=KTML_Bold=لێکگەیشتنی ناوخۆ وەک پێشمەرجی لێکگەیشتن لەگەڵ بەغدا=KTML_End=
#ئاریان فەرەج#
عەیامێکە سەرۆک #نێچیرڤان بارزانی# دەڵی: تاوەکو زمانێک بۆ لێک تێگەیشتنی هاوبەش لە نێوخۆدا نەدۆزینەوە، ئەستەمە زمانی لێک تێگەیشتن لەگەڵ بەغدا بدۆزینەوە. ئەگەر خۆبەخۆ لەسەر کۆمەڵێک نەگۆڕ و بەرژەوەندیی باڵای نیشتمانی هاودەنگ نەبین، هیچ لایەکمان لە بەغدا نە بۆ خۆی و نە بۆ خەڵکی کوردستان و نە بۆ هاوزۆن! و هاوشاریانی هیچ بەدەست ناهێنێ.
سەرۆکی هەرێمی کوردستان عەیامێکە دەڵێ: مەترسی راستەقینە بۆ سەر مان و ماف و قەوارەمان، لە ئارادان، مەترسی کۆن و تازەیشی هاتوونەتەسەر، هەندێکی ئەنجامی هەڵە و پاشەکشە و کورتهێنانی خۆمان و بەرهەمی دەردە کوردە، هەندێکیشی قەدەری شومی کوردە بەدەست عەقڵیەتێکی مەرکەزیی تێنەگەیشتوو لە چەمکی فیدرالیزم وشەراکەت و بێ ئاگا لە دیموکراتی و فەرهەنگی سەردەم، نەفرەتی جوگرافیا و چاوهەڵنەهاتنی دەروجیرانیش بە کەمترین مافی کورد، لەو لاوە بوەستێ. بۆیەش پاراستنی کوردستان لەو هەموو مەترسییە، لە هەموو کات زیاتر حیکمەت و ئەزمونداری و دیبلۆماسیەتێکی هەتا بڵێی دەستوپەنجەنەرمی دەوێت.
مەترسیی هەڵتەکاندنی نەسیجی کۆمەڵگەی کوردستان ومەحفکردنەوەی قەوارەی هەرێمی کوردستان، لە رێی بێ مووچەکردن و برسیکردنەوە، یەک لە هەڕەشە گەورەکانە کە دەبێ بە هەر نرخێک بێت رێگەی لێ بگیرێ، بە لای دەستەبژێری سیاسیی کورد و حکومەتی هەرێمی کوردستانەوە نابێ هیچ کارێک لەوە لەپیشتر بێت. چونکە هیچ دروشم و پێخۆرێکی مەعنەوی، جێی نان ناگرێتەوە و برسی تێر ناکات. راستە کورد کاتی خۆی بۆ معاش شۆرشی نەکردووە ، بەڵام خۆ بۆ بێ معاشیشی نەکردووە!. بۆیەش لەپێناو بەدەستهێنانەوەی پاروەنانی خەڵک دا دەبووا هەموو رێیەک بگیرێتەبەر، چونکە بێ نانی، مەترسیی دەستهەڵگرتن لە ئازادی و ماف و شکۆ و کەرامەتی لێ دەکەوێتەوە و، هەر ئەوەشە مەبەستی سیاسەتی نانبڕین.
هیممەتی جیدی بۆ رێگرتن لە نانبڕین و چارەی کێشەی مووچە، نەک هەر بە ماڵێکی کوردستانیی لێکترازاوی بێ شیرازە نەدەکرا، بەڵکو ئەو دووبەرەکی و یەکتر تەخوینکردن و یەکتر بەشەیتان کردن و دەستی چەور بەشانی یەکدی سڕینە، نەک هەر بستێکی پاشەکشە بەسیاسەتی نانبڕین پێ ناکرێت، بەڵکو خۆی یەک لە هۆکارە سەرەکییەکانی هاندەری نانبڕینە. قەوانی هەزار بارە و سواوی تۆمەت گۆڕینەوە و یەکدی خەتابارکردنی بێ یەکلاییکردنەوە، تەنانەت لەگەڵ بەغداش بێ سوودە.
عەرەب گوتەنی: دواجار هەر راستی راستە.. بۆیەش دواجار هەر رێگە دروستەکە گیرایە بەر، ئەو رێیەی دەمێکە سەرۆکی هەرێمی کوردستان وەک باوەڕ و ئەرکی نیشتمانیی خۆی بانگەوازی بۆ دەکات، بەم دواییەش نەرم نەرم و بێ هەڵا و زەنا و دەنگ لێوە هێنان لەسەر ئاستی کوردستان و هەروەها لە سەر ئاستی بەغداش لەسەر ئاگرێکی شێنەیی خەریکی کوڵاندنی یەکخستنێک بوو تاوەکو لانی کەم چارەیەکی بەپەلە بۆ بێ مووچەیی بدۆزرێتەوە و ئاهێک بە دەروونی خەڵک دا بێتەوە و ئەوجا دواتر بیرێکی ژیرانە و جددیتر لە چارەیەکی هەمیشەیی بکرێتەوە. چارەیەک بنەماکانی بریتی بن لە: یەکدەستیی نێوخۆیی لێرە لەپێناو پاراستنی مافی میللی لە بەغدا، یەکدی خوێندنەوە لێرە لەپێناو بەدەستهێنانی هاوبەشی لە بەغدا، چارەسەرخوازی و میانڕۆیی لێرە و گواستنەوەی هەمان نەفەس بۆ بەغدا. رەواندنەوەی دڕدۆنگی و ئاساییکردنەوە و بگرە پتەوکردنەوەی پەیوەندییەکانی هەرێمی کوردستان بە هەموو حیزب و لایەنە عێراقییەکانەوە لە بەغدا. رەواندنەوەی مەترسییەکانی دەروجیران و مەترسییەکانی ئەو کێشانە لەسەر کوردستان بە واقیعبینی و بە پێکەوەیی لەگەڵ بەغدا، سەرئەنجامیش دڵهێنانەوەی دۆستانی دەرەکیمان و رەواندنەوەی نیگەرانی و نائومێدییان لە کورتهێنان وهەڵە و کەموکاسییەکانمان. هەر هەموو ئەوانەش سەرئەنجام لەپێناو ئامانجێکی بەرزدا کە ئەویش بەدەستهێنانەوەی ئینتیما و ئومێد و متمانەی خەڵکی خۆمانە بە ئەزموون و حوکمڕانی و بە کایەی سیاسەت و بە ئێستا و ئایندە. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=