بابەت: مەیە گېلۍ
هۊرگېڵنای: مێهران ئەحمەدی
گەلەو مەیانە، مەیەیوە گېلە و دڵڕەحمینە بە نامۍ (مەیە گېلۍ) بۍ. لاشەو مەیە گېلۍ پەژمێوە چەرمە و نەرمی پۊژنابېرە. خۆڵک گرڎ ڕوێو دوۍ سەفەرۍ مەیە گېلۍ و ئەو مەیەکاتەری دۊشېنۍ و بە شۊتەکەیشا خامە، ماس، پەنیرە، دۊ و کەرە وەش کەرېنۍ و هەر پاسە بە پەژمەکەیشا جل و بەرگی قایېم و گەرم وەش کەرېنۍ پەی سەردا و سڵۊوەو زمسانیشا.
شوانەو ئاوایی گرڎ ساعبانېوە چەنیو وەناو کەڵەشیری هورئېزۍ و چەنی تووتەکەیش لوېنە گۆڕوو مەیەکا و گەلە زنۍ و بەرېشا لەوەڕنای پەی نەهاڵ و دەشت و دەری، تووتەکە ڕەفېقی گېیانی شوانەی بۍ و هۊشش لاو گەلەیوە بۍ.
ڕوێوشا کە مەیە گېلۍ خەریکوو لەوەڕیای بۍ، سەرەش کۊمنابېرە و جیا بیەوە جە گەلەی، وەرگ و ڕواسەی ئاورا و تەژنە پاگەنە و پەشتوو تاشێوەنە وېشا گېرتەبېرە.
چەمشا کەوت مەیە گېلۍ و کەوتۍ واڎیی وەڵوو ئانەینە شوانە و تووتەکەش زانا، مەیە گېلۍ گېرا و وەراش. وەرگەکە پەشتوو تاشەکەینە یەواشڵێوە دەسش کەرڎ باڕەباڕ کەرڎەی، مەیە گېلۍ ژنیش و گۊشېش قوتۍ کەردېوە، دیاوە دما پەی گەلەی، گردوو مەیەکا و ڕەفېقەکاش دلۍ گەلەینە بېنۍ. وەروو وېشرە واتش: حەتمەن پەشتوو ئی تاشینە مەیەیوە هەنە کە وڵاویەینە، بەڵام خۊفناکا و وەشتەر ئانەن چېگە نیشوو تاکو وېش بزیۊوە. ڕواسە و وەرگ هەر چن نیشتۍ دیارۆ، مەیە گېلۍ خەریکوو لەوەڕیای بۍ و نامانە پەشتوو تاشەکەی.
ڕواسەکۍ کەوتە واڎیی بلۊ وەرۆ و وېش نزیک کەرۊوە بە مەیە گېلۍ و خەڵەتنۊش و چەنی وېش بارۊش پەی پەشتوو تاشەکەی تاکو چەنی وەرگە ئاوراکەی پېوە کەراش چنگەپڕچۍ و تېرش وەرا چەنی. ڕواسەکۍ نزیکەش بېیەوە و واتش: سڵام، تۊ مەیەیوە زرینگەنی؟ کە بۍ یارمەتیو شوانەی و تووتەو گەلەی ئامەینە تاکو فریاو ئی مەیە ساواڵۍ گنی؟ مەیە گېلۍ حەزش کەرد بە قسېو ڕواسەکۍ و واتش: بەڵۍ، من مەیەیوە زرینگەنا، کام مەیە ساواڵۍ مشۊم ڕۊزگارە کەروو؟
ڕواسەکۍ دڵوو وېشنە خاس خوا بە گېلیو مەیه گېلۍ و واتەش پەنە: مەیە ساواڵەکۍ ئینا پەشتوو ئا تاشینە، بۊ، بۊ شۊنیمرە. مەیە گېلۍ کەوتە شۊنوو ڕواسەکۍ، وەختێو یاوەی پەشتوو تاشەکەی، یاوانە کە هیچ مەیەیوە نېیەنە پاگەنە و فەقەت وەرگېوە ئاورا پەشتوو تاشەکەینە نیشتەن دیارشۊ.
مەیە گېلۍ کە تازە یاوەی بېنە فېڵوو ڕواسەکۍ، دەسش کەرد باڕنای و هاوار و مەدەدش هورئېست، بەڵام ڕاو بەرشېیەی و تەکووجمیش نەبۍ، ڕواسەی فېڵ زانە و وەرگی ئاورایی ئی لا و ئۆلاش گېرتەبېشا و خوېنۍ بە گېلیش، وەرگی ئاورای واتش: مەباڕنە، مەیە گېلا مشۊم وەری و شی مەیە گېلۍ هور.
باڕە باڕوو مەیە گېلۍ یاوا گۊشوو شوانەی وبۊساری وەرگی و ڕواسۍ یاوا لووتەو تووتەکەی.
تووتە و شوانە بە فرزانه و ئاززا وېشا یاونا لاو مەیە گېلۍ و دلېو چنگوو ڕواس و وەرگەکەینە بەرشا ئارده، مەیە گېلۍ کە زامڎارە بیېبۍ، دەسوەشانەش کەرد جە شوانەی و تووتەکەی و ژیرە بیە کە ئیتر گېلە نەبۊ و نەخەڵەتیۊ پەی هیچ جڕ و جانەوەرێوە تەری.[1]