خەو نامینێ لە کن بچووکان، حەیا نامینێ لە کن بووکان
لە ناوچەی خۆشناوەتیدا چەندین ئیدیۆمیان بەبن زاریدا هاتووە کە زۆر شیرین و پڕ گوزارشت و ئەزموونن وەکوو: (خەو نامینێ لە کن بچووکان، حەیا نامینێ لە کن بووکان)، ئەو ئیدیۆمە دونیابینییە بۆ ئاییندە، پێشبینی گۆڕانکاری کۆمەڵایەتی و باروودۆخی ئابوورییە، ئەو وتەیە لە کۆنەوە لە خۆشناوەتیدا وتراوە: هەڵبەت شێوەی فەرموودەی کەسایەتییە ئایینیەکان و زاهید و سۆفی و دەروێش و خەڵوەتنشین و لە خوا ترساوانە، کەسایەتییە وەرزێری و کشتیاری و لادێ نشینەکانی خۆشناوەتی بەگوێرەی ئەزموون و تاقیکردنەوەی ڕۆژانەیان و بەراوردکاری بەپێشینانی خۆیان ئەو بیرۆکەیان بۆ هاتووە ئێستا بەهۆی تۆڕی کۆمەڵایەتی و سۆشیاڵ میدیا منداڵان شەویان کردووە بەڕۆژ و ڕۆژیانکردووە بە شەو، بە هیچ کلۆجێ شەوان خەویان نایە و بەهۆی کرانەوەی کۆمەڵگە و گۆڕانی باری ئابووری بووک وەکوو پێشان و کۆن شەرمێ لە خەزوور و خەسوو و شوبرایان ناکەن، بۆیە پێشینانی خۆشناوەتی وتویانە: خەو نامینێ لە کن بچووکان، حەیا نامینێ لە کن بووکان. [1]