=KTML_Bold=چەمکی ئاشبەتاڵ، بۆ داپۆشینی فاشیزم=KTML_End=
ئاسۆ عەبدوللەتیف

بەهای خەرجییە پێشنیازکراوەکان لە بودجەی نوێدا بۆ سێ ساڵی ئایندە، 198 ترلیۆن و 910 ملیار دینارە، کە دەکاتە 153 ملیار دۆلار لە ساڵێکدا، دوو ملیارو پێنج سەد ملیۆن دۆلاری بۆ گەورەکردنی #حەشدی شەعبی#یە و دەنگی لەسەر دراو تێپەڕی و ئێستا حەشدی شەعبی خاوەنی 238 هەزار سەربازی گوێڕایەڵن.

بڕگەی مامەڵەی راستەوخۆی پارێزگاکان لەگەڵ بەغدا کە خاڵی ناکۆکی کورد بوو لە پڕۆژە یاسای بودجە، لەکاتی نیگەرانی پارێزگایەک لە هەرێمی فیدراڵی، ئەوەش تێپەڕی و کۆتایی هات و نرخی یەک بەرمیل نەوت، جۆری برێنت Brent Crude نەک خام Crude-WTI بە 70 خەمڵاندوویانە لە بودجە بۆ ساڵی 2023 و دەی ئێستا نرخەکەی سەروو 80 دۆلارەو هێشتا نایەنەوێت مووچە و قووتی خەڵکی کوردستان بێ کێشەو بێشە بنێرن.

=KTML_Bold=وادیارە کێشەی عێراق لەگەڵ قەوارەی هەرێمی کوردستان نەوت و بودجە نییە ئەوەندەی شکاندنی قودسیەت و ئیرادە و ژێرپێخستنی شوناسی نەتەوەییە=KTML_End=
وادیارە کێشەی عێراق لەگەڵ قەوارەی هەرێمی کوردستان نەوت و بودجە نییە ئەوەندەی شکاندنی قودسیەت و ئیرادە و ژێرپێخستنی شوناسی نەتەوەییە، ئەوەش وەک فۆڕمی دەوڵەتی فیدڕاڵی نوێ بە دەستکاری ئەو نەخشه و جیۆپۆلەتیکەی رابردوو، گەرچی تا ئێستا لە هیچ ناوەندێکی فەرمی نێودەوڵەتی و هەرێمایەتییەوە باسی دەستکاریەکی لەو جۆرە نەکراوە و ئاسان نییە مەگەر هەمواری دەستوریی بۆ بکەن و ئەوەش مەحاڵە کۆمەڵگای نێودەوڵەتی رازی بن.

ئەوەی دەوڵەتی عێراق ئێستا مەبەستیەتی و بە توندی کاری بۆ دەکات و دەستی بۆ درێژکردوە، وەک گەمەکردن بە ناردنی شایستە داراییەکان و بودجە و مووچەی فەرمانبەرانی هەرێم و دەستکاری دۆخی سایکۆلۆژی تاکی کوردیی بەو پرسە هەستیارەوە، بریتییە لەو خەونەی دەوڵەتی قووڵ و چوارچێوەی هەماهەنگی و دەستەی حەشدی شەعبی کاری بۆ دەکەن بە پشتیوانی مەتبەخێکی گەرمی شیعەکان و هەزاران پەیج و میدیا و خودی کۆماری ئیسلامی ئێران و هەندێک گرووپی بچووکی پۆپۆلیزمی کوردیی لەدوای روداوەکانی پرۆسەی ریفراندۆم و 16ی ئۆکتۆبەری 2017.

ڕێک ئامانجەکە گواستنەوە و گۆڕینی سیمای دەوڵەتی فیدڕاڵ و دیموکراتە، بۆ فۆڕمێک لە دەوڵەتی سەربازی ستەمکار و خۆسەپێنی مەزهەبی و ملکەچی شیعە بە پلەی ئیمتیاز، کە موفتی و رابەری باڵا بێت تیایدا، سەدام حسێن لە هۆڵی (خولد) لە ساڵی 1979 چۆن سوکانی سوڵتەی وەرگرت بە ئیمتیاز، فۆڕمی دەوڵەتە لەرزۆکەکەی ئەحمەد حەسەن بەکری گۆڕی بۆ جۆرێک لە فاشیزمی توندی سۆسیالیستیانەی عەرەبی سووننی دژی شیعە و کورد، شیعەکانی ئێستای عێراق دەخوازن هەمان کار ئەنجام بدەنەوە، لێ ئەمجارەیان لە هۆڵی (خولد) نا بەڵکو لە هۆڵی (پەرلەمان) و بە شەرعیەتی زۆرینە و یاساکانی بودجە وەک خەیاڵاتێک بۆ یەکڕەنگ کردنەوەی عێراق.

دروست ئەو هەنگاوانە مومارەسەکردنی دەسەڵاتەکانی دەوڵەتێکی تائیفی شیعیی زاڵ و پڕاگماتیکیانەیە بۆ دەرپەڕاندن و سەرکوتکردنی ڕەنگ و دەنگ و ئیتنیک و نەتەوەکانی تر بەگشتی لە عێراق بەرەو سەپاندنی دیدگای زۆرینەی پەڕلەمانی و مەزهەبی، بەتایبەت هەڵوەشانەوەی قەوارەی هەرێمی کوردستان کە ڕۆژەڤی گەرمەو لە ئەجێنداکەیاندا زیندووە گەرچی لە مادەی 117 و 126 و خاڵی چوارەمی دەستووری ساڵی 2005 بە ئاشکرا دەڵێت نابێت دەستکاری دەسەڵاتەکانی قەوارەی فیدراڵی هەرێم بکرێت و یەک دەستە و هەرێمی جێگیرە.

=KTML_Bold=شتێک نەماوە بەناوی گفتوگۆکردن و دانوستان و سازش، ئەوەی هەیە تەنها بیانووی دەوڵەتێکە داوای ئینتیحار و خنکاندنت لێ دەکات و نکوڵی دەکات لە وجودی سیاسی و کەلتووری و ماف و خواستە داراییەکانت=KTML_End=
دەکرێ بپرسین، دوای ئەوەی هەرێمی کوردستان تەواوی رێککەوتنەکانی واژۆکرد لەگەڵ بەغدا و نەوت و گرێبەستەکانی رادەست کرد بەپێی بنەما دەستوورییەکان و چووە ژێرباری یاسا و بڕیارەکانی دادگای فیدڕاڵی بە دیاریکردنی وادەی هەڵبژاردنی پەڕلەمانی کوردستانیشەوە لە شوباتی 2024 و دەنگیدا بە تێپەڕاندنی بودجە بۆ سێ ساڵ، شتێک نەماوە بەناوی گفتوگۆکردن و دانوستان و سازش، ئەوەی هەیە تەنها بیانووی دەوڵەتێکە داوای ئینتیحار و خنکاندنت لێ دەکات و نکوڵی دەکات لە وجودی سیاسی و کەلتووری و ماف و خواستە داراییەکانت، وادیارە عێراق خۆی بۆ راهێنانی پراکتیکی مەترسیدار ئامادە دەکات بە پشتیوانی ئەو مەتبەخە ئایدۆلۆژییە بەرەو سێنتڕاڵکردنەوەی عێراق بۆ ویلایەتی فەقیە و دەوڵەتی وەلائی و پایەدارکردنی مەرجەعیەت و کۆتایی هێنان بەو دەستوخەت و نەخشەیەی کە ئەمەریکییەکان لەدوای 2003 بۆ عێراقیان کێشا. ئەوەشمان بیرنەچێت دەرکردنی هێزی هاوپەیمانان و ئەمەریکا بڕیاری پەرلەمانی بۆ دەرچوو لە 5-1-2020 دوو رۆژ دوای بە ئامانج گرتنی کوژرانی قاسم سولەیمانی و مەهدی موهەندیس و تا ئێستاش وەک پێویست کاری لەسەر نەکراوە و ناشکرێت.

=KTML_Bold=کورد خاوەنی خەبات و قوربانی و شۆڕشە و بە ئاسانی هیچ هێزێکی تائیفی و فاشیست ناتوانێ بیخاتە دەرەوەی بازنەی مێژووی عێراق و بەرامبەری بوەستێ گەر ئیرادەی گەل زیندوو بێت=KTML_End=
کورد خاوەنی خەبات و قوربانی و شۆڕشە و بە ئاسانی هیچ هێزێکی تائیفی و فاشیست ناتوانێ بیخاتە دەرەوەی بازنەی مێژووی عێراق و بەرامبەری بوەستێ گەر ئیرادەی گەل زیندوو بێت و بتوانین بەرامبەر ئەو ئاڵنگاریانە بوەستینەوە. بەڵام ئەو تایپەی لە ناوخۆی کوردستان چوونەتە پاڵ ئەو پڕۆژە سایکۆلۆژییەی مەرجەعیەت و دەوڵەتی وەلائی، بێ دودڵی دژی قەوارەی هەرێم و ماف و خواستەکانی خەڵکی کوردستان وەستاونەتەوەو وەک سوارەی حەمیدی و مەلای خەتێ و حەسەن خەیری سبەی مێژوو نەفرەتیان لێ دەکات.

حەسەن خەیری دێرسیمی، کە لەدوای روخانی ئیمپراتۆریەتی عوسمانی و ساتەوەختی ژانی لەدایک بوونی دەوڵەتی مۆدێرنی تورکیای کەمالیزم و سەربەخۆیی کوردان لە دوای پەیمانی سیڤەر لە ساڵی 1920 ناوێکی جوان و شۆڕشگێر بوو بەڵام دواتر تەفرەی خوارد بە بەڵێنەکانی دەوڵەت و کەمالیزم، ئەم حەسەن خەیرییە کەنوێنەری شاری دێرسیمی باکور بوو لە پەڕلەمانی تورکیا بەهاندانی مستەفا کەمال ئەتاتورک لەساڵی 1923 و دەوڵەتی فاشیست سەروەختی پەیمان نامەی لۆزان بە وتارێک لە پەڕلەمانی تورکیا خۆی دووچاری مێژوویەکی رەش و نەفرەتلێکراو کردەوە و شکستی بە دەوڵەت و خەونی سەربەخۆیی کوردی هێناو جاڕی ئەوەیدا کە کورد سەربەخۆیی ناوێت و خوازیارن لەناو سنووری جوگرافی تورکیا بمێننەوە، وەک هەمان ئەو کوردانەی ئێستا کە داوا دەکەن هەرێمی کوردستان بەتەواوی هەڵبوەشێتەوەو دامودەزگاکانی رادەستی حەشدی شەعبی بکرێت تەنها بۆ ئەوەی کورد قەوارەی سەربەخۆی نەبێت، ئەوکات کەمال ئەتاتورک بەڵێنی مووچە و ئیمتیاز و خەیاڵاتی زۆری دابوو بەو جۆرە کوردانەی وەک حەسەن خەیری، بەڵام دوای ئەوەی کۆماری نوێی تورکیا گەشەی کردو دامەزرا، زمان و فەرهەنگی کوردیان قەدەغە کرد و ئایسیمیلاسیۆن و قڕکردن و سێدارەو کۆمەڵکوژی کوردیان دەستپێکرد.

=KTML_Bold=ئێستا بەشێک لە کوردانی ناڕازی باشوور و مەندوبانی زۆنی حەشد، کە خەریکی کەڕەنای وەڕزکەرو بێئومێدکەر و گوتاری خۆچەماندنی سەدساڵ پێشی ئێستان=KTML_End=
ئێستا بەشێک لە کوردانی ناڕازی باشوور و مەندوبانی زۆنی حەشد، کە خەریکی کەڕەنای وەڕزکەرو بێئومێدکەر و گوتاری خۆچەماندنی سەدساڵ پێشی ئێستان، بە پارەی خەیاڵی مافیایی نەوت و دزراو بۆ بێهیواکردنی تاکی کوردی و لێدان لەو ئەزموونە دڵخوازەی کوردان، دەخوازن ئەزموونی هەرێم بەدەستی شیعەکان بەو دەردە بچێ، باشە ناپرسن چی ماوە هەرێمی کوردستان یاساییانە و دەستووریانە رادەستی عێراقی نەکردبێت جگە لە کەرامەت و شکۆ و خەونی سەربەخۆیی؟

ئێستا لەناو سەرۆکایەتییە زیندووە فەرمیەکانی عێراقدا کە لەژێر فەرماندەیی حەشد و مەرجەعیەتدایە و خەریکی سنووردارکردنی تەواوەتی دەسەڵاتەکانی ئەم قەوارە کوردییەشن، فەرموو بزانن چیان بەدەستە و کوردیش چی بەدەستە؟

ئەوە دیسپلین و عەقڵییەتی عەرەبییە کاری بۆ کراوە، هیلاک بوون پێوەی، دەتانەوێت هەرێمی کوردستانیش رادەست بکرێت، دەی ئەوکات کێ جورئەت دەکات باسی شوناس و نەتەوە و کوردبوون و مێژوو و قەوارەی هەرێم بکات؟

سوپای عێراق و دەزگا هەواڵگرییەکان و بەرگری و وەزارەتە سیادییەکان لای خۆیانە، بانکی مەرکەزی و دۆلاری کاش و نەختینە و یەدەگی ئاڵتوون و قەواڵە داراییەکان و بودجەو نەوت و پاڵاوگەکان و میناو بەندەرەکانیان لایە، پاسەوانی سنووریان کردە مەرکەزیی و لای خۆیانە بۆ چاودێریی لە زەورەقەکانی فاو هەتا دارگوێزەکانی تەوێڵە، سوپای مەهدی و سەرایا سەلام لەژێر کۆنترۆڵی موقتەدا سەدردایە، حەشدی شەعبی لای مالیکییە بەتەمای ئەوەش نەبن یەک فیشەک دژی یەک بتەقێنن، سوپای میلیشیای عەسائیبی ئەهلی حەق، قەیس خەزعەلیی بەڕێوەی دەبات، میلیشیاکانی بزووتنەوەی نوجەبا و سەربازەکانی مەرجەعیەت، سەربە شێخ ئەکرەم کەعبییە، هێزی بەدر کە محمد باقر حەکیم دروستی کرد ئێستا لای هادی عامرییە بۆ رۆژی رەش، حەشدی شەعبی زیاتر لە 70 فیرقەی میلیشیایی شیعییە و ئێران و دەوڵەتی قووڵ سەرپەرشتی دەکەن و بەیاسای فەرمی پەرلەمانیی بودجەی عێراق بەڕێوە دەبرێن، میلیشیاکانی سەرایای خۆراسانی سەربە عەلی یاسرییە ئیتر با بوەستێ، حیزبوڵڵا و رەبعەڵڵا و سەید شوهەدا و رۆژی دوایی و زولفەقار و عاشوورا و دەیان گرووپ و فیرقەی سەربازی تری ئەو کامپە، ئەوە دیسپلین و عەقڵییەتی عەرەبییە، کاری بۆکراوە، هیلاک بوون پێوەی، دەتانەوێت هەرێمی کوردستانیش رادەست بکرێت، دەی ئەوکات کێ جورئەت دەکات باسی شوناس و نەتەوە و کوردبوون و مێژوو و قەوارەی هەرێم بکات؟

=KTML_Bold=دەوڵەت ناکرێت تەبەننی بکرێت لەسەر رقی مەزهەبی و تائیفی و پەرچەکردارو کاردانەوە=KTML_End=
دەوڵەت و پایەکانی دەوڵەتداری پەیوەستە بە بنەما دەستووریی و یاساییەکان و خەریکە ئەوە لە عێراق وەک سیستم کۆتایی دێت، ئاخر دەوڵەت ناکرێت تەبەننی بکرێت لەسەر رقی مەزهەبی و تائیفی و پەرچەکردارو کاردانەوە، Reaction. ئەو ترس و هەیەجانەی بەرەی پۆپۆلیزمی سیاسی نوێ و مەکینە ئیعلامییەکەیان، ئۆپۆزیسیۆنی ساختە، کاراکتەری نۆکەر، پاڵەوانی وەهمی، مەندوبی کۆیلەی (سوق الرقيق) درووستیان کردووە بەناوی برسێتی و نەبوونی پارە و ئاشبەتاڵەوە لە کوردستان، هیچ نییە جگە لەو گوتارە ئیقلیمی عەرەبی فاشیستییەی کە سەدەیەکە دەیەوێت کورد بکاتە دیل و نۆکەر و کرێگرتە و شوێنکەوتە و دواجار بە شکست کۆتاییهاتووە. [1]