بارى تەندرووستى و گوزەرانى هونەرمەند (#زیاد ئەسعەد# ) ؟
#وریا ئەحمەد#
زیاد ئەسعەدى هونەرمەندى دوورەوڵات، بەشایەدى زۆرینەى خەڵک و هونەرمەندانیشەوە، مرۆڤێکى دەم بەخەندە و دڵپاک و جوان و خاوەن کەسایەتییەکى هێمن و ڕێزدارە، جگە لەدەنگى بەتوانا و بەچێژ و خۆشى، کەسێکى لێهاتووى کەموێنەیە، بەوەى جگە لە زۆرێک لەئاوازى گۆرانییەکانى خۆى هەتا ئیمڕۆ دەیان ئاوازى جوان و سەرکەوتووى بۆ هونەرمەندە جیاجیاکانى کورد داناوە و ڕۆژانە لەکەناڵ و ڕادیۆ جیاجیاکانەوە گوێبیستییان دەبین و کاریگەرى ئەرینیشیان لەسەر گیانمان هەیە، دیارە لەم هونەرى ئاوازدانانەدا هەتا ئاستێکى بەرز و بەرچاو سەرکەوتوو بووە، کاتی خۆی بەندە، بەڵام دواى ئەوەى لەهەشتایەکانى سەدەى پێشوو ماوەیەک لەگەڵى ژیام و شارەزاى تواناکانى دەنگى بووم و ئاوازیشم بۆى دانا، ئینجا لەستوونێکی دوا لاپەڕەی کوردستانی نوێی ژمارە (179) ی ڕێکەوتی (31-08-1992) و لەژێر ناوی (کەناڵی پێتەختی هەرێم) دا، نووسینێکم بڵاوکردەوە و لەشوێنێکى ئەو نووسینەدا وتبووم: (هەر کەسێک یەک گۆرانی گوت ئەوە: (مەزهەر خالقی) یان (ناسری ڕەزازی) یانیش (زیاد ئەسعەد) نییە.) ..... دیارە ئەوسا بەتایبەتى لەلایەن گۆرانیبێژە گەنجەکانى هاوتەمەنى زیادەوە ڕەخنەى ئەوەم لێگیرا: چۆن دەبێ (زیاد ئەسعەد) ێکى تازەپێگەیشتوو، بهێنمە هاوتاى ئەو گۆرانیبێژە دەنگخۆش و بەئەزموونانەوە؟ بەڵام گرنگ ئەوەبوو پێشبینییەکەم ڕاست دەرچوو. نزیکەى چەن ساڵێک پێش ئێستا، لەلایەن چەن کەسێکەوە ئینجا لەبەر هەر هۆیەک بووبێت، دەنگۆى بێبنەماى خراپیان لەسەر زیادى هونەرمەند بڵاوکردەوە، دواتر بەدیارکەوت ئەوانە: چاویان بەهونەرمەندى دەنگ شیرین و بەتوانا (زیاد ئەسعەد) هەڵنایەت، بەڵام خۆشبەختانە وەک وتراوە: پەتى درۆ کوورتە، دواجار بۆ هەموو لایەک ئاشکرا بوو، کە زۆر بەداخەوە: زیادى هونەرمەندە تووشى (جەڵتەى مێشک) هاتووە و بەو هۆیەوە ئەمڕۆ نزیکەى نیوەى جەستەى نیمچە (ئیفلیح) بووە و ژیانى پێتاڵکردووە، بەداخەوە وەک وتراوە کە ئێمەى کورد: (زیندوو کوژى مردوو پەرستین) ، ئەوە لەبارە تەندرووستییە خراپەیدا لەجیاتى بەهاناوە چوون، ئەوشتە خراپانەیان لەسەر بڵاوکردەوە.
ئێستا ئەو هونەرمەندە بەتوانا و دەنگ سازگار و ئاوازدانەر و نووسەرى تێکستى گۆرانى و ...هتد، لە وڵاتى (سوید) ى سارد و سەرما لەگەڵ ئەو نەخۆشییە درێژخایەنەدا ژیان بەڵام بەتەنیایى و دەردەسەرى دەباتەسەر، بەداخەوە (جەڵتە) کە کارى کردۆتە سەر هەستان و دانیشتنى و تەنانەت بەزەحمەت ڕێگەکردنیشى. دیارە بەندە جارجارە لە ڕێگەى تەلەفۆنەوە ئاگادارى ژیانى ناخۆشى ئێستاى ئەو برا بچووک و هونەرمەندە بەتوانایەم.
خۆشبەختانە ماوەیەک پێش ئێستا سەرۆکى (تیپى مۆسیقاى سلێمانى) تەلەفۆنى بۆ کردم و بەسوپاسەوە و وتى: مامۆستا گیان، ئێمە حەزدەکەین لە ڕێگەى ئێوەوە، داوەتى هونەرمەندى گەورە (زیاد ئەسعەد) بکەین و کۆنسێرتێکى جوانیشى بۆ بکەین، چونکە بە شایانى ئەوە و زیاتریشی دەزانین. (ئاشکرایە نرخى زێڕ لاى زێڕنگرە) ، پەیامەکەیانم بە هونەرمەند زیاد ئەسعەد گەیاند و دیارە لەبەر بارى خراپى تەندرووستی داواى لێبوردنى کرد، بەڵام نایشارمەوە و لەتۆنى دەنگییەوە هەستمکرد، زۆریش نەک کەم بەو ئاوڕلێدانەوەیان دڵخۆشبوو، دڵنیام بەبیستنى هەواڵەکە چاوەکانى ئاویان تێزاوە.
باشە ئەدى وەزارەتى ڕۆشنبیرى حکوومەتى هەرێمى کوردستان و سەندیکاى هونەرمەندانى کوردستان، بۆ زیاد ئەسعەدى هونەرمەندى لێهاتووى کورد، ئایا هەتا ئەمڕۆ هیچتانکردووە؟ ئینجا لقى #هەولێر#ى سەندیکاى هونەرمەندان و بەڕێوەبەرایەتى ڕۆشنبیرى و هونەرى هەولێر و...هتد، . ئایا هەتا ئەمڕۆ هیچییان بۆ ئەو هونەرمەندە لێهاتووەى کورد و هونەرمەندى ناودارى شارەکەى خۆتان کردووە؟ لەم بارى ناساغى و نەخۆشییە و تەنیایەیدا ئایا بیریان لەوە کردۆتەوە: ئەگەر جارێکیش بێت بەهانایەوە بچن، بەڵکوو بەشێوەیەک لەشێوەکان بتوانن: سەردان یان هاوکارى بکەن و هیچ نەبێت کەمێک دڵخۆشى بکەن، بۆ ئەوەى بزانێت و تێبگات کورد بەگشتى و لەشارەکەى خۆیشى خەڵکى بەپەرۆشن بۆى و بەئەرکى سەرشانییانى دەزانن پێداویستى ژیانى ئەمڕۆى بۆدابین بکەن؟[1]