پاسکیلەکەو فامەی
ئی پاسکیلە مەڕیا بئ سەرپەرستەم دی، کۆتانێ یاڎو پاسکیلەکەو فامەی، (کناچەزاو لالو نالەی) جە شوشمئ.
من دەساڵیوم بئ چەنئ خاتو ئەڎێم لوایمئ پێ یانەو لالو ناڵەی جە شوشمئ، بە نیازو سەردانو دوکۆتۆری جە نۆسوڎە.
لالو نالە (کە بە قۆمی بە ئەڎێم یاوئ)، کوچشا مڵکەنە بئ، حەر ئۆڎیمو ملەکەو شوشمئ، بە دەسەڕاسەرە، باخیوی سەرسۆزو پڕسەمەرو باسەفا بئ، بە ئاوەو شاجووی -کە تەویڵیوە ئەیی، ئاوی دریی.
پاسکیلەکەو فامەی پەشتەو کوگاکیشانە، تەڵانەو هەنجیرەکانەبئ، بیناز و بیساحیب پێسەو ئینەیە کۆتەبئ ڕوەرە. پاسە بزانو ئاییچ خەلەلیوش چەنە بئ.
فرە حەز کەرینئ فامە چاگە بیێ تاکو پیوەرە دەسکارییوما کەرڎەبیێو، سا بەشکوم بە کارو سواربییەی ئامابیێ.
من یەکەم جارم بئ پاسکیلم جە نزیکۆ دیەبی، نامەکیچش حەر دەمو ئا هەرزەکاراوە ئەژنیی بی کە بە کاروان لوینی پێ هەڵەبجەی پێ هەنگور و ساو ورەتەی.
بە تەنیا پەنەم عێب بئ کە ساحیبەکەش نە بوو چاگە دەسکاریم کەرڎەبیێ، وەیا حەر نزیکچش کۆتەبیێنێ.
ئا دوە یەرە ڕوە چاگە بینمئ بە تاسەوە چەمەڕوان بینئ کە سا بەڵکوم یانەو فامەی بەیا پێ باخی، تاکو لانی کەم فامەی وینو و بژناسو (کە من هەر دەمو لالو نالەیۆ نامیم ئەژنیەبئ). بەڵام بە داخۆ نە فامە ئاما پێ یانەو بابایش وە نە منیچ حەتا ئامایمێ توخنو پاسکیلەی کۆتا.
- ئی سەفەرەمە بە دریژتەر، جە ویرەوەریەکامەنە بەشو (سەفەرو نۆسیڎی)نە باس کەرڎەن (بیجگە) ئی باسو پاسکیلەیە.
فاروق سان ئەحمەڎ.[1]