داواکاری گشتیی شاری #مەهاباد# لە وتووێژێکدا لەگەڵ ڕاگەیاندنە حکوومەتییەکانی مەهاباد، تۆمەتی (چەندین دۆسیە قوڵبڕی) داوەتە پاڵ #پەیمان گەڵوانی# و ڕایگەیاندووە کە گیانلەدەستدانی ئەو بەندکراوە بەهۆی (نەخۆشییەکی درێژخایەن و دژاور) بووە.
لەم پێوەندییەدا، ڕێکخراوی مافی مرۆڤی هەنگاو وێڕای ئەوەی لە بەدواداچوون و لێکۆڵینەوەکانی خۆی لەو بارەوە بەردەوام دەبێت و سەرەڕای ئەوەش کە هێز و ناوەندە حکوومەتییەکان هەڕەشەیان لە بنەماڵەی گەڵوانی کردووە، ئەو زانیارییانەی بەدەست گەیشتووە کە بەپێچەوانەی چەواشەکاری و پڕوپاگەندەکانی داواکاری گشتیی شاری مەهاباد، پەیمان گەڵوانی هیچ کاتێک بۆ بەندیخانەی ناوەندیی ئورمیە نەگواستراوەتەوە و تاکوو ئەو ساتەی کە لەژێر ئەشکەنجەی هێزەکانی ئیتلاعات ئاستی هۆشیاری دابەزیوە، لە دەستبەسەرگەی ئیتلاعاتی ئورمیەدا ڕاگیراوە. ئەمەش بەتەواوەتی بەپێچەوانەی وابێژی و چەواشەکانی (مێهراب ئەکبەرپوور) داواکاری گشتیی شاری مەهابادە.
وێنە بڵاوکراوەکان لە تەرمی پەیمان گەڵوانی بەڕوونی نیشاندەری ئەو ڕاستییەن کە شوێن و ئاسەواری ئەشکەنجە و لێدان بە شوێنە جیاجیاکانی لەشی ناوبراوەوە دیارە. شایەنی باسە کە (مێهراب ئەکبەرپوور) ، ڕاستەوخۆی دەستی لە تاوان و پێشێلکارییە بەردەوام و نامرۆڤانەکانی لە ڕەوتی بزووتنەوەی ژن، ژیان، ئازادیدا، هەبووە و هیچ پاساوێکیشی لەسەر ئەم بابەتە نییە.
ناوبراو پێشتریش گیانلەدەستدانی هاووڵاتییانی خەڵکی شاری مەهابادی بە تەقەی هێزە حکوومەتییەکانەوە ڕەت کردەوە. هەنگاو لەسەر دۆسیە هاوشێوەکان و بەگشتی دۆخی مافی مرۆڤ لە کوردستان و ئێران بەردەوام خوازیاری لێکۆڵینەوەی پسپۆڕانی پزیشکی دادوەریی نێودەوڵەتیی سەربەخۆ و پزیشکانی بێسنوور بووە، بەڵام کۆماری ئیسلامیی ئێران هیچ کاتێک لەو بارەیەوە هاوکاریی ڕێکخراو و تیمە نێونەتەوەیییەکانی نەکردووە و ڕێگەی نەداوە لێکۆڵینەوە سەربەخۆکانی کۆمەڵگەی نێودەوڵەتی بە مەبەستی لێکۆڵینەوە لەسەر دۆخی مافەکانی مرۆڤ و بەتایبەت بەندیخانەکانی ئەو وڵاتە سەردانی ئێران بکەن.
پەیمان گەڵوانی ڕۆژی یەکشەممە #25-06-2023#، لەلایەن هێزە حکوومەتییەکانەوە لە ماڵەکەی لە شاری مەهاباد بە شێوەیەکی دڕندانە دەستبەسەر کراوە و بۆ دەستبەسەرگەی ئیدارەی ئیتلاعاتی ئورمیە گراستراوەتەوە. ناوبراو ڕۆژی چوارشەممە، #05-07-2023# بەهۆی ئەوەی کە لەهۆش چووە، لە دەستبەسەرگەی ئیتلاعاتی ئورمیەوە بۆ نەخۆشخانەی خومەیینی لە شاری ئورمیە گواستراوەتەوە.
لەو ماوەیەدا کە پەیمان گەڵوانی لە نەخۆشخانە و لەژێر چاوەدێریی پزیشکیدا بووە، هێزە حکوومەتییەکان ڕێگەیان نەداوە کەسوکار و بنەماڵەکەی سەردانی بکەن، تەنیا جارێک خۆشکەکەی توانیویەتی لەژێر چاوەدێریی چڕوپڕی ئەمنییەتیدا سەردانی بکات. خۆشکی پەیمان دواتر جەختی لەوە کردەوە کە (جەستە و سەر و دەموچاوی پەیمان بەتەواوەتی شین و کەوە بوو) . هەروەها لە ماوەی ڕۆژانی ڕابردوودا داواکاری گشتی مۆڵەتی ڕێپێدانی هێنانە دەرەوەی تەرمی پەیمان گەڵوانی لە ساردخانە بۆ پشکنین و لێکۆڵینەوە لە شێوەی مردنی گوماناویی ئەو هاووڵاتییەی واژۆ نەکردووە و ڕێگەی نەداوە بهێندرێتە دەرەوە و لەو پەیوەندییەدا پشکنینی پێویستی بۆ بکرێت.
پەیمان گەلوانی دواجار ڕۆژی یەکشەممە، #09-07-2023# پاش چەند ڕۆژ لە نەخۆشخانەی خومەیینی لەژێر چاودێریی پزیشیکیدا بووە و دواتر بەهۆی بێهۆشی و چوونە کۆماوە گیانی لەدەست دا. تەرمی ناوبراو ئێوارەی درەنگانی دووشەممە، #10-07-2023# لەژێر چاوەدێرییەکی چڕوپڕی ئەمنییەتی لە شاری مەهاباد ئەسپەردە کرا. [1]