=KTML_Bold=باوکە گیان سڵاو=KTML_End=
#قوباد تاڵەبانی#
#03-10-2020#
چەند ڕۆژێکە بیر لەوە دەکەمەوە هاتمە خزمەتت چیت پێ بڵێم و چیت بۆ باس بکەم! کوردستان وەک سەردەمی تۆ نەماوە؛ بارودۆخ خراپە و گوزەرانی خەڵک باش نییە.
ئەم بەیانییە تەماشای هەندێک لە وێنەکانتم دەکرد لە هەموویاندا گەشبین و دەم بە پێکەنین بووی، بیرم لەوە دەکردەوە سیحری ئەوە لە چیدایە کە لە ساتە ناخۆش و تاریکەکانیشدا هەر بە هیوا و ئومێدەوە دەتڕوانییە داهاتوو؟ بیرم لەوە دەکردەوە بۆچی بەر لەوەی نەخۆشی بە یەکجاری لە سیاسەت دوورت بخاتەوە، نەک تۆ، بەڵکوو هەموو کورد بە هیوا و بە گەشبینییەوە ئەیانڕوانییە ئاییندە؟
پێم وایە هۆکارەکەی ئەوەبوو؛ تۆ لە ڕێبازی خۆت دڵنیابووی، گەلیش متمانەیان پێت هەبوو. ڕێبازی تۆ هەوڵدان و لێبڕان و ماندوونەناسی بوو لەپێناو ئازادی و بەرژەوەندی گشتی کۆمەڵانی خەڵکی کوردستان، هەر لەبەر ئەمەش بوو هەر کاتێک کێشە و قەیرانێک هەبوایە چارەسەرێکت پێ بوو، کە هەمیشە لە بەرژەوەندی گشتیدا بوو، نەک لە بەرژەوەندی تایبەتیی هیچ کەس و لایەنێک.
ڕێگای تۆ ڕێزگرتنە لە بیرکردنەوە و بۆچوونی جیاواز. ئەوانەی ڕەخنە قبووڵ ناکەن و پەنا دەبەنە بەر توندوتیژی و هەڕەشە و سووکایەتیکردن بە دڵنیاییەوە دوورن لە بیروبۆچوونی ئازادیخوازانەی تۆ.
میراتی تۆ کێبڕکێی تەندرووستیی سیاسییە، ڕێزگرتنە لە نەیار و ڕکابەر، هەوڵدانە بۆ یەکێتی و یەکڕیزیی گەلی کورد، کۆکردنەوەی لایەنە ناکۆکەکانە لەسەر خاڵە هاوبەشەکان، ڕێزگرتنە‌ لە‌ سیمبولە‌کانی نیشتمان، بەڵام بەداخەوە لەو کاتەوە تۆ جێتهێشتووین زیاتر پەرش و بڵاوین و وەک جاران یە‌کڕیز نین.
ئێستا کە سێ ساڵ بەسەر ژیاناوایی تۆدا تێپەڕدەبێت، بەڵێنت پێ دەدەم تا مردن لەسەر ڕێبازی تۆ بەردەوام دەبم. هەرچەندە لەلایەن خەڵکانێکی مافیائاسا و پیسخۆر و گەندەڵەوە ڕێگری زۆر دەخرێتە بەردەمم، بەڵام دڵنیات دەکەمەوە بە هەموو توانامەوە هەوڵدەدەم خزمەت بە خەڵکی کوردستان بکەم.
باوکە گیان..
بەڵێنت پێدەدەم وەک تۆ شەڕ لەپێناو ئازادی گشتی و ئازادی بیروڕا دەکەم. وەک تۆ داکۆکی لە ڕۆژنامەنووس و ڕەخنەگران و نووسەران دەکەم و بەرگریکاری مافی ژنان دەبم.
دڵنیا بە لەگەڵ دڵسۆزانی ڕاستەقینەت لە ئێستا بە دواوە بە گوڕوتینی زیاترەوە بە ئیلهام وەرگرتن لە ئامۆژگارییەکانت تێدەکۆشین بۆ چاکسازی و بنەبڕکردنی گەندەڵی و یەکێتی ناو ڕیزەکانی یەکێتی و یەکێتی ڕیزەکانی کورد. دەزانم لەم ڕێگەیەدا تووشی ڕێگری و ناخۆشی و کۆسپی زۆر دەبین، بەڵام بە شانازییەوە هەرچی ناخۆشی و سەختییە قبووڵی دەکەین و چی لە بەرژەوەندی گشتیدا بێت ئەوە دەکەین.
کوڕی خۆت
قوباد [1]