باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و هەشتەمە
یەهوودیەکۍ ئامێ خزمەتو حەزرەتی، عەرزو خزمەتیشا کەرد: ئېمە مەزانمۍ کە فەرمایېشتەکېت ڕاسېنۍ، بەڵام ئېمە هەر شش تایفەکە نە بیمۍ بە دوسېت، نە دژمەن، نە پەشتگیری دژمەنەکات کەرمۍ نە دژایەتیشا، تۊیچ کارت سەروو ئېمۆ نەبۊ. حەزرەت قبووڵش کەرد، پەیمانێ مېیانو هەر شش تایفەکەی و ئیسلامینە بەسیا.
یەهوود عەرز کەردەن فەرموودەت ڕاسەن
هەرچیت فەرماوا بېکەم و کاسەن
ئېمە پەی کارێ ئامایم وە خزمەت
مەبۊ قبووڵ کەی جە ڕووی مەرحەمەت
با نەبۊ جە بەین جەهل وجەهالەت
قەرار دەین وە هەم سوڵح و سەڵاحەت
تایفەی یەهوود هەر پەنج شەش گروە
نە دوس بین وە تۊ، نە دوشمن وە توە
نەدەرین ئازار هەم وە یارانت
هەم نەبین کۊمەک پەی ئەغیارانت
تۊیچ هەم وە ئېمە هیچ نەبۊت کارێ
نەیاوۊ بە کەس جە تۊ ئازارێ
تاکە بزانین ئاخر کاری تۊ
چەنی قەومی وېت وە کۊ مەیاوۊ
حەزرەت ئیلتیماس یەهوود قبووڵ کەرد
وە ئیزنی مەعبوود تاکی تەنیای فەرد
نە بە ئاشکار، نە بە پەنهانی
نە بە پا و دەس، نە بە زوانی
نە پەشتی حەزرەت نە کۊمەک بە کەس
بە هیچ خەیاڵێ نەکەران هەوەس
وەیتەور قەراردان جە مابەینی هەم
هەردوو، خوداوەند کەردشان حەکەم
ئەر نەقسێ بەیۊن جە مابەینشان
یاخود فیتنەیێ جە توغیانشان
هوونشای وە شای حەزرەت جەلال بۊ
جە جای ئەولاد ئازار و ماڵ بۊ
جە هەر قەبیلە یەک سوڵح نامە
نویسان ڕەقەم خوشی خەتامە
هەریەک دان وە یەک کۊنە مالوومی
گوڕای دڵ جە سەنگ بەڎکارو شوومی
قەرار دان ئەو سوڵح خولاسەی کەلام
سەلاح بی جە بەین یەهوود و ئیسلام.[1]