سینا سۆما
دوای سێ ڕۆژ لە هێرشە مووشەکییەکەی سوپای پاسداران بۆ سەر شاری هەولێر، کاردانەوەی بەرپرسانی کۆماری ئیسلامی ئێران و میدیاکانی ئەو وڵاتە لەسەر ئەو هێرشە بەردەوامە.
بەرپرسان و میدیاکانی ئێران خۆیان لەوە بواردووە باسی ئەوە بکەن لە هێرشی مووشەکی شەوی دووشەممەی سوپای پاسداراندا بۆ سەر هەولێر، شوێنی سڤیل کراوەتە ئامانج و ئەندامانی خێزانێک بوونەتە قوربانی.
کەیهان: هەرێمی کوردستان داواکارییەکەی کۆماری ئیسلامیی جێبەجێ نەکردووە
حسێن شەریعەتمەداری، سەرنووسەری ڕۆژنامەی کەیهان، لەبارەی هێرشی مووشەکیی سوپای پاسداران بۆ سەر شاری هەولێر، وتارێکی لە ڕۆژنامەکەدا بڵاوکردووەتەوە، شەریعەتمەداری کە لە ئێران وەک دەستەڕاستی عەلی خامنەیی بۆ کاروبای میدیا دەناسرێت، لە وتارەکەیدا، باسی پەیوەندییەکانی کۆماری ئیسلامیی ئێران لەگەڵ هەرێمی کوردستان و ئێراق دەکات و دەڵێت لە کاتی تەنگانەدا وەکوو هێرشی
داعشداعش بۆ سەر شاری هەولێر، کۆماری ئیسلامی و قاسم سلێمانی، فەرماندەی پێشووی فەیلەقی قودسی سوپای پاسداران، یارمەتیی هەرێمی کوردستانیان داوە، لە کاتێکدا هیچ وڵاتێکی دیکە ئامادە نەبوو وەڵامی داواکارییەکانی هەرێم بداتەوە.
حسێن شەریعەتمەداری، سەرنووسەری ڕۆژنامەی کەیهان، بانگەشەی ئەوە دەکات؛ ئەو زانیارییانەی باسی کوژرانی کەسانی سڤیل لە هێرشەکەدا دەکەن، ڕاست نین و لێدوانی فەرمیی بەرپرسانی حکومەتی وڵاتەکەی و سوپای پاسداران دووبارە دەکاتەوە، بەوەی ئەو شوێنەی کراوەتە ئامانج، بنکەی سەرەکیی مۆساد بووە.
شەریعەتمەداری نووسیویەتی پێشڕەو دزەیی و ئەژی ئەمین کەسانی سەر بە مۆسادن، کە لە هێرشەکەدا کراونەتە ئامانج. پێشڕەو دزەیی بەرپرسی دابینکردنی نەوت و سووتەمەنی بوو بۆ ئیسرائیل، هەروەها ئەژی ئەمین، هاوکارێکی فەرمیی مۆساد و لە ئەندامانی سەرەکیی تیمی ئەنجامدانی کردەوەی تیرۆریستی بوو لە ئێران.
بە وتەی شەریعەتمەداری، کۆماری ئیسلامی ئێران چەندینجار لەبارەی بوونی بنکە و بارەگای مۆساد لە هەرێم، بەڵگەی پێویستی داوەتە بەرپرسانی هەرێمی کوردستان و هۆشدارییان دراوەتێ، کە ئەو کەسانە لە هەرێم بکەنە دەرەوە، بەڵام بەرپرسانی هەرێم تەنیا هەندێک هەنگاوی ڕووکەشیان ناوە و وایان پێشانداوە، داواکارییەکەی ئێرانیان جێبەجێ کردووە.
ئەمە لەکاتێکدایە قاسم ئەعرەجی، سەرۆکی لیژنەی لێکۆڵینەوە کە بە فەرمانی محەمەد شیاع سوودانی، سەرۆکوەزیرانی ئێراق بۆ لێکۆڵینەوە لە بانگەشەکان لەسەر ئەو هێرشەی سەر هەولێر پێکهێنرا، لە هەولێرەوە ڕایگەیاند بانگەشەکان ڕاست نین و ئەو شوێنە بارەگای مۆساد نەبووە.
تەسنیم: ئەژی ئەمین کوژراوە
ئاژانسی تەسنیمی سەربە سوپای پاسداران لە ڕاپۆرتێکی ڕۆژی سێشەممەیدا لەبارەی هێرشی مووشەکی بۆ سەر هەولێر دەڵێت: لە هێرشەکەدا بنکەی مۆساد لە هەرێمی باشووری کوردستان و پێگەی ژمارەیەک لە هاوکارانی ستراتیژیی مۆساد خاپوور کران و کرانە تەپۆڵکەیەکی خاک.
لەو ڕاپۆرتەدا باسی گیانلەدەستدانی سەرمایەداری شاری هەولێر، پێشڕەو دزەیی لە ئەنجامی هێرشە مووشەکییەکەدا کراوە و نووسراوە لە یەکێک لە ئامانجەکاندا، پێشڕەو دزەیی، هاوکارێکی دیاری مۆساد کوژرا و کوژرانی لەلایەن میدیای هەرێمی کوردستان بە فەرمیی پشتڕاست کرایەوە.
باسی ئەوەش کراوە بە ئەگەرێکی زۆرەوە ئەژی ئەمین، بەرپرسی دەزگەی ئاژانسی پاراستن و زانیاری/زانیاری لە هێرشەکاندا کوژراوە و ئاماژە بەوە کراوە، دەرنەکەوتنی ئەژی ئەمین تا ئێستا لە میدیاکان ئەو ئەگەرە بەهێزتر دەکات.
پێشتر نووسینگەی
ئەژی ئەمینئەژی ئەمین ، لە لێدوانێک بۆ ڕووداو، هەواڵی کوژرانی ئەژی ئەمینی ڕەتکردووەتەوە.
ڕاپۆرتەکە، پۆستەکەی ئەژی ئەمینی بە هەڵە نووسیوە و دەڵێت هەندێک هەواڵی دیکە باسی ئەو ئەگەرە بەهێزە دەکەن، کە کەسێک بە ناوی سلێمان ئەمین نادر ناسراو بە ئەژی ئەمین، سەرۆکی ئەنجوومەنی باڵای ئاساییشی پارتی دیموکراتی باشووری کوردستان لە هێرشەکاندا کوژراوە. ئەژی ئەمین، جێگری سەرۆکی ئەنجوومەنی باڵای ئاساییشی باشووری کوردستان و یەکێک لە هاوکارە هەرە گرینگەکانی مۆسادە لە هەرێمەکە، کە سەرپەرشتیی هەندێک کردەوەی تیرۆریستی کردووە لەنێوخۆی ئێران، تیرۆرکردنی شەهید فەخریزادە یەکێک لەو کردەوە تیرۆریستیانەیە کە ئەژی ئەمین دەستی تێدا هەبووە.
نوورنیوز: بەرپرسی هەناردەی نەوتی هەرێمی کوردستان بۆ ئیسرائیل کوژرا
ماڵپەری نوورنیوز، پێگەی فەرمیی ئەنجوومەنی باڵای ئاساییشی نەتەوەیی ئێرانیش باسی گیانلەدەستدانی پێشڕەو دزەیی لە هێرشەکەدا دەکات و ئەو وەکوو خاوەنی گرووپی فاڵکۆن و ئیمپایەر، کەسێکی نزیکی سەرکردایەتی هەرێمی کوردستان و بنەماڵەی بارزانی دەناسێنێت.
نوورنیوز هەروەها نووسیویەتی پێشڕەو دزەیی بەرپرسی هەناردەی نەوتی هەرێمی کوردستان بۆ ئیسرائیل بووە و پەیوەندییەکی نزیک و بەهێزی لەگەڵ مۆساددا هەبووە لە کاتێکدا هەرێمی کوردستان ئەم جارە و پێشتریش ئەو بانگەشانەی ئێرانی ڕەتکردووەتەوە و بەبێ بنەما ناوی بردوون.
ئیرنا: هەرێمی کوردستان گرنگی بە نیگەرانییە ئەمنییەکانی ئێران نادات
ئاژانسی فەرمیی ئێران، ئیرنا لە بارەی هێرشەکەوە چەندین هەواڵ و ڕاپۆرتی بڵاو کردووە. لە یەکێک لە ڕاپۆرتەکاندا، باسی ئەوە کراوە هەرێمی کوردستان گرنگی بە نیگەرانییە ئەمنییەکانی کۆماری ئیسلامی ئێران نادات و دەڵێت دوای ساڵی
2003 و، دامەزراندنی خۆبەڕێوەبەرایەتییەکی ڕەها لە هەرێمی کوردستان، چاوەڕوان دەکرا سەرکردەکانی هەرێمەکە ببنە قووڵایی ستراتیژیی ئێران، بەڵام بوونی هێزەکانی ئەمریکی و ئیسرائیلی، بوونی گرووپە چەکدارە جوداخوازەکان لە دهۆک، سلێمانی و هەولێر ئەوەی پێشاندا کە سەرکردەکانی هەرێمی باکووری ئێراق زۆر گرینگی بە پرسە ئەمنییەکان نادەن و زیاتر مەیلی ئەمریکا و ئیسرائیلیان هەیە.
هەروەها ئاماژە بەوە کراوە؛ ساڵی
2023 ڕێککەوتنێکی ئەمنیی هاوبەش لەنێوان ئێران و ئێراق واژۆ کراوە، بۆ ئەوەی بنکەکانی هێزەکانی دژە شۆڕش لە سنوورەکان دووربخرێنەوە، بەڵام بەرپرسانی هەرێمی باکووری ئێراق گرینگییەکی ئەوتۆیان بە جێبەجێکردنی ئەو ڕێکەوتنە ئەمنییە نەداوە.
لە ڕاپۆرتەکە باسی ئەو کراوە، ئەو هێرشە هۆشدارییەکی جیدی ئێران بوو بۆ ئەمریکا، ئیسرائیل و بەرپرسانی هەرێمی کوردستان و لە زاری شرۆڤەکارێک بە ناوی هانی حەسەن زادە باسی ئەگەری هێرشی زەوینی بۆ سەر هەرێمی کوردستان دەکرێت، دەگوترێت ئەگەر بیانەوێ بەردەوام بن لە درووستکردنی کێشەی ئەمنی بۆ ئێران، لە کۆتاییدا ئێران ناچار دەبێت بە شێوەی زەوینی بچێتە نێو هەرێمی باکووری ئێراقەوە، کە لە دۆخێکی وەهادا، حکومەتی ناوەندی ئێراق و بەرپرسانی هەرێم تووشی ئاڵنگارییەکی جیدی دەبنە.
سەدا و سیما زانیاریی ناڕاست بڵاودەکاتەوە
ئاژانسی دەنگ و ڕەنگی ئێران لە بەرنامەیەکی تایبەتیدا لەبارەی هێرشەکەوە بە بەشداریی سێ میوانی شرۆڤەکار، هەوڵی دا ئەو پەیامە بگەیێنێ، کە لە هێرشەکەی هەولێردا هیچ کەسێکی سڤیل نەکراوەتە ئامانج و ئەوانەی کوژراون کەسانی سەر بە مۆسادن.
لە بەرنامەکەدا شرۆڤەکارێک بە ناوی ڕەزا سەدرولحسێنی دەڵێت: ئەوە ڕاست نییە کە دەگوترێت کەسانێکی ناچەکدار یان کەسانێک کە سیخوڕ نەبن، لە هێرشەکەدا کوژراون، ئەوە گومانێکە کە هەوڵدەدرێت درووست بکرێت. دەمەوێ ئەوە بڵێم، کاتێک بۆ هێرشکردنە سەر بنکەی سیخوڕی ڕژێمی زایۆنی لە هەرێمی کوردستان دەستنیشانکرا، کە بێجگە لە بەرپرسە سیخوڕەکان هیچ کەسێک لەوێ نەبوو و ئەوەی دەگوترێ، خێزان لەوێ هەبووە، منداڵێک یان خانمێک لەوێ بوون، ئەمانە بە هیچ شێوەیەک ڕاست نین و دووریی ئەو بنکەیەش تاوەکوو ناوەندی هەولێر نزیکەی 30 کیلومەترە.
ئەوە لە کاتێکدایە لە هێرشەکەدا پێشڕەو دزەیی، سەرمایەداری کورد و کچە 11 مانگییەکەی بە ناوی ژینە گیانیان لەدەستداوە، هەر لە ماڵەکەیدا هاوڕێیەکی و کارگوزارێکی ماڵەکە گیانیان لەدەستدا، 16 کەسی دیکە کە منداڵەکان و هاوژینی پێشڕەو دزەیی، خزمەتگوزار و پاسەوانەکانیان بوون بریندار بوون.
سوپای پاسداران: تەقینەوە و ئۆپەراسیۆنەکانی دژی ئێران زۆربەیان لە ڕێی باشووری کوردستانەوە بووە
ئەمیرعەلی حاجی زادە، فەرماندەی هێزی ئاسمانی سوپای پاسداران لە لێدوانێکدا بۆ تەلەڤزیۆنی فەرمیی ئێران لە بارەی هێرشەکەوە ڕایگەیاندووە، ئەو شوێنەی لە هەرێمی کوردستان کراوەتە ئامانج، بۆ سیخوڕی، تیرۆر و ئۆپەراسیۆنی تایبەتیی لەنێو خاکی ئێراندا، کەڵکی لێوەردەگیرا.
ئەو بەرپرسەی سوپای پاسداران دەڵێت خاڵێک لە هەرێمی کوردستان دەستنیشان کرا، بینایەک بوو، کە لە ڕواڵەتدا ڤێلایە، بەڵام هەر وەک دوای هێرشەکان دەرکەوت، بینایەکی بەهێزی کۆنکریتییە، کە بۆ سیخوڕی و ئۆپەراسیۆنی تایبەتیی لەنێو خاکی ئێراندا، کەڵکی لێوەردەگیرا؛ بۆ تیرۆر و بۆ ئۆپەراسیۆنی فڕۆکەی بێفڕۆکەوان. لەو بینایەدا کەلوپەلی پێشکەوتوو لەنێوچوون، چونکە بەپێی ئەو شتەی دیارە، دوو قاتیشی لەژێر زەویدا هەیە، هەم کەلوپەلە لەنێوچوو و ئەوانەش کە دەبوو لەنێوبچن، لەنێو بران.
بەوتەی ئەمیر عەلی حاجی زادە، فەرماندەی هێزی ئاسمانیی سوپای پاسداران، زۆربەی ئۆپەراسیۆنەکانی دژی زانا ئەتۆمییەکانی ئێران و تەقینەوەکان لە ناوەندە گرنگەکانی کۆماری ئیسلامی لەم ساڵانەدا کراون، لە ڕێی باشووری کوردستانەوە بوون.
فارس نیوز و کاریکاتێری مشکە برژاوەکانی ئەربیل
ئاژانسی فارس نیوزی سەربە سوپای پاسداران لە چەندین هەواڵ و ڕاپۆرتی تایبەت بە هێرشە مووشەکییەکەدا، بەردەوام ئەوە دووپات دەکاتەوە کە هێرشەکە بۆ سەر بنکەیەکی سەرەکیی مۆساد بووە لە شاری هەولێر و ئەو کەسانەی لە هێرشەکەدا کوژراون وەک بەرپرسانی مۆساد ناوی بردوون.
فارس نیوز وێنەی پێش هێرشەکەی ڤێلای سەرمایەداری کورد، پێشڕەو دزەیی بڵاوکردووەتەوە و ڕایگەیاندووە، سوپای پاسداران بەوردی چاودێریی جمۆجۆڵەکان و هاتوچۆی بۆ ئەو ڤێلایە کردووە و لە شەوی هێرشەکەدا، مووشەکەکان ئامانجیان پێکاوە.
ئەو ئاژانسەی سەربە سوپای پاسداران هەروەها وەکوو سووکایەتیکردن بە قوربانییانی هێرشەکەی هەولێر، کاریکاتێرێکی بە ناوی مشکە بڕژاوەکانی ئەربیل بڵاوکردەوە. کاریکاتێرەکە بەمشێوەیەیە کە لە زەرفێکی سەفەریدا، سێ مشکی بڕژاو دەبینرێن، لەسەر زەرفەکە لۆگۆیەکی وەکوو کەی ئێف سی هەیە کە لەژێرەوە سێ پیتی ئینگلیزی دەبلیو، تی، ئێف نووسراون. هەروەها لە بەشی سەرەوەی کاریکاتێرەکە نووسراوە مشکە برژاوەکانی ئەربیل.
نامەی ئێران بۆ ئەنجوومەنی ئاساییشی نێودەوڵەتی
لە لایەکی دیکەوە میدیاکانی ئێران ڕۆژی چوارشەممە بڵاویان کردووە سەعید ئیرەوانی، نوێنەری ئێران لە نەتەوە یەکگرتووەکان سەبارەت بە هێرشە مووشەکییەکانی شەوی دووشەممە بۆ سەر هەرێمی کوردستان و چەند ناوچەیەکی سووریا، نامەیەکی تایبەتیی بۆ ئەنجوومەنی ئاساییشی نێودەوڵەتی ناردووە.
نوێنەری ئێران لە نەتەوە یەکگرتووەکان، لە نامەکەدا گوتوویەتی کۆماری ئیسلامی هێرشەکەی بەپێی یاسا نێودەوڵەتییەکان، پەیماننامەی ڕێکخراوی نەتەوە یەکگرتووەکان و مافی بەرگریلەخۆی، ئۆپەراسیۆنێکی دژەتیرۆریستیی کردووە.
لە نامەکەدا هەروەها ئاماژە بەوە کراوە، هێرشە مووشەکییەکانی ئێران لە وەڵامی هێرشەکانی کرمان و ڕاسک بوون، بۆیە پێگەکانی داعش، تەحریر ئەلشام و هێزەکانی دژە شۆڕش کراونەتە ئامانج.
کارەکە کۆتایی پێنەهاتووە، ئەمە سەرەتایە
محەمەد ساڵح جۆکار، سەرۆکی کۆمیسیۆنی کاروباری نێوخۆیی و ئەنجوومەنەکان لە پەڕڵەمانی ئێران لەبارەی هێرشەکەوە بۆ ئاژانسی ئیسنای ئێرانی قسەی کردووە و ڕایگەیاندووە، بەو ئۆپەراسیۆنە، هۆشدارییەک درایە دوژمنان و بە جۆرێک لە جۆرەکان تۆڵەی خوێنی شەهیدانمان کردەوە، هەڵبەت ئەمە ئەوە ناگەیێنی کارەکە کۆتایی پێهاتووە، بەڵکوو ئەمە سەرەتایە.
جۆکار هەروەها دەڵێت ڕێبەری ڕایگەیاندووە؛ پێویستە دەست و پەیوەندەکانی تیرۆریستی بەوردی دەستنیشان و سەرکوت بکرێن، بۆیە ئەم پڕۆسەیە بەردەوام دەبێت تاوەکوو ئەو کاتەی ڕەوتی تیرۆریستی لەسەر ئاستی ناوچەکە بنبڕ دەکرێت.
[1]