ناونیشانی بابەت: فەلسەفەی نەورۆز و بەهار لە کوردستان/ بەشی یەکەم
ئامادەکردنی: #عەزیز مورادی#
نەورۆز گەورەترین جەژنی نیشتمانیی کورد و دەستپێکی ساڵی نوێی کوردییە لە کوردستان. نەورۆز لە کوردستان بە (ئاگری شایی)، (گوڵوەس) و (جەژنی سوڵتان)یش ناسراوە و مێژووی بۆ هەزاران ساڵ بەر لەئێستا دەگەڕێتەوە. بیروبۆچوونی جیاواز لەبارەی جەژنی نەورۆزەوە هەیە، کە ناسراوترینیان چیرۆکی کاوەی ئاسنگەر و زوحاکە.
#کاوەی ئاسنگەر#؛ کەسایەتییەکی پێنج هەزار ساڵەیە لەناو ئەفسانە و مێژوو و ئەدەبی زارەکیی کورددا. کاوە لە شانامەی کوردی و شانامەی فارسی وەکوو کورد ئاماژەی پێ کراوە. لەو سەردەمەدا کوردستان لە لایەن کەسێکی زاڵم بەناو زوحاک و دارودەستەکەی داگیر دەکرێت و زوڵم و زۆرداری لە وڵات بڵاو دەبێتەوە. کاوەی ئاسنگەر شۆڕشێک لەپێناو ئازادیخوازی و رزگارکردنی گەلی کورد لەژێر چنگی ئەو زاڵمە بەرپا دەکات و وڵات لەو نەهامەتییە رزگاری دەبێ، بۆیە کورد هەموو ساڵێک لەسەرەتای بەهار، ئەو سەرکەوتنە بە شایی و هەڵپەڕکێ و ئاگرکردنەوە پیرۆز دەکات.
لە ئەفسانە و چیرۆکە کوردییەکانیشدا هاتووە: چوار هەزار ساڵ بەر لە زایینی مەسیح، (کی مورس)، یان (کەیومەرز)، پیاوێکی دادپەروەر و ئازا بووە، لەسەر چیاکانی #رواندز# لەگەڵ ئەهریمەن، کە دوژمنی ئازادی و یەکسانی بووە دەکەوێتە شەڕ و بە سوپاکەی دەڵێ (ئەگەر لەم شەڕەدا سەرکەوتین، لەسەر شاخ و داخەکانی وڵات ئاگر بکەنەوە، تا هەم ببێتە نیشانەیەک بۆ خۆشی و شایی و هەم ببێتە فەرمانێک بۆ گەڕانەوەی سوپاکەمان لەسەر کێو و شاخەکان). کەیومەرز دواجار ئەو جەنگە دەباتەوە و لەسەرشاخەکان ئاگری سەرکەوتن دەکەنەوە، کە تا ئێستا بە ئاگری شایی و نەورۆز ناسراوە.
بەهاری کوردستان چەندین نەریت و رێوڕەسمی لەخۆ گرتووە، وەکوو (میری نەورۆز) ، (هەلاوە مەلاوە)، (سێزدە بەدەر)، (#چوارشەممە سوورە#) و (#جەژنی نەورۆز#). دوایین چوارشەممەی ساڵ بە (کوڵە چوارشەممە) یان چوارشەممە سوورە ناسراوە، کە تێیدا خەڵک لە ماڵەکان نامێننەوە و دەچنە سەرشەقام و کۆڵانەکان، یان روودەکەنە سروشت و کەژوکێو.
بەهاری کوردی لە بەشێک لە ناوچەکانی رۆژهەڵاتی کوردستان مانگێک بەر لە نەورۆز دەستپێدەکات. هۆکارەکەیشی بۆ ئەوە دەگەڕێتەوە، کە لەو ناوچانەدا گەرما زووتر دەستپێدەکات، بۆیە خەڵکەکەی پێشوازیکردن لە بەهار پێش دەخەن، تا خۆیان ئامادە بکەن بۆ کوچکردن و رووبکەنە هەوار و چیاکان. خەڵکی ئەو ناوچانەی زووتر بەرەوپیری بەهار دەچن، زیاترینیان خاوەن مەڕ و ماڵاتن و خەریکی شوانکارەیین.
لە رۆژی 5ی مانگی رەشەمەی هەموو ساڵێک، واتا 25 رۆژ بەر لە نەورۆز و هاتنی ساڵی تازەی کوردی، نەورۆزێک بەناو نەورۆزی (چەشمیەر) بەڕێوە دەچێت. ئەم نەورۆزە لەم ناوچەیە بە (شەوی بەرات)یش ناسراوە. #چەشمیەر# گوندێکە سەر بە باژێری سەوڵاوا لە پارێزگای #سنە#. جیا لە گوندی چەشمیەر، خەڵکی گوندەکانی دێوەزناو و پاڵنگانیش بەر لەهاتنی نەورۆز پێشوازی لە بەهاری کوردی دەکەن. ئەم پێشوازییە لە بەهار وایکردووە ژمارەیەکی زۆر لە دانیشتوانی ناوچەکانی دیکەی رۆژهەڵاتی کوردستان و گەشتیارانی ئێران و دەرەوەی ئێران بەشداریی لەو جەژنەدا بکەن.
#پاڵنگان# سەر بە باژێری #کامیاران#ە و گوندێکی گەشتیارییە، کە رێوڕەسمی نەورۆز و پێشوازیکردن لە بەهاری کوردی لەو گوندە لە ئێران و رۆژهەڵاتی کوردستان دەنگی داوەتەوە. لە ناوەندی ئەم گوندە و لەسەر شاخە بەرزەکان، ژمارەیەک ئاگری گەورە دەکرێتەوە. شایی و هەڵپەڕکێ بەشێکی دیکەی ئەم نەریتەیە، کە هێمایە بۆ تەبایی و یەکگرتوویی گەلی کورد و یەکسانیی ژن و پیاو.
لەم جەژنەدا دەنگی ساز و دەهۆڵ تێکەڵی حیلەی ئەسپەکان دەبێ، تا سوارچاکەکان بە ئەسپەکانیان گوڕی زیاتر بە جەژنەکە ببەخشن و پەیامی ئاشتەوایی و ژینگەپارێزی و خۆشەویستیی خاک و نیشتمان دووبارە بکەنەوە.
نەورۆز و بەهاری کوردی لە شیعر و ئەدەبی کوردیشدا رەنگی داوەتەوە و زۆرن ئەو هونەرمەندانەی بەهاتنی ساڵی نوێ و بەهاری کوردی وەک کەو و بولبول دەچریکێنن و گەروویان پڕ دەکەن لە شیعری شاعیران، بۆ نموونە #پیرەمێرد#ی شاعیر سەبارەت بە نەورۆز ئەم شیعرەی نووسیوە و دواتر بوو بە سروودی نەورۆز و چەندین گۆرانیبێژ بە دەنگی زەڵاڵیان گوتوویانە، بەتایبەت #حەسەن زیرەک# مۆرکێکی کوردانەی پڕ هەستی بە شیعرەکە و سروودی نەورۆز داوە و هەر کاتێک نەورۆز دێتەوە، ئەم سروودە و زیرەک لە پێشوازیدا دەبن:
ئەم ڕۆژی ساڵی تازەیە، نەورۆزە، هاتەوە
جەژنێکی کۆنی کوردە بەخۆشی و بەهاتەوە
چەند ساڵ گوڵی هیوای ئێمە پێ پەست بوو تاکو پار
هەر خوێنی لاوەکان بوو گوڵی ئاڵی نەوبەهار
ئەو ڕەنگە سوورە بوو کە لە ئاسۆی بڵندی کورد
مژدەی بەیانی بۆ گەلی دوور و نزیک ئەبرد
نەورۆز بوو ئاگرێکی وەهای خستە جەرگەوە
لاوان بە عەشق ئەچوون بە بەرەو پیری مەرگەوە
وا ڕۆژ هەڵات لە بەندەنی بەرزی وڵاتەوە
خوێنی شەهیدە ڕەنگی شەفەق شەوق ئەداتەوە
تا ئێستە ڕووی نەداوە لە تاریخی میللەتا
قەڵخانی گوللە سنگی کچان بێ لە هەڵمەتا
پێی ناوێ بۆ شەهیدی وەتەن شیوەن و گرین
نامرن ئەوانە وا لە دڵی میللەتا ئەژین
کوردستان وەکچۆن سروشتەکەی بەدرێژایی ساڵ رەنگینە، دابونەریتەکەیشی پەلکەزێڕینەیەکی رەنگاوڕەنگە، کە بەگوێرەی وەرزەکان رەنگی دەگۆڕێ. لەگەڵ نەمانی سەرماوسۆڵە و هاتنی نەورۆز، جەژن و بۆنەکانی کوردستان دەستپێدەکەن. ئەگەرچی جەژن و بۆنەکان لە ناوچەیەکەوە بۆ ناوچەیەکی دیکە دەگۆڕدرێن، بەڵام هەرکامەیان تابلۆیەکی رەنگاوڕەنگە بۆ کوردستان.
ئامادەبوانی جەژنی نەورۆز، دوای چڕینی سترانی نەورۆز دەست دەکەن بە هەڵپەڕکێ و شایی، کە یەکێکە لە هێماناسراوەکانی کولتوور و فەرهەنگی گەلەکەمان.
هەڵپەڕکێ نمایشکردنی شوناسی کوردە لەناو جەژن و فێستیڤاڵەکاندا. بۆنە و جەژنەکان بە بێ هەڵپەڕکێ و جلوبەرگی کوردی ناتوانن تابلۆیەکی کوردانە نمایش بکەن.
هەڵپەڕکێ لە زمانی کوردیدا بە مانای هەڵپەڕین و لە زەوی بەرزبوونەوە، یان لە زەوی بڕانە؛ بۆیە تەنیا سەمایەکی سادە نییە، بەڵکوو مانەوەیە لەنێوان ئەرز و ئاسماندا.
لەناو هەڵپەڕکێی کوردیدا، چوار هێما هەیە، کە هەرکامەیان مانایەکی تایبەتی هەیە:
- بادانی چۆپی، هێمای ئازادییە.
- هەڵپەڕین و پێکوتانە سەر زەوی، هێمای خۆشەویستیی نیشتمانە.
- بوونی ژن و پیاو، هێمای یەکسانیی ژن و پیاوە لەناو کۆمەڵگەی کوردیدا.
- دەستگرتن، هێمای یەکێتی و خۆشەویستییە.[1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!