=KTML_Bold=چەند سەرنجێک لەسەر ململانێکانی سەرۆککۆماری عێراق=KTML_End=
#زوبێر ڕەسوڵ#
بۆ تێگەیشتن لە ململانێکانی ئەم دواییەی یەکێتی و پارتی دەبێت دان بەوەدا بنێین کە دەستاودەست یان گۆڕانی نوخبەی سیاسی لەناو هەریەکە لە یەکێتی و پارتی هۆکارێکی دیکەی تێکچوونی ئەو پێوەندیانەیە، بە تایبەت دەرکەوتنی نوخبەیەکی سیاسی تازەی ناو یەکێتی کە بە دیدێکی دیکەوە سەیری ئیدارەی ململانێ سیاسییەکان لەگەڵ پارتی دەکەن. هەڵبەتە ئەو کەلێنە ئەگەری هەیە گەورەتریش بێت ئەگەر نوخبەیەکی تازەی پارتییش بڕیاری سیاسی لەناو ئەو حیزبە بەتەواوی بگرنەدەست، بەڵام ئێستا بەهۆی ئامادەیی و بەهێزیی بارزانی (بەڕێز #مەسعود بارزانی#) لەناو پارتی، هەست بەو گۆڕانە گەورەیە ناکرێت وەک ئەوەی لەناو یەکێتیدا دەبینرێت.
کورد لە بەغدا لە سەرەتای 2003 تاوەکو 2014 خاوەن چەندان پێگەی بەهێزی وەک سەرۆککۆمار و دۆسێی وەزارەتی دەرەوە و و سوپاسالاری عێراق و جێگری سەرۆکی حکومەت و سەرۆکی پەرلەمان بووە، لەگەڵ چەندان پۆستی دیکەش کە کورد لەرێگەیەوە دەیتوانی گوشار و کاریگەری هەبێت لەسەر ئاڕاستەی پرسە سیاسی و ئابوورییەکان لە بەرژەوەندی خۆی. ئێستا تاکە پۆستی سیادی کە کورد هەیەتی لە بەغدا و دەتوانێت جۆرێک لە کاریگەری سیاسی هەبێت پۆستی سەرۆککۆمارە، کەچی ئەویش خەریکە ئەوەندەی وەک میکانزێک بۆ ململانێی نێوان یەکێتی و پارتی دەبینرێت، وەک بەرژەوەندی و خزمەتی پێگەی کورد لە بەغدا نابینرێت، لە پەراوێزی ململانێی ئەم دواییەی هەڵبژاردنی سەرککۆماری عێراق لە نێوان یەکێتی، پارتی و لایەنە کوردییەکانی دیکەش ئاماژە بە چەند سەرنجێکی خێرا دەدەم لە سەر ئەم پۆستە.
• خەڵک و شەقامی کوردی لە هەرێمی کوردستان ئەوجارە کەمترین گرنگییان بە هەڵبژاردنی سەرۆککۆمار دا، ئەمەش ئاماژەیەکە بۆ نائومێدبوونی شەقامی کوردی لە پێگە و بەهای ئەم پۆستە بۆ کورد لە بەغدا.
• پۆستی سەرۆککۆمار خەریکە لە دەسکەوتێکی سیاسی دەبێتە دەسکەوتێکی بازرگانی و ماددی، بە جۆرێک کە هەر کەسێک ئەو پۆستە وەردەگرێت یەکسەر لەشکرێک لە خزم و دۆست و ئەحبابی لەگەڵ خۆی دەباتە بەغدا، بە چەندەها پلە و پۆست و مووچەی گەورە؛ کە ماوەی سەرۆکایەتیکەشی تەواو بوو بەشێکی زۆری هەمان تیمی خۆی، واتا دۆست و ئەحبابەکانی لەگەڵ خۆی دەبات لە کاری بازرگانی و کۆمپانیاکان بەگەڕییان دەخات.
• سەرۆککۆمار خەریکە چیدی وەک پۆستێک بۆ پاڵپشتی لە پێگەی کورد لە بەغدا تەماشا ناکرێت ئەوەندەی میکانزمێکی ململانێیە لەنێوان یەکێتی و پارتی.
• واباشە لەمەودوا میکانزمێکی کرداری لەلایەن هەرێمی کوردستان بۆ دەستنیشانکردنی سەرۆککۆمار هەبێت، بە جۆرێک کە رێگە نەدرێت سەرۆککۆمار بۆ دوو خول خۆی هەڵبژێرێت، چونکە بەرژەوەندی زۆری بۆ دروستدەبێت بە تایبەت ئامادەیە هەر سازشێک بکات بۆ لایەنە سیاسییەکان و وڵاتانی دراوسێ بۆ ئەوەی لە خولی دووەم دیسان دەربچێتەوە تا وایڵیدێت نەتوانێت هەڵوێستێکی جیدی هەبێت لە کاتی پێویستدا.
• واباشە میکانزمێکی دیکە لەلایەن پەرلەمانی هەرێمی کوردستانەوە دانرێت کە سەرۆککۆمار پێشتر بەڵێنبدات کە بەرژەوەندییە گشتییەکانی هەرێمی کوردستانی لەبەرچاو بگرێت، یان بەڵێننامەیەک یان گرێبەستێکی لەگەڵ حکومەتی هەرێمی کوردستان هەبێت کە هەندێک بنەمای گشتیی نیشتمانی رەچاو بکات کە دووربن لە پڕەنسیپی تەسکی حیزبایەتی و پارێزگاری لە بەرژەوەندییەکانی حکومەتی هەرێمی کوردستان بکات.
• ململانێێ سەرۆککۆمار بەکەمترین زیان لەسەر هەرێمی کوردستان تەواو بوو، واتا نە یەکێتی خۆی بە دۆڕاو دەزانێ و نە پارتیش. بۆیە بە خراپی لەسەر پەیوەندیی پارتی و یەکێتی ناوەستێت. لەوانەشە بەشێکی زۆری یەکێتی ئەو دۆخە ئەگەر بە کرداری ئەوانیش نەبێت، بەڵام بە دڵی ئەوان بێت. بە پێچەوانەوە ئەگەر بەربژێری پارتی دەرچووبایە ئەوا کاریگەری نەرێنی دەبوو لەسەر پەیوەندی یەکێتی و پارتی.
لە کۆتاییدا دەتوانم بڵێم کە ململانێی و عینادیی سیاسی لایەنە سیاسییە کوردییەکان خەریکە پێگەی سیاسی سەرۆککۆماری عێراق بێ بەهاو هەڕاج دەکات، بە جۆرێک کە تەنیا وەک پۆستێکی سیمبوولی و سەرچاوەیەک بۆ دەسکەوت و ئیمتیازاتی کەسی سەیر بکرێت، کە ئەمەش دواجار تەنیا بە زیانی هەرێمی کوردستان دەشکێتەوە، چونکە هەر یەکە لە سەرۆکایەتیی ئەنجوومەنی وەزیران و ئەنجوومەنی نوێنەرانی عێراقیش پێیانخۆشە کە پێگەی سەرۆککۆمار پێگەیەکی لاواز و دەستەمۆ بێت، دواتر لاوازی ئەو پۆستە واتا لاوازی کورد لە بەغدا، بە تایبەت لە پاراستنی دەستوور و جێبەجێکردنی کە کورد لە هەردوو پێکهاتەکانی دیکەی عێراق زیاتر ئیشی پێیەتی. هەڵەیە کە پێمان وابێت پۆستی سەرۆککۆمار پۆستێکی تەشریفاتی و مردووە، بە پێچەوانەوە بەشێکی هەرە زۆری پێگەی سەرۆککۆمار لە پێگەی سیاسی حیزبکەی و کەسایەتی سیاسیی خۆیی و پاڵپشتی هەرێمی کوردستانەوە سەرچاوە دەگرێت. هەرێمی کوردستان و لایەن کوردییەکان هەڵە دەکەن کە ئەم پۆستە وا بێبەها دەکەن و دەیخەنە بازاڕی مساوەماتی سیاسی و ئابووری، چونکە ئەم پۆستە دەکرێت قەلغانی پاراستنی هەرێمی کوردستان و لایەنە سیاسییە کوردییەکانیش بێت لە عێراق. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=