سوورەتی و الليلە باسی زوڵفی شاهەنشا ئەکا
صاد جلوەی چاوی کاڵی حەزرەتی والا ئەکا
دەستی من داوێنی تۆ، یا حەزرەتی «خير البشر»
من، سەگی ئەومە کە مەیلی سوورەتی طه ئەکا
بۆ نیشانەی عیززەتی یاسین بەبانگی بەرز ئەڵێی
باسی مێعراجی شەریفی الذی اسرى ئەکا
بێ تەماشا کە لە دەشتی عێززەتا بۆ قوربی حەق
کەی تەلەفوون یاخۆ تەلسز کاری وا خێرا ئەکا
چاو لە قونجانێ لە خاکا گەییە عەرشی بارەگا
دەک فیدای ناڵی بوڕاقت بم کە کاری وا ئەکا
مەحزی خەرقی عادەتە شاهم کە چوو بۆ لامەکان
وەرنە هەرلا مەیلی خۆی بێ، دیدەنی ئەعلا ئەکا
غەیرە مەحسوورە عەزیزم، باسی مێعراجی ڕەسووڵ
گەر ئەرەستوو بێ بەیانی وەسفی کا، بێجا ئەکا
قانعی ئومێدی ڕەحمی تۆی نەبێ بێ تۆشەیە
ڕۆژی مەحشەر، ڕوو لە لوتفی حەزرەتی لەولا ئەکا
(بە کوردی و ئەرەبی ڕێنووسکراوە)
پەرتووک: #گوڵاڵەی مەریوان#
هۆزانەوان: #قانع# [1]