چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و پەڼجەمە
دلې ڕیستورانەکەینە قاقەز پەی هەرمانبەرەکا مەنویسېنا، ئاڎیچې تېخو ڕیش تاشای و سابوونم پەی پېڎا مەکەرېنې: پەکەم سەرو ئا دوەیە نەکۆتېبې. ڕوێشا کرېکارێ کە چن جارێ نامېم قاقەزم پەی نویستەبې ماچۊ: بۊ سەرو حیسابو من لوە پەی لاو قاحبێوە!
واتم: چڼش مشۊنە؟
ماچۊ: نیم دینار
واتم: کاکە ڕوبعە دینارێم دەپەنەو نمەلو.
ماچۊ: سا بە خوڎا نەلی یەک فلست نمەڎەو!
پەنەم سەیر بې؛ چەنینەن پاسە پەی هەرمانې خرابې ئەپاسە دڵ فراوانې و پەی هەرمانې خاسې دڵ کۊرې؟! فرەو خەڵکی تەریچم پاسە دیڎەن، نمەزاو سووچ چېشەن؟
سەرنام: حەماڵی دلېبەرەو ئوتیلا
دەسم کەرد بە حەماڵی کەرڎەی؛ لوېنا دلېبەرەو ئوتیلە گۆرانە مدرېنا، گارسۆن (خزمەتکارې مېمانخانەی) مەچڕېنېم، چەمەدانو (جلدان) مېمانا کاتێ ساعبەنە دلې ئوتیلەکېنە مەزیېنېرە، بەرېنا پەی بەری و پەی دلې ماشینی. وېشا و خوڎاو وېشا چېوێ مەوزېنې دلې مشتېم. شەوېچەنە وەرو هێوانەو دیوەخانو نەقیبینە مەوسېنا.
سەیڎ عاسم مەرد؛ مامۊزێوە پیریو ئاڎیشان کە نامېش سەیڎ برایم بې کەرد بە نەقیبو غۆسی. مام حسێنی لاو نەقیبی تازەیۆ بە نۊکەری مەرزنانېرە کە مانگێ چوار دینارې و نان و پېخۊرم پەنەبڎۊن. گزی دای و کاشی ئەسەڕیەی نەمەن. حاجی حەسەبێ ئەفغانی، حاجی کەرامەت نامێ پاکستانی و ئەحمەڎ نامێ هیندی هەرمانە قورسەکا مەکەرېنې، . هەرمانەو من ئانې بې شەو و ڕۊ سینی پەی سەیڎ برایمی بەرون و جە ماساو وەشکەرڎەی من فرە کەیفش ئې.
سەرنام: نۊکەریی سەییڎ برایمی نەقیبی
سەیڎ برایم، پەڼجسەڎ یانې عەرەسەی گەڕەکەو ئەرمەنیانیش بېنې؛ زیاتەر جە دوەسەڎ دوکانې و یانې تەرېش دلې بەغڎاینە دێبېنې کرې، واچېنې پەڼج ملیۊن دینارېش ئینا بانقەنە؛ بەڵام دیسان چەمش جە فلس و دوە فلسو تەوافکارا کورڎی و هیندیا بې. جېقنێ بې هەر دەم واچېنی دڕەی بنەو قلیچکەیش دریێنې. بە ڕاسی شېتێ تەمام بې. باخێ خورماواش بې، بە دواڼزە هەزار دینارې بە ئیجارە لوابې. شەوێشا چەنی ئیجارەدارو باخەکەیش سەرو نامې نۊعە خورماوێ بی بە هەراشان. بە دژمانی گېرتشەرە و پاسە نەڕنې کە وتەکې دلې هۆشې غۆسیش هایی کەردێ:
واچې: سەگباب، چەنی من ماچو ئا خورماوې نامېش سوورە کېویلېنە و تۊ ماچی نەخێر پەنجې وێوېنە؟!
ڕوێشا دیڎش کە ڕۊنامە موانوە، کەردش هەرا:
ماچۊ: مەمنووعەن ڕۊنامە بوانییۆ؛ مەژگت تېک مڎۊن، تۊ نۊکەرو منەنی؛ نمەبۊ هەرمانې خرابې بکەری!
پەی نەگبەتی مەرەجیېش فارسی مزانۊ؛ باعزە چېوێ کاوېژ مەکەرې نەزانېنا چ زوانێن.
ڕوێشا نەتەرسانې و واتم ئەفەڼی ئانە فارسی نییەن؛ من چېوێ جە فارسی مزانو، سەیربې کە تووڕە نەبی؛ ماچۊ: خاسەن فېرم بکەرە! تەممەڵێ بې مەرەجیۊم خوڎا هیچ مەژگێش نەنیان دلې سەرەیش. خولاسە بیەبېنا خزمەتکارو نەقیبی، چەنیش لوېنا پەی دلې باخەکەیش، دەسێ یانې وەشېش دلېنە وەشکەردەبې.
جارێشا ئیجارەدارو باخی بە من و چەنەخوڕەرەکێش وات: سەرو دەسەسڕم بڎەیدې پەنە خورماویشا مەکەرۊنە پەیتان؛ بەڵام با ئەفەڼی نەزانۊ. هەرچن من ئیجارەدارەنان و ئاڎ هەقش سەرو بەروبومیۆ نییەن و من دلې یانەو وېمەنە بەشو مېمانا مڎەو؛ بەڵام بوینۊ من خورماوی بە شمە مەبەخشو، حەیبەتیېنە هەردوې چەمېش کۊرې مەبان. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]