شیراز ڕەئوف
گوتەبێژی هاوپەیمانیی عروبە لە #کەرکووک# ئاشکرای دەکات کە لێکتێگەیشتنی لایەنە عەرەبییەکان و پارتی دیموکراتی کوردستان لەبارەی پێکهێنانی حکومەتی خۆجێی و دابەشکردنی پۆستەکانی پارێزگەکە گۆڕانی بەسەردا هاتووە.
دەشڵێت، پارتی لە کەرکووک نەتەوەیی بیردەکاتەوە نەک حیزبی هەر بۆیە ئێستا لێکتێگەیشتنی زیاتر لەنێوان لایەنە کوردییەکاندایە لەبارەی پۆستی پارێزگار و گەلی عەرەبیش بەهیچ جۆرێک ڕازی نابێت پۆستی پارێزگاری کەرکووک بکەوێتەوە دەست کورد.
عەزام حەمدانی، گوتەبێژی هاوپەیمانیی عروبە لە بەرنامەی ڕووداوی ئەمڕۆ وتی: ئێستا هەرسێ پێکهاتەکەی کەرکووک عەرەب و کورد و تورکمان لە ناکۆکیی قووڵدان لەبارەی دابەشکردنی پۆستەکان و هیچ لایەنێکیان ئامادەنییە دەست لە پۆستی پارێزگار هەڵبگرێت.
وتیشی، پێکهاتەی عەرەب مەترسیی هەیە وەکوو ساڵانی ڕابردوو کەرکووک بکەوێتەوە دەست کورد و هەمان ئەزموونی ڕابردووی دەسەڵات لە کەرکووک دووبارە بکەنەوە، هەر بۆیە گەلی عەرەبی بە هیچ جۆرێک ڕازی نابێت پۆستی پارێزگاری کەرکووک بدرێتەوە بە کورد.
لە بەشێکی دیکەی گوتەکانیدا حەمدانی باسی لە کۆبوونەوەی لایەنەکان لە ماڵی سەرۆکوەزیرانی ئێراق کرد کە ڕۆژی (چوارشەممە، 21-02-2024) نوێنەرانی هێزە سیاسییە براوەکان لە هەڵبژاردنی ئەنجوومەنی پارێزگای کەرکووک بە سەرپەرشتی و ئامادەبوونی محەمەد شیاع سوودانى، سەرۆکوەزیرانی ئێراق کۆبوونەوە.
لەو بارەیەوە وتی، سوودانی دەیەوێت حکومەتێکی خۆجێیی نیشتمانیی بەهێز لە کەرکووک درووستبکرێت، بەڵام نایەوێت دەستوەردان بکات.
لایەنەکان پێویستە خۆیان ڕێکبکەون لەبارەی کەرکووک و ئەگەر هەر ڕێکیش نەکەون ئەوا پێویستە لایەنێک بۆ لایەنێکی دیکە سازش بکات و ئۆباڵەکەشی بخرێتە ئەستۆی سوودانی، عەزام حەمدانی وای گوت.
'2 ساڵ بە 2 ساڵ'
عەزام حەمدانی باسی لە سیناریۆیەکی تورکمان کرد بۆ دابەشکردنی پۆستەکانی کەرکووک بە شێوەی 2 ساڵ بە 2 ساڵ لەنێوان پێکهاتەکان و بە وتەی ئەو ئەوە سیناریۆیەکی تورکی بووە و ڕەتکراوەتەوە.
حەمدانی وتی: لە گفتوگۆکاندا پێکهاتەی تورکمان داوایەک و پێشنیازێکیان هەبووە، داواکارییەکان ئەوەبووە کە بنەمای 32٪ بۆ پێکهاتەکان ڕەچاوبکرێت لە دابەشکردنی پۆستەکان و پێشنیازەکەشیان ئەوەبووە کە پۆستی پارێزگاری کەرکووک بەشێوەی دوو ساڵ بە دوو ساڵ بێت لەنێوان پێکهاتەکان، بەڵام ئەو پێشنیازە لە بنەمادا پێشنیازی وەزیری دەرەوەی تورکیا بوو و ڕەتکرایەوە.
هیچ سیناریۆ و دەستوەردانێکی دەرەکی لە کاروباری کەرکووک قبووڵ ناکەین، حەمدانی وای گوت.
وتیشی: تەنیا پێکهاتەی عەرەبی یەکگرتووە لەناوخۆدا لە کەرکووک و هاوپەیمانێتی پێکهێناوە و بە یەک پاکیج دەچێتە گفتوگۆکان، دەنا پێکهاتەی کورد و پێکهاتەی تورکمانیش لەناوخۆیاندا کێشەیان هەیە، بەڵام لایەنە کوردییەکان نەتەوەیی بیردەکەنەوە لە کەرکووک بۆیە ئەگەری ڕێککەوتنیان زۆرە.
لەبارەی گفتوگۆی لایەنە کوردستانییەکانیش لەگەڵ پێکهاتەی عەرەبی لە کەرکووک گوتەبێژی هاوپەیمانی عروبە ئاشکرای کرد کە عەرەب و پارتی دیموکراتی کوردستان تا ڕادەیەکی زۆر لێکتێگەیشتن و نزیکییان هەبوو پێشتر.
بەڵام دەڵێت: #پارتی دیموکراتی کوردستان# لە کەرکووک نەتەوەیی بیردەکاتەوە نەک حیزبی و هەر بەهۆی ئەو بیرکردنەوە نەتەوەییەشیان ئێستا نزیکی و لێکتێگەیشتنەکەیان لەبارەی پێکهێنانی حکومەتی خۆجێی کەرکووک وەکوو پێشتر نەماوە.
دوای زیاتر لە مانگێک لە پەسندکردنی ئەنجامی هەڵبژاردنی ئەنجوومەنی پارێزگەکان، ئەنجوومەنی پارێزگای کەرکووک نەیتوانیوە حکومەتی خۆجێی پێکبهێنێت و پارێزگار هەڵبژێرێت.
بەپێی زانیارییەکانی تۆڕی میدیایی ڕووداو بڕیارە سەرەتای هەفتەی داهاتوو جارێکی دیکە هاوپەیمانیی بەڕێوەبردنی کەرکووک بە سەرۆکایەتیی سەرۆکوەزیرانی ئێراق لە بەغدا کۆبێتەوە بۆ گەڵاڵەکردنی ڕێککەوتنێک لەبارەی پێکهێنانی حکومەتی خۆجێیی لە کەرکووک.[1]