چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و یەرەمە
ڕۊنامەی نویستەبې: مستەفا خۆشناو، محەممەد مەحموود قودسی، خەیروڵڵا و عیززەت عەبدولعەزیز، کە چوار ئەفسەرې بېنې و لوێ پاڵو بارزانی پەی یاردیدایش، حوکمو ئیعدامیشان دریان. ئیتر ڕێستووران هەر جمەش ئې. کوردې بەغڎا و سلېمابی پەی ڕزگارکەرڎەیشان مەکۊشییان و چاگە گلېرې مەبیېنێ. پەنانە گۊشقۊڵاخ بېنا بزانوون چېش بییەن؟ ئاخری هەر دریێ قەنارەو لاشەکېشا بەردێ پەی ماواو ئامای دنیایشان. منیچ هەر ئاڼەم پەنەکریا پەنێوەنە چن هەڵسێم مجورە.
جاری چامنە بې جە ڕیستورانۆ واردە بەرېنا پەی ئوتێلانی، جارێشا کەبابم بەرد پەی شېخێ عەرەبی کە نامېش عەبدوڵڵا یاسین بې؛ جە شېخە هەرە زلەکانو میانو کووت و عەمارەی، کەبابو سلېمانیش فرە لاوە وەشبې. ڕۊی دمایین داواش کەرڎەبې؛ پەیم بەرد. هەڵای نەنیابېم وەردەمش، قاچېم گېریێ یۊی و گلېرانې و قاپ مەڕیا و کەباب پاگەرە پژگیا. حیرسی گېرتاو فرەیچ تەرسانې، هەڵسی زیێنە چەمام. واتش: گۊش نمەڎە. تەلەفوونش کەرد کە ئاڎ قاپەکەش ماڕان، دوې دینارېش پەی کیاست؛ نیم دیناریچ بەخشانەش دا بە وېم، ماچۊ: گەر مەبینە خزمەتکارم و سارانە مەژیوی، ژەنیت پەی ماروون، سیایانەت پەنە مڎەو، گرڎ مانگێچ دە دینارې هەقت ئینا لاو منۆ.
واتم: چەنی نمەو؟ دەسېچت ماچې کەروون؛ ژەنیچم گەرەکە نییەنە، خوڎا پایەدارت بکەرۊن.
ماچۊ: دەیجا سەوای سەعات شش بۊ پەی ئوتیلې.
شەوې وەشیېنە نەزانېنا وەرم چېشەن، شڕە و نمەڎم پېتۆ، چەنی شېڕەو مەڵڵا ژەنې، کۆڵەپەشت سەرو شاناوە، دلېبەرەو ئوتێل (شط العرب) مدرانې و نیم سەعات مەلەرزېنا تاکو شېخ تەشریفش ئاما بەر، یاتاخەکەشا سەرو ئوتومبیلیۆ پەی گېرتانېرە.
ماچۊ: خۊ مزانی کەبابم پەی وەشبکەری؟
واتم: نا، چەنی داخې، بەڵام گرڎ هەرمانێ مەکەرون.
ماچۊ: شڕەو مڕەش پەی فڕەدەیدێ، ئەجیام کەبابو سلېمانی مەزانی.
بە هەناسە سەردی گېڵانێ پەی دلې جەحەڼەمەکەو وېم و نەزانېنا چەنی جوابو خەڵکی بڎەوە.
یانەو مام حسێنی ڕێستورانتەکۆ چارەکە سەعاتێ دوور بې، نیمەڕۊنە ناچاریې لوېناوە پەی ئاگەی و ئاوی مەکەرېنا وېمەرە و خەیلێ مەکېشیېنا. ڕوێشا ڕامەنە تووشو کۊگێوە کتېب ورەتەی بییا کە گرڎو کتېبەکاش باسو ئایینو خاچپەرەسی بې. تەختەنەخشێ (تابلۊ) دریابې پەنجەرەکەی: (ڕۊژنامە وانایۆ بە بەلاش)، بەخوڎا خاسا! بابلو. کابرێوە پیری هەشتا نەوەڎ ساڵە، لووت خڕی سوور، گۊش پان، سەرو کورسیێوە قوت بییەبێ، یاگېش نیشان دانې. دوې جوانې عەرەبېچش چەنەبېنې، چڼگەم کەرڎە ڕۊنامەیرەو بە وەشحاڵیۆ مەڎیېنېش پۊرە، واتم ئیسراحەتو نیمەڕۊیم چېگە گوزەرنون. بڕێ تەختەنەخشې دیوارەکۆ بېنې، دلېشانە نویسیابې: (گەر مجادەلەی دینی مەکەردې هەرگیز تووڕې نمەبیدې! بە زوانی نەرم و شیرین یۊترینی بڎۊندې). کابرا کە پەی خېرئامای دۊنانېش ماچۊ: بە لەهجەتا پاسە دیارەن عەرەب نییەنی، واتم کوردەنان.
بە کورڎی ماچۊ: فرە خاستەر، من سی ساڵې جە سابڵاخ و دە ساڵې جە تەورېز ژیوانا، بانگو ئایینو مەسیحیم دان، ئیسەیچ ئانا خەریکو هورگېڵنای کتېبێنا کە بە فارسی وەڵام کەرڎەنۆ و مەفاڕوش پەی عەرەبی، خۊ فارسیچ مزانی؟
واتم: پەی چېشی مەپەرسی، کەمێ مزانو.
ماچۊ: با باعزێت پەی بوانوە.
واتم: بە خوڎا من ئامانا ڕۊنامە بوانوە.
ماچۊ: نا، هەر مەبۊ گۊشم پەی بگېری، ئیسفاڎەش فرەن.
ملێم لار کەردۆ:
واتم: بەڵې بفەرماوە! بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]