دیڎارێ پەی مەڵڵا هەسەنو دزڵیې
من هەڵۆی لووتکەی بەرزی داڵانیم، هەرگیز وەک قاڵاو ناکەومە چینە
ڕۆدیاروو پەنجشەممە، (#08-08-2025#ز.)، جە شارەدەگاو دزڵیێنە و بە هیممەتەو خەڵکی ئاستبەرزوو دەگای و بڕێو جە جوانە فەرهەنگ دۆس و ئەکتیڤەکا و کەسایەتییە فەرهەنگی و ئەدەبییەکا، یادمانێوە شایێستە و عال پەی بەرز نرخنای کەسایەتیی و ڕۆحی ئەدەبیی و عێرفانیی و نیشتماندۆسیی شاعێری پایەبەرز «مەلاهەسەن»وو دزڵیێ بریا ڕاوە.
ئی یادمانە بە شێوەی هەرەوەزی و هامکاریی هەمەلایەنەو خەڵکی ڕێک وزیا و چەوپەڕوو نەزمی و ڕێک و پێکیەوە، بە بەشداریی جەماوەرێوە فرە جە ئەدەبدۆسا و نیشتمانپەروەرا لوا ڕاوە.
چی ئەرەنیشتەنە؛ کاک غەفوور ڕەحمانپوور چندٚ ئایەتێ جە قورعانیش وانێوە. کاکە مەنسوور سوهرابی پارچە شێعرێوەش جە وەسفوو مەلاهەسەنیەنە واناوە، چندٚ زاڕۆڵێ ئێسک سووکێ بە ئامادەکاری خاتوو ئاسیە وەیسی، پارچە شێعرێوە مەلاهەسەنیشا واناوە. بەڕێز ڕەئوف مەحموودپوور پلان و بەرنامەو دیدارەکەیش باس کەرد و جەلاو خەڵکوو دزڵیێوە خێر ئامای مێمانەکاش کەرد. بەڕێز مامۆسا باسێت موقەدەمی سەروو دەرەتانی دینیی و عێرفانی، بەڕێز دوکتور فیروز عارفی سەروو دەرەتانی تارێخیی، بەڕێز عادڵ موحەممەدپوور سەروو دەرەتانی ئەدەبیی، بەڕێز سابیر عەزیزی سەروو دەرەتانی کۆمەڵایەتی، بەڕێز ئەمین حاجی سەروو دەرەتانوو هەورامانی، جە دلێو شێعرەکاو ئی شاعێریەنە باسشا کەرد. خاتوو شەهین حسەینی بە وانایۆ پارچە شێعرێوە وێش و پارچە شێعرێوە شاعێری و خاتوو فریشتە عەلەوی جەلاو بنەماڵەو مەردووخییەکاوە سپاس و خێرئامایش ئەو مێمانەکاو و هەرپاسنە ڕێکوزاو دیدارەکەی و خەڵکوو دزڵیێ کەرد. هونەرمەندی نامدار کاک سیروان خالدی بە هامدەنگیی کاک تۆفێق دزاوەری بە پێشکەش کەردەی چندٚ گورانیا و کاکە ئارەش سوهرابی بە دایوەنەو شمشاڵەکێش بەرنامەکەشا ڕازناوە. کاک ڕێبوار مەحموودپوور ئەرکوو فیلمگێرتەی و تۆماروو بەرنامەکەیش وستەبێ سەروو شانەو وێش. پێشکەشکاروو بەرنامەکەی کاک سیروان موحەممەدی بە شێوەی عال ئەرکوو وێش پۆڕنا. کاک بهزاد ڕەشیدی ئەرکوو سەرپەرشتیی نەزمی و مێمانداریش سەروو شاناوە بێ. دێهیاریی و شووراو دەگای پەی ڕێکوستەی و بەردەی ڕاوەو ئی هەرمانێ هامکاری و دڵسۆزی عالشا نیشانە دا. کاکە ئەمیر وەیسی پێسەو هورسووڕنەروو کومیتەی ماڵیی وێش ئەرکدار کەردەبێ.
ڕێکوزاو ئی بەرنامەیە سپاس و پەنەزانای وێشا ئاراستەو خەڵکی ئازیزوو دزڵیێ و گردوو ئا کەس و ناوەندا کەرا پەی ڕێکوستەی و بەردەی ڕاوەو ئی بەرنامەیە هەمکاریشا کەردەن و دەسباردەرێ بیێنێ.
بە دڵنیاییەوە جە بابەتێوەنە کە پێسەو بەرگێوە جە تارێخوو دزڵیێ سەبارەت پی هەرمانە بەرزێ منویسیۆ، فرە وردتەر و جوزئیتەر باسوو پلان و بەرنامەڕێزی و لوای ڕاوەو بەرنامەکەی کریۆ و نامێو گردوو ئا لێژنا و ئا کەسا پەی ڕێکوستەی و سەروستەی ئی دیداری کۆششا کەردەن و دەسبەکارێ بیێنێ منویسیۆ.
لێژنەو ڕێکوزاو دیداروو مەڵاهەسەنوو دزڵیێ. [1]