چارەنووسی کورد لە هەڵبژاردنی ئەنجوومەنی پارێزگاکانی ئێراق
13-07-202313-07-2023
وادەکەی کۆمیسیۆن بۆ تۆمارکردنی ناوی قەوارە و هاوپەیمانێتییەکان بۆ هەڵبژاردنی ئەنجوومەنی پارێزگاکانی ئێراق سێ هەفتەی ماوە، هەریەک لە بافڵ تاڵەبانی سەرۆکی یەنەکە و لاهور شێخ جەنگی پڕۆژەیان بۆ یەک دەنگی کورد لە ناوچە جێناکۆکەکان ئامادەکردووە، بەڵام بە پێچەوانەوە پەدەکە بڕیاری پێشوەختەی لە پەرتکردنی دەنگی کورد داوە و پاڵی داوە بە تورکمانەکانەوە.
20ی حوزەیرانی ئەمساڵ، ئەنجوومەنی وەزیرانی ئێراق بڕیاریدا ڕۆژی 18ی کانونی یەکەمی ئەمساڵ هەڵبژاردنی ئەنجوومەنی پارێزگاکان بەڕێوەبچێت، هەڵبژاردنەکە لە هەموو پارێزگاکانی ئێراق ئەنجامدەدرێت جگە لە هەرێمی کوردستان.
لە هەڵبژاردنی ئەنجوومەنی پارێزگاکاندا، ناوچە دابڕێندراوەکان شوێنی ململانێی توندی لایەنە کوردی و عەرەبی و تورکمانییەکان دەبێت و کەرکووکیش چەقی ململانێکانی مانگەکانی داهاتووە.
پارێزگای کەرکووک و بەشێک لە ناوچەکانی پارێزگای نەینەوا و پارێزگای سەڵاحەدین و دیالە، دەکەونە سنووری ناوچە دابڕێندراوەکانەوە، ئەم ناوچانە لە دوای ڕیفڕاندۆمە شکستخواردووەکەی 2017ەوە، بەتەواوی کەوتووەتە دەست سوپای ئێراق و لە ڕووی ئیداریشەوە کورد بێ دەسەڵات کراوە تێیاندا.
ئەم هەڵبژاردنە، سەنگی مەحەکە بۆ گەڕانەوەی پێگەی کورد و بە دەستخستنی پۆستە ئیدارییەکانی ئەو ناوچانە و پێشگرتن بەو سیاسەتی بەعەرەبکردنەی، کە لە 2017ەوە دەستی پێ کردووە، لە ئێستادا هەریەک لە یەنەکە و پەدەکە و لاهور شێخ جەنگی بە سێ ئاڕاستە، ئامادەکارییان بۆ هەڵبژاردنەکە دەستپێکردووە.
پەدەکە پێش هەموو لایەک و لە ڕۆژی 27ی حوزەیراندا کۆبوونەوەی بە بەشێک لەلایەنە کوردیی و تورکمانییەکان کرد و لەوێوە پەرتکردنی دەنگی کوردی ڕاگەیاند، ئاشکرایانکرد ئامادەی یەکلیستین بەبێ بەشداری یەنەکە.
دوای هەوڵەکانی پەدەکە، بافڵ تاڵەبانی سەرۆکی یەنەکە سەردانی بەشێک لەلایەنەکانی کرد و پڕۆژەکەی خۆی خستەبەردەمیان بۆ یەکدەنگی کورد لە ناوچە دابڕێندراوەکان بۆ هەڵبژاردنی ئەنجوومەنی پارێزگاکان، بەڵام وەک پێشتر بڕیاری خۆی دابوو، پەدەکە هیچ بە دەمەوە هاتنێکی بۆ پڕۆژەکە نییە.
هەروەها لاهور شێخ جەنگی پڕۆژەیەکی بۆ یەکلیستی لایەنە کوردییەکانی لە ناوچە دابڕێندراوەکان و بە تایبەت کەرکووک ڕاگەیاند و داوایکردووە، لایەنە کوردییەکان لیستێکی هاوبەش درووست بکەن.
کۆمیسیۆنی باڵای سەربەخۆی هەڵبژاردنەکان، 1ی تەمووز تا 31ی تەمووزی بۆ تۆمارکردنی ناوی قەوارە و هاوپەیمانێتییەکان بۆ هەڵبژاردنی ئەنجوومەنی پارێزگاکان دیاری کردووە، تا ئێستا زیاتر لە 15 قەوارە و سێ هاوپەیمانی ناوی خۆیان تۆمار کردووە.[1]
هەڵبژاردنی ئەنجوومەنی پارێزگاکان پێنج مانگی ماوە، ناوچە دابڕێندراوەکان و دانیشتووانەکەی بەهۆی بێ دەربەستی پەدەکە و پەتکردنی دەنگی کوردەوە، لە بەردەم چارەنووسێکی نادیار دایە و ڕەنگە ئەو ناوچەنە و دانیشووانە کوردەکەی، لە دوای هەڵبژاردنەوە ڕووبەڕووی دۆخێکی نوێ ببێتەوە بەهۆی لاوازبوون و پەرتبوونی کوردەوە.[1]