وشە هێزی هەیە، بەڵام شتێک هەیە لە وشە بە هێزترە. هێزێک کە لە هەموو بوون و نەبوون دایە! ئەو لە من و تۆش دایە!
ڕۆژانە وشەی قەحبە وەکوو چەکی ئەتۆمی بەکاردێت بۆ ڕێگری کردن لە ژن بەرەو بەرجەستەکردنی هێزی خوڵقێنەری کە سرووشتیترین سەرچاوەی ژنە!
وشەی قەحبە زاندانێکی دەروونی و کۆمەڵایەتی و ئەقڵی بۆ ژن سازکردووە، کە کەس ناوێرێت خۆی لێ بدات! چوونکە تەنیا بریندار ناکرێن، دەکوژرێن و دەخنکێن. ئەو کوژرانە ناڵێم کە گولەیەکی بێ بەها کۆتای بە ژیانێکی پیرۆز دێنێت و چرایەک خامۆش دەکات! من باس لە کوژرانە ڕۆح و دەروونیەکە دەکەم. ئەگەر ڕۆژێک بە دوو گوڵە دوو چرا بکوژێننەوە ، ڕۆژانە میلیۆنەها چرا بە وشەی قەحبە خامۆشتر دەکرێن!
بەڵام ئیدی پێویست ناکات لە وشەیە بترسیت! چونکە ئەوەی بە من و تۆ دەڵێت قەحبە لە من و تۆ دەترسێت!
ئا زەندەقی چووە لەوەی من و تۆ چراکانمان نەک تەنیا بدرەوشێتەوە، دەترسێت چرایەکی تریش بدرەوشێنینەوە!
وەرە چرات ڕۆشنە
وەرە ڕێگات ئازادە
وەرە مەترسە، بەسە ئەوان لێت دەترسن و زەندەقیان چووە! [1]
#باریکان ئیسماعیلی#