کارابکرێتەوە و پۆستە فەڕاغەکانی نێو کۆمسیۆن پڕبکرێنەوە.
-داوا لە حکومەتی هەرێم دەکەین پێداویستییە ئیدارییەکان و بودجەی پێویست بۆ هەڵبژاردن لەم ساڵدا دابین بکات.
-داوا لە بەڕێز سەرۆکی هەرێمی کوردستان دەکەین بەگوێرەی ڕێککارە یاساییەکان ڕۆژی هەڵبژاردن لەوادەی خۆیدا دەستنیشان بکات.
-هەروەها داوا لە تەواوی لایەنە سیاسییەکانی کوردستان دەکەین پاڵپشت بن بۆ ئەنجامدانی هەڵبژاردنی پەرلەمانی کوردستان لە ساڵی 2023 لەو ‌وادە یاساییەدا کە دیاریدەکرێت.
چوارەم/ سەبارەت بە حکومەتی فیدڕاڵ و پەیوەندییەکانی #هەولێر# و بەغداد: ئێمە لە پارتی دیموکراتی کوردستان لەگەڵ دروستکردنی پەیوەندی دروست و ئاساین لەنێوان حکومەتی هەرێم و حکومەتی فیدڕاڵ بەگوێرەی ماددە و بڕگەکانی دەستوور بۆ چارەسەری هەموو کێشە و گرفتەکان کە ئێستا هەن یا دێنەپێش لەڕووی یاسایی و سیاسی و شایستە داراییەکانەوە، پێمانوایە توندوتۆڵکردنی پەیوەندییەکان و ئەم ڕێبازە خزمەتی زیاتر بە تەواوی گەلانی عێراق بەشێوەیەکی گشتی دەکات و سەرجەم بابەتەکان لە ڕێککەوتنی سیاسیی ئیدارەی دەوڵەت و کارنامەی کابینەی حکومەتی فیدراڵ‌ بەڕوونی ئاماژەیان پێکراوە و چەسپێندراون، بۆیە بە پێویستی دەزانین ئیلتیزام بەم ڕێککەوتنانە بکرێ و بکەونە بواری جێبەجێکردنەوە.
لەکۆتاییدا بە دانەواندنی سەری ڕێز و نەوازش بۆ شەهیدانی کورد و کوردستان کۆتایی بە کۆبوونەوەکە هێنرا.
مەکتەبی سیاسیی
پارتی دیموکراتی کوردستان
18ی 1ی 2023[1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!