ئەی دەلاقەی مناڵیم
ئەی لادێی بە جێماوم
کەی قاقای جحێڵەکانت
بۆنی سێوەڕەی نێو مێرگ و ژوانی ئێوارانت
کایەو بەدفەڕێکانی نێو کۆڵانەکانتم بۆ دێنێوە...
ئەی پەنجەرەی ژوری هەرزەکاریم
لە گزینگی بەرەبەیانی لوتکەی فەڕەنگدا
هات و هاواری گاوان و جوتیار
بە گوێی خەواڵوم دا بچرپێنە
کاتی ڕۆژئاوا وێنای چیاکانم بۆ بێنە...
ئەی گردی پیرۆزی مناڵیم
بمبەرەوە بۆ لای خۆت
لەسەر تاتە بەردینەکانت بمخەوێنەوە
من هیلاکم لەم جیهانە پڕ فێڵ و سەودایە....
ئەی دەلاقەی مناڵیم لە کوێی؟
چاوی پڕ لە خەوی کیژو کوڕان
لە باوەشی چیغی مەڕداران
دەنگی مەشکەی ماندوو و
بۆنی تەنوری بەربەیانی دایکم،
کاتێ دوکەڵی بە میچی ئاسمانەوە هەڵدەکشێ
من لە نیگاهی تۆوەم دەوێ!
ئەی گوندی بە تەمەنی پڕ مەینەتی من
تاکەی تاوانی مێژووی برینداری تۆ بدەم
خەمی جێ پێی بەجێماوی یارانی وڵاتت بدەم؟
ئەی لادێی مناڵیم
کەی شەوو ڕۆژی وەرزەکانت دەبینمەوە
سێبەری ڕەزو باخی سێوەکانت
کەی باوەشێک له کەروێشکەی گەنمەکانتم پێ دەدەی؟
حەز دەکەم ئێواران لەسەر ڕێگا
چاوەڕێی گەڕانەوەی کیژۆڵانت بکەم
لەسەر کانی مزگەوت
بۆڵەبۆڵی سۆفی و دەروێشانت سەیر کەم!
دەمبینی کە ماندووم
هێندەی مەیتەرەوانێک
لە شاخی ڕوت و ڕەجاڵت دەچم
وەکوو کوندەبوو، حەزم لێیه هەر لە دامێنی گردەکانت بنیشم...
لە نیهایەتی تاریکی شەوی سەرماوەز
لە گوڵان و گەلاوێژ و گەڵاڕێزانت دا
من هەر بن دارو بەرد و کەلێن و قوژبنی تۆم بەلاوە خۆشە
لەکاتی تەنیایی و دڵشکاوی دا
سەر گۆڕستانەکەت سوکناییە بۆ من.
ئەی وەتەنی جوانی مناڵیم
کەی کێلی ئازیزانمان دەبینین
کەی گۆڕی بێ ناوو نیشانی هاوڕێکانمان دەدۆزینەوە
کەی لە ماڵی باوانمان وەژور دەکەوین؟
ئەی لادێی شیرینم
تامەزرۆی بۆنی چارەگەشانی دایە گەورەمم
کاتێ سەرم دەدۆزێتەوە...
دەنگ و ڕەنگی کۆڵانە جێماوەکانم لە تۆ دەوێ
تاکەی ڕەنجی ئەم خاک و نیشتمانە پیره
لەم غوربەتە لە کۆڵ بنێم...
ئەمن کەی عەتری میخەکی بەر هەیوان و
شەمامەی ئاوێزانی بەر دەرگاو
بەرمور و سەنگی چاوەزاری بەر ئاوێنەی
سەر دیواری مۆرت ببینم ئەی دایکۆڵە گیان
کەی دەستی ماندووی باوکی پیرم بگوشم
ماچی بەری دەست و پێتان بکەم
کڕنۆش بەرم بۆتان...
ئەی گوندی شیرینم
باخی ئەرغەوانی نێو خەونەکانم
کەی قاڕەقاڕی مێگەلە مەڕو
توڕەیی مامی شوانم ببینم
کەی سروەی شەماڵی کێوەکانت
بۆنی خاکی باراناویت هەڵمژمەوە.
ئەی پەنجەرەی ژوری هەرزەکاریم
بمبەرەوە بۆ باوەشت
حەزم لە خەوێکی ئەبەدییە
ئەی خۆرهەڵاتی مناڵیم
کەی پرێسکەم وەپێچم
من کە هەڵۆی سەر شاخ و بەردەکانی تۆ بووم
کوا تابی ئەم گەرمێنە دێنم
کوا تابی ئەم گەرمێنە دێنم....
#خەلیل جەنگی# [1]
=KTML_Bold=تێبینی: ئەم هۆنراوەیە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=