باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و یەرەمە
کابرێوە یەهوودی خەریکو سەیرانی و ڕاوەشکاری بۍ، جە دوورۆ ڕۊخسارو حەزرەتیش پېسە وەرەتای و ڕوخسارو یاوەرەکاش پېسە مانگەو چواردەی دییە، بە پەلە هەواڵەکەش یاونا بە جوولەکەکا، ئاڎییچۍ پېسە ئەنسارەکا جە پېشوازیانە ئاماڎیۍ بېنۍ.
تا خاس گەرم مەبیی خۊر دا لېشان
باز هەرکام مەشین وە یانەی وېشان
غەرەز تا یەک ڕۊ یەک نەفەر یەهوود
ئاما وە بەیروون گومڕای بۍ وجوود
تا شیی وە بەرزی سەیران مەکەردش
سەیادان ئاسا پارېز مەبەردش
ناگاە وېش جە دوور حەزرەت وېنەی خوەر
نە پای کۊی شەرق سەر ئاوەرد وە بەر
حەزرەت وېنەی ماه دوو هەفتەی کامڵ
سەحاب چوون کەوکەب چەرخی حەقق مەنزڵ
حەزرەت شاهسوار، ئەسحاب گشت لەشکەر
نە دەوری عەلەم ئەژدیهای پەیکەر
وە کەوکەبەی خاس تەشریف ئاوەردەن
سارا و هەرد و بەرد موززەیەن کەردەن
دەرساعەت یەهوود وە بۍ ئیختیار
هانا کەرد وە قەوم تایەفەی ئەنسار
واتش: ئەو سەردار مەحبووبی ئېوە
بەختی سەعادەت مەتڵووبی ئېوە
ئەو نەمامی باغ جەڼەتولماوا
موژدە بۊ پېتان عەلعان ها یاوا
پەخشانەن جە دەور بەدری جەماڵش
خاس و عام بەیان وە ئیستیقباڵش
چوون ئەهلی ئیسلام شنەفتەن خەبەر
بەستشان سیلاح تەمامی یەکسەر
شەعشەعەی شاڎیی بەرزبیی جە یاران
نمانا هیلای یە ڕەوزەداران
تەمامی خاس و عام مەدینەی ئەنوەر
جوان تا وە پیر گشت بەرشیی وە بەر
دیسان ها حەزرەت جەمین ماهی نۊ
کەمکەم تەشریفش یاوا وە پای کۊ
وەر جە گرد کەسێ فارووقی ئەعزەم
چەنی زینوورەین سەرداری ئەکرەم
شین وە لای حەزرەت پەیا پەی وە دەو
بوساشان ڕیکاب هومایونی ئەو
حەزرەت هەم بوسا فەرقی ئەو یاران
شکۊفا چوون گوڵ ئەوەڵ وەهاران
ئەوەڵ موهاجیر جەو دما ئەنسار
یاوان وە جوزوور شای بوراق سوار
خاک پای ناقە ئەو بەرگوزیدە
چوون سورمە یەکیەک ماڵان نە دیدە.[1]