بەشێ جە کتېبو ئاوەڎانییەکۍ هۆرامانی
بەشەی چواردەهەمە
هۊرئەوەگېڵنای و ئاماڎەکەردەی: #ئەسعەد ڕەشید#

لېژەدارۍ جە هۆرامان
زمسانو هۆرامانی سەختەن، وەرۋە و واران، تەڕ و تووشی، پېویسش بە ئامرازەکانو گەرمکەردەیۆ هەن، چا یاگە سەختانە و چا دوورە دەسینە، سۊبەو دارا تاکە ئامرازو گەرمکەردەیۆ بېیەن، ئاڎییچ پیویسش بە دارە ۋشکا بېیەن. گلېرکەردەیۆ دارا جە مانگەکا ساڵېنە کە دوانزە مانگۍ و یەرۍ مانگېش زمسانی سەرد و زوقمەن، وشک کەردەیۆشان و دماتەر ڕیز بە ڕیز هۊرچنییەیشان سەرو یۊترینیرە پېسە دیواری جە یاگێ وشکە و دوور جە تەڕی و تووشینە، پېسە گۆڕی یام هەیوانۍ، کار و گرڎ ئا خەڵکەیە بیەن کە چاگە ژیوێنۍ.
هەوارەکۍ هۆرامانی:
خەڵکو هۆرامانی، پېسە نەریت و عادەتێ، جە ئاخرو ئۊخرو وەهارینە، یام سەرەتاو هامنینە، پەی هەوارەکاشان کۊچکەران. ئاژەڵدارۍ و بۍ ئاژەڵېچ بە کەلووپەلێ کەم، کە پۊشاک و چېرخەر و سەرخەر، چەنی قاپ و قاچاخ و حاجەتا، ملا پەی هەوارەکاشا، بەرەو یانەکاشا کڵۊم مڎان، بېخەم جە دزی و یانەبڕیەی، یەرۍ مانگۍ هامنی چاگە گۊزەرناو مەناوە.
ئاژەڵدارەکۍ بە خاترەو لەوەڕگاو هەوارەکاوە، بەروبوومێ ئاژەڵی جە (شۊت و ماس و دۊ و پەنیرۍ)شا هەن، پەی وېشاو پەی هامسا هەوارنشینەکاشا، پېسە یۊی سوودش چەنە وەرگېران، یانی بە شەریکی و بۍ جیاوازی، کە ئانەیچە کەلتوورێ ئینسانین جە وەڵینەکاشاوە پەیشان مەنەنۆ. یانە یام یاگۍ ژیوای دلۍ هەوارەکانە، کېڵەن، کە بە تەۋەنی وەششکەران، یام یاگۍ هەوارنشینە وەڵینەکان، باعزێجشان بە هەژگۍ کەپرە وەشکەران.
باخڎارەکۍ جە هۆرامانەنە، کەمتەر پەی هەوارەکا کۊچکەران، ئاڎۍ دلۍ باخەکاشانە کېڵۍ وەشکەرانو چاگە وەرزو هامنی گۊزەرنان، بە ئامای وەرزو سەردای باربەنی کەرانو بە ڕزقێ فرۆ پەی دەگایەکاشان مەگېڵاوە.
بەهەرحاڵ، هەر دەگێوە جە هۆرامانەنە خاوەنو هەوارگەو وېشەنە، هیچ دەگێوە نییەنە کە هەوارش نەبۊن، هەوارەکېچ مەگنانە یاگێ کە هانە و ئاوشان چەنەن، سەرچەمەو ئاو و هانەکەیچ، ۋەرۋەو کەشەکانە. بەشێ جە کتېبوو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]