خەمم خۆشناکاتەوە، تانیشتمان نەخۆش بێت...
نامۆیم سەردەکا، چەندە غەریبم لەناوتا نیشتمان؟؟
چەندە غەریب، ڕۆژ نییە تەماشام تەڕ نەبێت،
بە فرمێسکی شاخەکانت، کە بێکەسن..
بە باسکی ئاوت، لەگەڵ هەر ڕۆشتنێکدا دەناڵێنن..
بە ڕەشەبای شینت، کەنەخۆشه و لەسەر پشت ڕاکشاوە...
بە ئاسمانی سەوزت، کەلەرزی لێهاتوه و پڕە لەپاڵتۆی هەور..
بە شنەی وەنەوەشەیت، کەدانی کێشاوه و پڕە لەباڵی سپێدە..
من تەماشام تەڕ بووە بەحەسرەتت، کەپڕم لەبێکەسی..
بە تیشکی بەرەبەیانت کە بەگریان خۆی داپۆشیوە..
بە مانگی ڕوو زەردت، کەپڕە لەئێشی مارتی هەڵەبجە..
نامۆیم سەردەکا نیشتمان...غەریبیم درێژ درێژ...
بەو هەموو نەخۆشییەوە لەدڵما ڕاکشاویت،
ئیتر چۆن خەمم خۆشکاتەوە ؟؟؟
غەریبیم سەر دەکا نیشتمان،
تەڕ تەڕ بووم بە نەخۆشییەکانت...!!!
* * *
هەرچی خەون دەبینم پێتەوە نیشتمان،
خەونم چۆڵ و هۆڵە..
خەون بە مەلەکانتەوە دەبینم،
شەقژنییان وەریوه و ئاسمانیان قەفەس،
خەونم ژنێکە سەری سپاردووە بە ئەنفال و
لادێکەشی بە دووکەڵەوە خستۆتە سەر شان..
خەونم چاندنی مانگێکە شەوی تاری،
لەپیاسەی تاریکییەوە زیندان..
غەریبیم سەر ئەکا،
نامۆیم دائەکا..
ئاخر من چۆن غەریب نەبم لەناوتا،
خەیاڵدانم پیر بوو نیشتمان،
خەونم دڵۆپ دڵۆپ نیگەران...!!
* * *
خەم مەخۆ نیشتمان خەم مەخۆ،
تا خەمم خۆشدەکاتەوە...
ئەوەتا هەموو ڕەشەباکانی زەمەن هاتن و
نەیان وێرا لووت بدەن لەلووتی شاخت..
مێژوو شاهیدە..نیشتمان
ئەوە مێژووە دەڵێ: هەمیشە کزە بایان،
لە سێدارە داوی بەڵام دواجار کزەبا،
لەسەری سێدارەوە چۆتە دەستی شاخ..
خەم مەخۆ تاوێک سەیری داربەڕووکە،
تاخەمم خۆشدەکاتەوە...
ئەو ڕەگی لەشاخدا ڕواوە و نابەزێ،
تۆش بەچەشنی ئه و نابەزێی...
تۆ کەی بەزیوی کەی نیشتمان کەی؟؟؟
هەموو دوژمنەکانت هاتن و ویستیان،
لەشت لەبیابان بنیات بنێنن و نەیانتوانی..
هاتن و ویستیان،
لە کەلەسەرت شاخ بڕوێنن و نەیانتوانی..
هاتن و ویستیان
لە زمانتا ئەلیف بێی شکستە،
حونجە بکەن و نەیانتوانی...
هاتن ویستیان لەزەمەنی عەولەمەوە ،
بتکەنە کۆیلە لەبازاڕی عوکازاو نەیانتوانی..
ئەوان.. ئەوان هەرچییەکیان کرد و هەرچییەکیان بردو
هەرچییەکان ویست.. نەیانتوانی بوونت بکەنە هیچ
خەم مەخۆ نیشتمان خەم مەخۆ..
کە تۆ ڕەچڵەکت لەڕەگی کەریم زەند و کەیخەسره و
قازی و شێخ سەعید و شیخەکەی حەفیدی سلێمانی بێ و
موتوربە کرابیت لەژنانی بەهەڵمەتی کۆبانێ
خەم مەخۆ ئەوان هەمیشە ئەسپیان سمکۆڵان و
ناویان تۆمار دەکرێ لەسفری سلوک و
دەچنەوە سەر هیچاو هیچ...!!!
* * *
زۆر گریاوم بەسەرتا نیشتمان،
ئه و کاتەی سیروانی چاوەکانم،
هەناسەی تەنگ بوو...
ئه و کاتەی لەژێر هەر بەردێکتا،
گەنمێکی چاو رەش چاوەڕوانبوو...
ئه و کاتەی لەژێر هەر دار سنەوبەرێکتا،
قیژەیەک ڕوا بوو..
ئه و کاتەی لەسەر شانی هەر مزگەوتێکتا،
تابووت پاڵکەوتبوو..
گریاوم نیشتمان گریاو
شەڕ تۆی کەمئەندام کرد،
تۆ سەیرت کردووە ئاسمانت کەڕو لاڵه و
شاخت دەستی قرتاوه و
کانیت پێڵاوی بیابانه و
ئازادیت ژنێکە سەرشانی پڕە لەچرپه و
کلیلی دەروازەی ژیانیشی قاچاخە؟؟؟
تۆ هەست کردووە نیشتمان ئەندامی ئه و
شەڕانە نەبوویت بوویتە کەم ئەندام؟؟!!
مێژوو وتی: هەر لەشەڕی چاڵدێرانەوە،
تاعێراق ئێران و تادوکەڵەکەی کەنداو
تا تا تا....تا ئێستا قاچت نامێنێ و دەستت
فڕێ ئەدرێ و سەرت بزر ئەبێ و لاشەت
تابووتەکان هەلدەچنێ و نازانی ...
تۆکەی ئەندام بویت لەشەڕی تڕۆهات و
بوویتە سوتەمەنی ...!!!
* * *
نازانم نیشتمان تۆ پیر بوویت و
پەت وسێدارەت لێنەبڕا...
تۆ پشتت دایە بەر کەمەری گۆچان و
کێبڵ و قامچیت لێ نەبڕا...
تۆ پڕ بوویت لەنووزه و کزەی ئەنفال و
عەرعەر و شەنگالت لێنەبڕا...
خەم مەخۆ نیشتمان خەم مەخۆ
کێ دەتوانێ فەنا فەنات کا لەزەوی خوا کێ؟؟؟
تۆ سەیرکە پێکەنینی پەلکە گیات،
درایە بەر ڕێژنەی گولله و
هەتوانی ئازادیت بیر نەچوویەوە..
قاچی جۆگەکانت ڕۆکرایە،
هەوری ئاسمان و
هەڵمی ئازادیت بیر نەچوویەوە..
دڵی کانییەکانت نابینا کرا،
بەقاقای شۆفڵ و
هاژەی ئازادییت بیر نەچویەوە..
کڵاو جامانەیان گۆڕییەوە بە عەگال و
پێڵاوەکانت بەپێخاوسی
کەلتوری کوردایەتییت بیر نەچوویەوە..!!!
* * *
نیشتمان ئەوان کەتۆ تیرۆر دەکەن،
لەچی تێدەگەن لەچی؟؟؟
لەشاخت تێناگەن بەفر،
قاڵییەکی سپی بۆ دەچنێ،
تۆ ئه و کات ژنە دەست ڕەنگینەکانی،
سنه و سابڵاخی...
ئەوان لەگۆمت تێناگەن، مانگ
وێنەی خۆی تیا دەکێشێ...
تۆ ئه و کات شێوەکارە،
ڕۆح سوکەکانی سلێمانیت...
ئەوان لەهەورت تێناگەن خەریکی
چنینی بارانە،
تۆ ئه و کات قولاپ و خوری، دەستی
کچە شۆخەکانی قامیشلۆ و حەسەکەیت...
ئەوان لەبارانت تێناگەن،
دەشت لەناویا کوڕژنییەتی
تۆ ئه و کات هەولێرکەی هۆلاکۆبەزێن و
نەخۆشیت بۆ هەموو ئەسکەندەرەکان و
سوپا شڕەکەی زەینەفۆن...!!
ئەوان لەسەرچاوەی زەڵم و لەهاژەی
چەمەکانت تێناگەن، جووتێک کڵاش،
لەپێ دەکاو بەکوڵەباڵێکی خاکییەوە دەگەڕێ،
تۆ ئه و کات سیاچەمانەکەی هەورامانیت...
ئەوان لەشنە بات تێناگەن، کەبەهار دێ
ئیمان دێنێ بەئێشی مانگی مارتت،
تۆ ئه و کات کوڕو کچە ونبوەکەی هەڵەبجەیت..!!!
نیشتمان بیرت نەچێت،
ئەوان بۆ هەمیشە خەلیفەکان بن،
ئێمە بۆ هەمیشە دەبینە هەللاج،
بە(انا الحق) دەیانخکێنین...
ئەگەر ئەوان تۆ بکەنە زیندان،
ئێمە یەک یەک دەبینە،
پەنجەرەی یاخی و
فێرییان دەکەین ئازادیی یانی چی؟؟؟
نیشتمانم ئەگەر ئەوان شپرزەیان کردی
بەجێهێشتن بەکۆچ و کۆڕه و،
ئێمە دەبینە هەڵەبجه و قەڵادزێ و
شەنگال و کۆبانێ و یەک یەک،
دەچینە چاڵی چاویان...
خەم مەخۆ نیشتمان خەم مەخۆ،
وابارانی خەمم خۆشدەکاتەوە،
خەم مەخۆ....!!!
ناوی نووسەر: #ڕۆژ هەڵەبجەیی# [1]