میدیا -هەولێرهەولێر:
غەفوور مەخمووریغەفوور مەخمووری سکرتیرى گشتیى یەکێتى نەتەوەیى دیموکراتى کوردستانیەکێتى نەتەوەیى دیموکراتى کوردستان YNDK ، لە پەیامێکیدا بۆ ڕاى گشتى، بەتوندى هێرش و ڕەفتارەکانى سوپاى داگەرکەرى ئێراقى بۆ سەر جوتیارانى سەرگەڕان و شەناغەو چەند ناوچەیەکى پارێزگاى کەرکووک ئیدانەو شەرمەزار کردووە و، ڕەفتارەکانى سوپاى ئێستاى ئێراقى بە ڕەفتارەکانى سوپاى بەعسبەعسى ڕووخاو چواندووەو دەڵێت: (ئەم ڕەفتارەى سوپاى داگیرکەرى ئێراق هەمان ڕەفتارى سوپاى ڕژێمى ڕووخاوى بەعسە).
مەخموورى لە پەیامەکەیدا دواى یەکریزى و یەکدەنگى لەلایەنە کوردستانییەکان دەکات بۆ ڕووبەڕووبوونەوەى سیاسەت و ڕەفتارە نابەجێکانى حکومەت و سوپاى ئێراق، ئەمەش دەقى پەیامەکەیە:
بۆ ڕاى گشتى
-گەلى خۆڕاگرى کوردستان ...
-هێز ولایەنە سیاسییەکانى کوردستان ...
ئەو ڕاستییە بەبیر هەموو لایەک دێنینەوە، کە ئەزموونى زیاتر لە سەد ساڵەمان لەگەڵ عەرەبى ئێراقدا؛ ئەزموونێکى تاڵە، لەماوەى سەد ساڵى ڕابردوودا تەواوى دەسەڵاتەکانى ئێراق دژى کورد بوون و هەوڵى لەناوبردنى کوردستانیانداوە بەخاک و خەڵکەوە، دەسەڵات و شەقامى عەرەبى ئێراق هاوڕاو هاوکاربوون لەو دژایەتییەدا (جگە لە چەند کەساتییەک نەبێ)، تەواوى دەسەڵاتدارانى ئێراق لە بەرانبەر کورددا یەک لە یەکتر خراپتر بوون، دەسەڵاتى ئێستاش لە هەموویان خراپتر و زالمتر.
بەداخەوە سوپاى داگیرکەرى ئێراق جارێکى دیکە دژایەتى خۆیان بەرانبەر گەلى کوردستان نوێکردەوە و، ئەمڕۆ دووشەممە، ڕێکەوتى 17-02-202517-02-2025، هێرشیانکردە سەر جوتیارانى سەرگەڕان و شەناغە، ئەم ڕەفتارەى سوپاى داگیرکەرى ئێراق هەمان ڕەفتارى سوپاى ڕژێمى ڕووخاوى بەعسە، درێژەپێدانى هەمان سیاسەتى بەعەرەبکردن و ئەنفالکردنى کوردستانە، ئەم ڕەفتارەى سوپاى داگیرگەرى ئێراق ئەو ڕاستییە دەسەلمێنێت کەوا دەسەڵاتدارانى ئێراق وەک هەمیشە دژە کوردن و یەک لە یەک زالمترن بۆ گەلى کوردستان، لە مێژووى بەشەرییەتدا لە دەسەڵاتدارانى ئێراق زاڵمتر و بێنمەکتر نەبووە و نییە، ئێمە لە یەکێتى نەتەوەیى دیموکراتى کوردستان YNDK دژى ئەو ڕەفتارەو تەواوى ڕەفتارەکانى سوپاى داگیرکەرى ئێراق دژ بە گەلى کوردستان دەوەستینەوەو زۆر بەتوندى ئیدانەو شەرمەزاریان دەکەین و ڕەتیاندەکەینەوە، لە هەمان کاتدا پشتیوانى تەواوى خۆمان بۆ جوتیارانى سەرگەڕان و شەناغە و تەواوى جوتیارانى ناوچە داگیرکراوەکانى کوردستان ڕادەگەیەنین و، ئامادەین بۆ بەرگریکردن لێیان و بۆ گەڕانەوەیان بۆ سەر موڵکى خۆیان.
-جەماوەرى خۆڕاگرو وڵاتپارێزى کوردستان ...
وەک لاى هەموو لایەکمان ڕوونە دەسەڵاتدارانى عەرەبى ئێراق بە سوننە و شیعەوە زۆربەى هەرەزۆریان لە دژى کورد یەکهەڵوێست و یەکدەنگن، مێژووى سەد ساڵەمان لەگەڵ عەرەبى ئێراق دەیسەلمێنێت کە هیچ کات دەسەڵاتدارانى عەرەبى ئێراق دۆستى کورد نەبوونە و دۆستى کوردیش نابن، ئیدى بەسە با فێڵ لە خۆمان نەکەین و کات بەفیڕۆ نەدەین، با لە جیاتى خەریک بوون لەگەڵ بەغدا بەیەکگرتووى بەگژ ئەو سیاسەتە شۆڤێنییەى عەرەبى ئێراق دابچینەوە، لەم پێناوەدا پێویستە هەموو لایەکمان بۆ یەکڕیزى و یەکدەنگى و هاوهەڵوێستى کاربکەین، بۆ ئەمەش بێگومان ئەمڕۆ باشترە لە سبەى .
لە ڕەوشێکى وادا؛ بانگ لە سەرکردایەتیى سیاسیى کوردستان دەکەین کەوا بڕیارى یەکلاییکەرەوەى خۆى بدات و چیتر ئەو ناعەدالەتى و بەسووکسەیرکردنەى ئێراق قبووڵ نەکات و تەواوى کارمەندو بەرپرسە بێدەسەڵاتەکانى کوردستان لە بەغداى عەرەبى بکێشێتەوە و بیانگەڕێنێتەوە کوردستان، لە هەمان کاتدا پێویستە بە هەموو لایەکمان هەوڵبدەین ناوەندى پەرش و بڵاوى سیاسیى کوردستان ڕێکبخەینەوەو چەترێکى هاوبەش بۆ کۆکردنەوەى لایەنە سیاسییەکانى کوردستان پێکبهێنین و هەموو لایەنە سیاسییەکانى کوردستان لەژێر ئەو چەترەدا کۆببینەوەو هیچ لایەک پەراوێز نەخرێت و، لەوێوەوە کار بۆ یەکڕیزى و یەکدەنگى بکەین، بێگومان هێزى ئێمە لە یەکڕیزى و یەکدەنگیماندایە، هەر کاتێک یەکڕیزو یەکدەنگ بووبین بەهێزبووین؛ هەر کاتێکیش پەرش و بڵاوبووبین ناحەزان سوودیان لەو پەرش و بڵاوییە وەرگرتووە وەک ئێستا، بۆیە پێویستە لەم پێناوەدا هەموو لایەکمان هاوکار و پشتیوانى یەکدى بین و جلى تەنگى حزبایەتى فڕێبدەین و جلى کوردایەتى لەبەرخۆ بکەین و، هەروەها پێویستە لەسەر هەموو ئاستەکاندا بەخۆماندابچینەوەو کەڵک لە هەڵەکانى ڕابردوومان وەربگرین، جارێکى دیکە لێرەوە داوا دەکەین کەوا هەموو لایەکمان کاربکەین بۆ:
1-ڕێکختستنەوەى ناوەندى سیاسى کوردستان و پێکهێنانى چەترێکى هاوبەش، کە تەواوى لایەنە سیاسییەکان بگرێتەخۆ.
2-داهاتى کوردستان ڕێکبخەینەوە و، بۆ ئەم مەبەستە خەزێنەیەکى نیشتمانى بەناوى (سندوقى داهاتى کوردستان) دابمەزرێنین، بۆ ئەوەى چیتر چاومان لە دەستى بەغدا نەبێت و، بەپێى داهاتى مانگانەى کوردستان مووچەو شایستە داراییەکانى فەرمانبەران و پێویستییەکانى کوردستان دابین بکرێت.
3-لێژنەیەکى باڵاى دیبلۆماسى لە هێزە سیاسییەکانى کوردستان پێکبهێنرێت بۆ ئەوەى پەیوەندى بە ناوەندە نێودەوڵەتییەکان بکات و زولمەکانى ئێراق بەرانبەر گەلى کوردستان بگەیەنێتە هەموو لایەک، ئەمەش وەک پاڵپشتییەک بۆ پەڕڵەمان و حکوومەتى کوردستان.
4-پێکهێنانى بۆردێک بەناوى (بۆردى سەربەخۆیى کوردستان)، بۆ ئەوەى ئەنجامى ڕیفڕاندۆم بجوولێنێت و لەسەر ئاستى نێودەوڵەتیدا کارى بۆ بکات.
-سەرکەوێ ئیرادەى هەقخوازانەى گەلى کوردستان.
-نەمرى و سەربەرزى بۆ تەواوى شەهیدانى ڕێى سەرخۆبوون و ئازادى کوردستان.
-بێتەدى ئازادى و سەربەخۆیى کوردستان.
-مردن و ڕووڕەشى بۆ دوژمن و ناحەز و داگیرکەرانى کوردستان
غەفوور مەخموورى
سکرتێرى گشتیى
یەکێتى نەتەوەیى دیموکراتى کوردستان YNDK
17-02-2025. [1]

تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!