سەتتاری سڕپۊش
بەشۍ یەکەمە

میرزا ئۆلقاڎر، پەی ئانەی بتاوۊ جە حزوورو زاتو خوڎاینە مدرۊ، مەگنۊ تاریفدایش، یا بینای بېچەم، شنەوای بېگۊش، یاڎ ئاڎەم دەر، ژیری و فام و هۊش، بە ئەشقی پاکت، دماتەر پیاخاسەکا کەرۊ ڕجاکار، گەرەکشەن جە سایەو پایەبەرزی ئاڎییشاوە، بلۊنە خزمەتش، هەر پەوکەی وەشەویسیش پەی ئا پیا خاسا کەرۊن بە تکاکارێ پەی مەرامەکەیش.

سەتار سڕپۊش سەتار سڕپۊش
یا خوڎای بېباک سەتار سڕپۊش
یا بینای بېچەم، شنەوای بېگۊش
یاد ئادەم دەر، ژیری و فام و هۊش
ئەوەڵ بەشق زات بېزەواڵ وېت
بۍ شبهە و شەریک، بۍ مەساڵ وېت
وە نوور مەحبووب شای خەیرەلبەشەر
پەنای عاسیان، سالار مەحشەر
نیات وە فەرقش، توومار لەولاک
سازنات پەرېش، نۊتاق ئەفلاک
جەناب سەیید ئەولادی ئاڎەم
هەر جە ڕووی ئەزەڵ، کەردت بە خاتەم
باجەتی ئەوشەو، بە میعراج بەردت
مەحرەم وە لېقای، زات وېت کەردت
هەم وە مەیل تۊ، دانای بۍ ئەندېش
دیسان هەر ئه و شەو، ئاما وە جای وېش
بەشق ئه و سەروەر، ڕەفیق موشفیق
شای حەق و یەقین، بوبەکری سددیق
مەگېڵا چەنیش، دیار و دیار
گا نە ساراو هەرد، گا نە کونجی غار
بەشق ئەو غەریب، کار پەردازش بۍ
یاگەی موسڵەحەت، جای نیازش بۍ
زومرەی ئەهلو بەیت، سەناش مەکەردەن
نامش وە سەلمان فارسی مەوەردەن
بەشق بولقاسم، ئیمام ئەزهەر
ئیبن محەممەد، سددیق ئەکبەر
بەشق ئەو ئیمام، عەزیز ناتق
جە ئەهل جەعفەر، سددیق و سادق
بەشق ئەو سوڵتان، نامی هەم سامی
ئیبن بایەزد، قوتب بەستامی
بەشق ئەو شەیدای عشق سوبحانی
بەشق ئەو بېخورد، سەهبای موحبەت
شارەزای جەلال تەجەلای وەحدەت
وېڵ و سەرگەردان، گیان نەڕای حەق کەن
خواجە بووعەلی، قاهیرە وەتەن
باجەتی ئەو غەوس، دڵ وە کام یاوا
شای خواجە یوسف، هەمەدان ماوا
وە عەبدالقادر قوتب ڕەبانی
غەوسەلخەلایەق، شای مووجیدانی
وە خواجە عارف، خواجەی خواجەکان
ستوون پەی سەما، لەنگەر پەی ئیمان
وە عەشق ئەو پیر، خواجەی مەعنەوی
(مەحموودالخەبیر) دانای غەزنەوی
باجەتی ئه و پیر، نەی دنیای دەنی
موبەراِ و مەشهوور جە ماو مەنی
ئەو پیر نەساج، ڕامتین یانە
نەڕای عەشق حەق دایېم دېوانە
بەشق دایەرەی، ڕای حەق شناسی
خواجە خواجەگان، بابای سەڵماسی
وە سەرچەشمەی فەیز، شای ساحیب جەلال
کان کەرامەت، سەیید میرکەلال
بەشق شای موشکوڵ‌، گوشای وامەندان
نەقش سەفحەی دڵ، تاعەت پەسەندان
خواجەی خواجەگان شای بەهائەدین
ڕۊشنی شېوەی، سەما و سەرزەمین
سەرهەڵقەی پیران سەفای نەقشبەند
ئەرباب هیممەت شای ساحیب کەمەند
یانی محەممەد بوخارا مەنزڵ
قوتب ئەولیا سەردار کامڵ
با جەتی عەتار ئه و قوتب سەروەر
جە بۊی فەیز حەق، دایېم موعەتەر
بەشق ئەو مەنبەع، ئەسرار باری
مەولانا یەعقوب، چەرخی حەساری
باجەتی ئەسرار خواجەی بەهرەمەند
سەرچەشمەی پیران ماڵ جە سەمەرقەند
مەگرەوا وە سۊز، هەر شه و تا وە ڕۊ
تا کە واسڵ بی، وە تەجەللای تۊ
هەرکەس جەی دنیا وېش تەوەللا کەرد
پەناش وە بارگەی عوبەیدوالله بەرد
پەڵاس فەرقش بی تاجی شاهیی
سەبەب و هیممەت عوبەیداللەهیی
بە حەق ئەوپیر، ڕاگەی مەساجد
خواجە خواجەگان محەممەد زاهد
بەشق ئه و عەزیز، دایېم خەڵوەت کېش
یانی مەولانا محەممەد دەروېش
تا ئەوڕۊ تەشریف وە سای ئەلحەد بەرد
سیوای ئەمر تۊ چېوێتەر نەکەرد.[1]