باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و سېڼزەهەمە
میرزا ئۆلقاڎرو پاوەی ئەچی بەشەنە باس جە بابەتێ ئەفسانە ئامېزی کەرۊن، کە دوورەن جە کەتواری و جە ئایینو ئیسلامیۆ.
جە بېروونو شارو مەدینەینە، وەرگێ پەلامارەو ڕانێ کابرێوە یەهوودی مڎۊ، کاوڕێ مڕفانۊ، بەڵام شوانەکە مەگنۊ شۊنیشو مسانۊشۆ، ئیتر ۋەرگەکە دەسکەرۊ قسەکەردەی چەنی شوانەکەی، ماچۊ: ئانە ڕسقو وېم بۍ، چی چەنەت ئەسانێ، دماتەر ۋەرگەکە مەگنۊ باسو ئانەی کە جە وەڵاتو نەخلستانی پیێوە پېڎابۊ، کە پېخامئاوەرو ئیسلامیەن.
ساچوون وەقایع ساڵی نوخستین
ڕوودانە هیجرەت جە ڕووی سەرزەمین
یەک ڕۊ جە بەیروون مەدینەی ئاوا
گورگی وە گەلەی یەهوودیی یاوا
ناگاه هەڵمەت بەرد وە گوسفەندی بەرد
چۊپان جە شۊنش خەیلێ هانا کەرد
چۊپان وە چوگان خود پەسەندەوە
دەردەم گوسفەند جە گورگ سەندەوە
گورگێ بە ئەمری حەقق ئاما بە زوبان
ڕووی خیتابش کەرد چەو دەم وە چۊپان
واتش: ڕزقی خاس پەی وېم بەردەبۍ
خوداوەند بە من عەتاش کەردەبۍ
ئاخر تۊ وە زۊر ستانای جە من
عەجایېب زوڵمێ نمانای وە من
چوپان وات: ڕاعی نەکەی فەرامۊش
کۍ حەرفی گورگش شنەفتەن وە گۊش
کەس نەڎیەن وە چەم وە ڕوزگاران
گورگ کەرۊ تەقریر خاستەر جە یاران
گوگ وات: ئەی چوپان عەجەب تەر ئېدەن
شەخسێ ها جەی زەید یاگەی ئومېدەن
جە نەخلستان جە بەینی دوو کۊ
شېوەی ڕەسوولیش ڕوشنەن چوون ڕۊ
هەرچی جە ئېوە چەی وەر وېیەردەن
یاخۊ چەی دما هەرچیتان کەردەن
ئەو مەدۊ خەبەر یەکیەک جە کاران
ئاگاه جە کەردەی گوزەشتەی یاران
ئېوە بېباوەڕ چوون دڵ جە سەنگەن
یا مەستی شەراو خەرەفیای بەنگەن
سا هەرکەس ئیمان بە ئەو ناوەرۊ
جە دین و دنیا زەرەر ماوەرۊ.[1]