#مەزهەری خالقی#، هونەرمەندی بە ئەزموون و بەناوبانگی کوردستان، بەڕێوەبەری ئینستیتیوتی کەلەپووری کورد لە شاری #سلێمانی#، کە خاوەنی زیاتر لە 200 بەرهەمی تۆمار کراوە بۆ کوردستان 24 دەڵێت: هەتا لە ژیاندا بم خەون و ئاواتم هێشتنەوەی بەزیندوویی کولتووری نەتەوەکەمە.
لە هەڤپەیڤینێکدا لەگەڵ کوردستان 24، هونەرمەند مەزهەری خالقی تیشک دەخاتە چەند کار و بەرهەمە هونەریی و کولتوورییەکانی و دەڵێت: 1500 ساڵە ڕێگری کولتووری و ناسنامەی کورد دەکرێت، بە بەرگری کردن ماوەتەوە.

کوردستان 24: گەڕانەوەت لە دەرەوەی وڵات و مانەوەی چەندین ساڵەت لە کوردستان بۆ گەشتن بەئاواتێک بوو پێی گەشتوون یان نا؟
مەزهەری خالقی: ماوەی بیست ساڵ پێش ئێستا کاتێک هاتمەوە بۆ کوردستان بەو ئاواتە گەشتم کە بڕوام نەبوو بە خەونیش بیبینم، ئەویش خزمەتکردن بوو بە کولتوور و فەرهەنگ و ناسنامەی گەلەکەم، ئەمەش یەک بابەت و دوو بابەت نییە هەزاران و دەیان هەزار بابەت و ئایتمە.

کوردستان 24: بە بڕوای ئێوە کورد ماوەی چەند ساڵ دەبێت ڕێگری کلتوری لێدەکرێت؟
مەزهەری خالقی: زیاتر لە هەزار و پێنج سەد ساڵە باو باپیرانمان ڕێگریان لێدەکرێت لە جێبەجێ کردنی کلتوری خۆیان، داب و نەریت و ناسنامەمان تا ئێستا بە مقاومە و بەرگری ماوەتەوە، دوای ئەو هەموو ساڵە تەنیا شوێنێک بتوانێت بە ئازادانە کار بۆ کۆکردنەوەی کلتوری کوردی بکات ئینستوتی کەلەپووری کوردە.

کوردستان 24: چی بکرێت تا کولتوری کورد بە دنیا بناسێنرێت؟
مەزهەری خالقی: سەرەڕای ئەو هەموو کێشانەی لەلایەن میللەتانی دراوسێ وە بۆیان درووستکردوین لە خۆناساندنی کولتوری، بەڵام بە زیندوی ماوین‌ و دەمێنین و جوهدمان هەیە، ئێمە لە بواری فیلمی سینەمایدا خەڵاتی ئۆسکار وەردەگرین، لە بواری خوێندندا خەڵاتی نۆبڵ وەردەگرین ئەمە سەرەڕای وەرگرتنی دەیان و سەدان خەڵاتی دیکەی جیهانی.

کوردستان 24: کارەکانتان لەئینستودتی کەلەپووری کورد تواو بوون یان نا؟
مەزهەری خالقی: کورد لە دەوڵەتی مادەوە کە دوو هەزار و حەوت سەد و پەنجا ساڵە بوونی هەیە، بە بیست ساڵ کارکردنی من تەواو نەبووە هێشتا کاری زۆرمان ماوە ئێمە دەمانەوێت بچینە قوڵای مێژووی میللەتی کوردەوە، تا بزانین لە کوێوە هاتوین.

کوردستان24: بە بڕوای ئێوە تا ئێستا توانیومانە کولتوری نەتەوەکەمان بە میللەتانی دیکە بناسێنین یان نا بۆچی؟
مەزهەری خالقی: بێگومان نەخێر نەمانتوانیوە کولتوری کورد بناسێنین، زیاتر لە سەد جۆر هەڵپەڕکێمان هەیە تەنیا لە چونە دواوە و هاتنە پێشەوە و نمایشی جل‌ و بەرگ زیاتر چی دیکە دەزانن، ئەی نەوەت و نۆکەی دیکە چی، من سەرجەمیانم لە ئەرشیف هەڵگرتووە تا لەفەوتان بیانپارێزین.

کوردستان 24: چی دیکە دەکەن تا هونەر و موزیکی کوردی لە لەناو چوون ڕزگار بکەن‌؟
مەزهەری خالقی: ئێمە خاوەنی جوانترین گۆرانی و میلۆدین لەسەر ئاستی جیهان، بەڵام ناتوانین بەرهەمی بهێنین، هەوڵدەدەم هونەری کوردی لە نەمان ڕزگار بکەم، ئەو کارە هونەریە ڕەسەنانەی لە کۆندا هەبوون‌ و ماون سەرجەمیان هەڵگیراون و پارێزراون.

کوردستان24: میللەتانی داگیرکەر ئاواز و هونەری کوردیان بردووە بۆخۆیان یان نا ؟
مەزهەری خالقی: میللەتانی دراوسێ سەد لە سەد گۆرانی و هونەری کوردیان بردووە بۆ خۆیان بەتایبەت تورکەکان، باشە هونەر و موزیک گەر حەرامە بۆچی بۆ دەوڵەتی دراوسێ ئازاد بێت بۆ؟، بۆ من ئازاد نەبێت، کاتێک ئێمە هاتین و گۆرانیمان دەوت زۆرجار ڕێگریان لێ دەکردین، بەڵام هاتین و بەرگریمان کرد‌ و بەردەوامیماندا بە گۆرانی وتن.

کوردستان24: کورد خاوەنی فەرهەنگ و کلتورێکی فراوانە لە ڕۆژهەڵاتی ناوەڕاستدا؟
مەزهەری خالقی: لەپاش ئەو شەڕەی تووشمان بوو دوای ڕووخانی ئیمراتۆریەتی ماد، دابەشکراین‌ و نەمانتوانی فەرهەنگ و شارستانییەتی خۆمان بەکرداری جێبەجێ بکەین، دەستنووسی نۆ سەد ساڵ پێش ئێستامان هەیە کورد وەک نەتەوەکانی دیکەی ڕۆژهەڵات خاوەنی گەورەترین فەرهەنگ و کلتوری خۆی بووە هەروەک میسری و چینیەکان و نەتەوەکانی دیکەی چواردەورمان.

کوردستان24: دوا خۆزگە و ئاواتت لە ژیاندا چییە؟
مەزهەری خالقی: دوا ئاوات و خەونم تا لە ژیاندا بمێنم هەوڵدانە بۆ بەزیندوو هێشتنەوەی کلتوری نەتەوەکەم، ئیش و کارەکانم لە ئینسیتیوتی کەلەپووری کورد بە ئەکادیمیا کارەکان بکەین و کەڵچەر و فەرهەنگی کوردی بەزیندووی بهێڵێتەوە و لە فەوتان ڕزگاریان بکەین، وەک جگەر خوێن گەورە نووسەری کورد دەڵێت: کین ئەم، واتا من ئێمە کێین دەمانەوێت ئەوە جێگیر بکەین، کە ئێمە کێین لەم جیهانەدا بەخۆمان و هەموو جیهان بڵێین ئێمە کێین. [1]