باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و ششەمە
حەزرەت چەنی ئەسحابەکا بەردەوامۍ بېنۍ جە کۊچەکەشانە، چېرو پاو حەزرەتی بیەبۍ بە بلۊقی، فرە هیلاک بۍ، خوڎای کەرد ئیمامی عومەر و عەلی یاوێ لاشا، حەزرەت دڵش کریاوە، دەروونش ئاسووڎەبی.
وە پای پیادە سارا و هەرد و بەرد
بادیەی بەیدی عەرەبستان تەی کەرد
هەر ئەوەند بە وېش زۊر ئاوەردەبۍ
پای موبارەکش بلوق کەردەبۍ
حەزرەت خەیاڵش هەر مورتەزا بۍ
هېمای تەشریفش هەر جە (قەبا) بۍ
ناگاه ئەمیر ئەلموئمنین یاوا
سەر وە تۊز خاک پای حەزرەت ساوا
شای خەتمی پەنا عەلی دیی وە چەم
یەکسەر دا وە باد کۊی خەرمانی خەم
دەستی موبارەک ماڵا وە پای ئەو
ساڕېژ بیی جە زام ڕەنجی ڕاگەی شەو
بە قەوێ ماچان: حەزرەت هەژدە یەوم
بەند بیی جە (قەبا) مەحەلەی ئەو قەوم
قەولی تەر بیست یەوم تەوەقوف کەردەن
ئەوسا تەشریفش وە یەسریب بەردەن
بەڵام جومعە بۍ ئەو ڕۊ تەشریف بەرد
مەدینەش وە نووری وېش مونەوەر کەرد
مەخلووقات ئاما گرد وە پېشوازش
سەر و ماڵ کەردەن وە پایەندازش
یەکیەک مەکەردەن عەرزی پېغەممەر
وە یانەی ئېمە تەشریفت باوەر
مەهاری ناقە دەسدەس پەس وە پېش
مەکېشا وە مەورید هەر کامێ پەی وېش
حەزرەت فەرماوا: مەکەن عەلاقە
ڕەها دەن جە دەس مەهاری ناقە.[1]