دوای ئەوەی سەرکردایەتی یەکگرتووی ئیسلامی بڕیاریدا ئەگەر ئەبوبەکر هەڵەدنی و ئەبوبەکر کاروانی داوای لێبوردن بکەن مافی بەشداریکردنیان لە کۆنگرەی حزبەکە پێدەدرێتەوە، هەردوو ئەندامەکەی یەکگرتوو رونکردنەوەیەکیان بڵاوکردەوە و دەڵێن ئیسلامییەکان نەیانتوانیوە ڕۆڵێکی گەورەتر لەبزاڤی ڕزگاریخوازی کورددا بگێڕن و توانای لە خۆگرتنی ئەو کادر و سەرکردانەشیان زۆرتر بێت کە پەرۆشیەکی نیشتیمانی و نەتەوەیی بەرزتریان لە ئاستی کادرێکی ئیسلامی ئاسایی و فەزا ئیسلامییە تەقلیدییەکە زۆرترە.
دەقی رونکردنەوەی ئەبوبەکر هەڵەدنیئەبوبەکر هەڵەدنی و ئەبوبەکر کاروانیئەبوبەکر کاروانی :
دژ بە تەکفیرکردنی نەتەوایەتیانەی ئیسلامییەکان!
وێناکردنی ئیسلامییەکان لە دەرەوەی ماڵی نەتەوایەتی کوردییەوەو تۆمەتبارکردنیان بەپیاوی ئەم و ئەوو دوژمنایەتیکردنی ئامانج و خواستە نەتەوەییەکان، لە خودی دیدە نەتەوەییە کوردییەکەوە، بە مەترسیدارو تەکفیری مۆدێرن دەزانین ورەتیدەکەینەوە، پێش هەرەشتێکیش هەڵەیەکی مەنهەجیە و پێچەوانەی ناوەرۆک و سرووشت و رۆڵی نەتەوایەتی و پێویستیەکانی گەل و نیشتیمانسازییە لەهەرێمی کوردستاندا.
بە حوکمی ئەوەی ناسنامەی نەتەوەیی لەنێو ماڵی نەتەوەیدا ناسنامەیەکی کۆکەرەوەیە، هەست و ئامانج و ناسنامەی هاوبەش بەکۆی تەوژم و پێکهاتەو ناسنامە فەرعیتەکان دەبەخشێت، نەک بیانکات بەدوژمن وبەگژ یەکتریاندا بکات.
هەربۆیە نەتەوایەتیەک نزیکە ٪20ی کۆمەڵگە وتەوژمێکی بەرچاوی کۆمەڵگە بکاتە ئەودیو سنوورەکانی خۆی و جۆرەها تۆمەتی بخاتە پاڵ، لەجەوهەردا نەتەوایەتی نییە، کێشەیەکی گەورەی نەتەوایەتی کوردیش لە مێژووی هاوچەرخی خۆیدا، لە سۆنگەی لاوازییەکانی و شێوانی پەیام و ناوەرۆکەکەیەوە هەر لەم خاڵەدا بووە، واتە یەکتر تۆمەتبار کردن بە خیانەت و و خۆفرۆشی و نانەتەوەیی بوون لە روانگەی بەرژەوەندی حیزبیی وناوچەیی وجیاوازی ئایدۆلۆژییەوە .
ڕاستە ئیسلامییەکان لەرووی نەتەوەییەوە هاوشێوەی خودی نەتەوەییە مێژووییەکان، کێشەی خۆیان هەیە، بەڵام کێشەکەیان، خۆنەگونجاندن لەگەڵ واقیعی نەتەوەیی کوردستان و داخوازییەکانی نییە، چونکە ئامانجە نەتەوەییەکانی قۆناغەکەیان لە پرۆگرامی خۆیاندا گوونجاندووە، بە کردەوەش بەشێک بوون لە کێڵگەی نەتەوایەتی کوردستان، هیچ دەرفەتێکیش بەهۆی ئیسلامییەکانەوە لە کیس کورد نەچووە، لە کاتێکدا چەندین دەرفەت بەهۆی ناکۆکی و شەری ناوخۆو خراپ بەکارهێنانی دەسەڵاتی هێزە خۆ بەنەتەوەیی پێناسە کردووەکانەوە، لە دەست کورد چووە.
پێشمان وایە ئەگەر پرۆژەیەکی نەتەوەیی جددی بۆ ئاستی سەربەخۆیش لەئارادا بێت، ئیسلامییەکان نەک نابن بەرێگر، بەڵکو پشتیوانیشی لێدەکەن.
کێشەی ئیسلامییەکان ئەوە نییە بایەخ بە کێشەی کوردی نادەن،بەڵکو ئەوەیە، کەنەیانتوانیوە لە قووڵایدا بە گوێرەی پێویست خۆیان بینا بکەنەوە بۆ ئەوەی تەموحی پێشەنگیان هەبێت و رۆڵێکی گەورەتر لە بزاڤی رزگاریخوازی کوردستانیدا بگێڕن، تووانای لە خۆگرتنی ئەو کادرو سەرکردانەشیان زۆرتر بێت کە پەرۆشیەکی نیشتیمانی و نەتەوەیی بەرزتریان لە ئاستی کادرێکی ئیسلامی ئاسایی و فەزا ئیسلامییەتەقلیدییەکە زۆرترە. رەخنەیەکی تریشمان لێیان ئەوەیە وابیر دەکەنەوە سەنەوی نەتەوەیی بە ناوی ئەوانەوە نییەو پێویست ناکات هەوڵی ئەوەبدەن رۆژێ لە رۆژان رابەرایەتی ناسیۆنالیزمی کوردی بکەن و وزەو گەنجێتی پێببەخشنەوەو بۆشایی ئەوانیتر لەم روەوە پڕ بکەنەوە.
لەروویەکی ترەوە لە سۆنگەی لاوازی راگەیاندن و هەژاری زمانی سیاسیانەوە ناتوانن بە گوێرەی پێویست گووزارشت لە واقیعی خۆیان بدەنەوە، ناشتوانن سوود لەوکادرو سەرکردانەیان وەربگرن کە بەگیانە ئیسلامییە کوردەوارییە کەیان وئامادەبوونیان لەجەرگەی پرسە نەتەوەیی ونیشتیمانییەکاندا بوونە رەمز یاخود لانیکەم پەنجەیان بۆ رادەکێشرێت. لەهەموو حاڵەتێکدا ئیسلامییەکان کۆمەڵێ کچ وکوری ئەم وڵاتەن وگوومانکردن لەئینتیمای نەتەوەییان ناراستە، گەر سەرکردەو پرۆژەیەکی نەتەوەیی مێژوویی گەورەش هەبێت، دەتوانن بەچەندین شێوە سوودیان لێوەربگرنزۆر زیاتر لەئێستا بیانخەنە خزمەت ئامانجەکانیانەوە.
ئەبوبەکرکاروانی. ئەبوبەکر هەڵەدنی
24-12-202424-12-2024
[1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!