ناونیشانی بابەت: هەفتانە چوار کاتژمێر ڕێگە بە خەڵک دەدرێت سەردانی قەڵای کەرکووک بکەن
ئامادەکردنی: #دیاری ئەحمەد#
لەسەر بڕیاری بەڕێوەبەرایەتیی شوێنەواری #کەرکووک#، هەفتانە تەنیا چوار کاتژمێر ڕێگە دەدرێت خەڵک سەردانی قەڵای کەرکووک بکەن.
لە سەردانێکی مەیدانیی پەیامنێری (باسکورد) بۆ سەر قەڵای کەرکووک ڕایگەیاند، دوای ئەوەی ماوەیەک بوو سەردانی قەڵای کەرکووک قەدەغە کرابوو، ئێستا هەفتانە تەنیا چوار کاتژمیر ڕێگە دەدرێت هاووڵاتییان و گەشتیاران سەردانی قەڵای کەرکووک بکەن، کە قەڵاکە وێڕای وێرانییەکەی، خواستی خەڵک بۆ سەردانی هەر هەیە.
تەنیا ڕۆژانی شەممەی هەموو هەفتەیەک، لە کاتژمێر 3ی دوای نیوەڕۆ بۆ کاتژمێر 7ی ئێوارە ڕێگە دەدرێت هاووڵاتییان و گەشتیاران سەردانی قەڵای کەرکووک بکەن.
پاسەوانی بەردەم قەڵاکە لەبارەی ڕێگرییەکان لە خەڵک، کە ڕۆژانی دیکە ڕێگە نادرێت خەڵک سەردانی قەڵاکە بکەن، ڕایگەیاند، بڕیاری بەڕێوەبەرایەتیی شوێنەواری کەرکووکە، کە ماوەیەکە ئێوارانی ڕۆژی شەممە ڕێگە دەدرێت خەڵک سەردانی قەڵای کەرکووک بکەن.
باڵەخانە و مزگەوت و خانوو و شوێنەکانی دیکەی سەر قەڵاکە بەرەو داڕووخانی تەواو چووە، وێڕای ئەوەی چەندین جار داوا کراوە قەڵاکە نۆژەن بکرێتەوە، بەڵام نۆژەن ناکرێتەوە و ساڵ لە دوای ساڵیش شوێنەوارەکانی سەر قەڵاکە زیاتر بەرەو لەناوچوون دەچن.
مێژووی درووستکردنی قەڵای کەرکووک بۆ زیاتر لە چوار هەزار ساڵ پێش ئێستا دەگەڕێتەوە، کە کورد و جوو لەسەریدا ژیاون و پاشان لە کاتی داگیرکردنی ئیمپراتۆریەتی عوسمانی لە ناوچەکە، ئیتر چەند خێزانێکی تورکمانیش لەسەر قەڵای کەرکووکدا ژیاون.
بەپێی گێڕانەوەی مێژوونووسان، هۆکاری نۆژەننەکردنەوەی قەڵای کەرکووک ئێستا بۆ ئەوە دەگەڕێتەوە، کە دەزانرێت ئەو قەڵایە پەیوەندیی بە نەتەوەی عەرەبەوە نییە و شوێنەوارێکە تایبەتە بە کورد و #کوردستان#، بۆیە نۆژەنی ناکەنەوە.[1]