باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و دوەمە
وەختێ کناچۍ و ژەنەکۍ حەزرەتېشا بەردۍ پەی مەدینەی، هەمان شەوەنە، کناچەکۍ ئەبووبەکری (ئاسما و عائیشە) و ژەنەکېش بەبۍ مودارا شین وە دەشت و سارا، کەوتۍ ڕا پەی لاو ئەبووبەکری جە مەدینە، وەختێ یاوێ وەرۆ، گرڎ شاڎۍ بیۍ بە یۊترینی، حەزرەت شوکرانەو خوڎایش کەرد.
دمای موددەتێ چوار نەفەرۍ جە یەهوودیەکا خەیبەری ئامێ خزمەتو حەزرەتی و عەرزشان کەرد: ئېمە چوار پەرسېما هەنۍ، گەر بتاوی جوابما دەیۆ، ئانە ئیمان بە دینەکەیت مارمۍ.
باز هەم جەو تەرەف عەبدوڵڵای سەروەر
فەرزەندی دڵبەند سیدیقی ئەکبەر
هەردوو هام شیر حورانی پاک دین
ئاسما و عائیشە (ام المۇمنین)
هەم ئومی ڕمان یاگەی نازشان
والیدەی بوزورگ جای نیازشان
جە مەککەی شەریف وە بۍ مدارا
بەرشین ڕووکەردەن ئەو شەو وە سارا
تەمام بە تاجیل کەردەن جوهد و جەخت
نەگرتەن ئارام بە وەقت و بۍ وەقت
ئەو حوری عەینان گرد نازەنینە
داخڵ بین وە خەیر گرد وە مەدینە
حەزرەت چوون شنەفت شوکری حەقق کەردش
سەنای خوداوەند وەجا ئاوەردش
الحمدللە شاڎ بین وە یەکتر
فەرزەند بە پدەر، زەوجە بە شووهەر
ئەو ساڵ عەبدوڵڵا بن ئەبی زوبەیر
موتەوەلید بیی جە ئاسما بە خەیر
ئەسحاب مەسروور بین یەکسەر بە شاڎیی
دان وە دەف و نەی موبارەک باڎیی
چوون یەهوود سەوگەند وە تەورات وەردەن
واتە بین جەی دەر سیحرمان کەردەن
جە ئەهلی ئیسلام وە بۍ داواران
هەنی زەوجشان وەلەد ناوەران
بەڵۍ وەقایع واقیعەی ئەو حاڵ
وەیتەور وېیەردەن وەزعی ماە و ساڵ
تایەفەی یەهوود جە گرووی خەیبەر
ئاما وە حزوور شای خەیرولبەشەر
یەکێشان عەرزکەرد یا ابوالقاسم
من خارج وە کیزب تالیب وەراهم
ئېمە چوار سوئال داریم وە حوزوور
ئەگەر دای جواب یەکیەک بەو دەستوور
جە هەرچی کە تۊ کەردەنی حاسڵ
قبووڵت مەکەین بە دیڎەو بە دڵ.[1]