سەبارەت بە لێدوانی بەڕێوەبەری ئاسایشی #هەولێر# گوایە بەندە فەرمانی دەستگیرکردنی هەبێت و لەترسی دادگا ڕامان کردبێت بۆ ڕای گشتی ڕای دەگەیەنین کەوا:
ئێمە باوەڕمان بەدادگایەکی سەربەخۆی بێ لایەن هەیەو ئامادەین لەبەرامبەری بوەستین و ڕێز لەبڕیارەکانی بگرین.
ئەو لێدوانە بەڕێوەبەری ئاسایشی هەولێر لەکاتێکدایە ماوەی چوار ساڵە ئەندامی خولی سێهەمی پەڕلەمانین عێراقین و و سەرکەوتوی خولی چوارەمین، لای هەمو لایەک ئاشکرایە بەشێک لە دادگانی هەرێم لەکاتی ململانێ سیاسیەکاندا بێلایەنی خۆیان لەدەستدەدەن و بۆ ساغکردنەوەی ململانێ سیاسی بەکاردەهێنرێن.
ئێمە پێمانوایە ئەو جۆرە هەوڵانە زیان بە پڕۆژەی کاری هاوبەشمان دەگەیەنێت، هیچ گومانی تێدا نیە هەرکەسێک لەئەلفو بای یاسا بزانێ لەو ڕاستیە تێدەگات کە هەر کەس پەیوەندی بە هەر گروپێکی تیرۆرستیەوە هەبێت ناتوانێت کاندیدی پەڕلەمان بێت و و ڕەزامەندی خەڵک بەدەست بێنێت.
هەربۆیە زۆر بەتوندی ئەو تۆمەتانە ڕەت دەکەمەوە بە هەوڵێکی دەزانم بۆ ناشرین کردنی کەسایەتیم، دەمێکە هەوڵی ناشرین کردنمان ئەدەن بەڵام سوپاس بۆ خوا گەلی کوردستان لەوە هۆشیاترە به درۆ دەلەسەکانیان باوەڕ بکات.
دواکارم لە خودا ئەمن و ئاسایشی وڵاتمان بپارێزێ و ناحەزانیش ڕیسوا بکات
#سەلیم شوشکەیی#
#24-07-2018#

[1]

بەناوی خوای بەخشیدەی میهرەبان
بەیاننامەی چوار فراکسیۆنی پەرلەمانی کوردستان
لەسەر پەلاماری بینای پارێزگای #هەولێر# و تۆمەتباری کردنی ناڕەوای چەند کەس و لایەنێک
لەکاتێکدا هەرێمی کوردستان بەدۆخێکی قەیراناوی دا گوزەر دەکات بەداخەوە پەلاماری بینای پارێزگای هەولێر دەدرێت، بەتوندی ئیدانەی ئه و پەلامارە دەکەین، پێویستە دەزگا ئەمنیەکان بەوریایی زیاترەوە هەوڵی پاراستنی دامەزراوە حکومییەکان و سەروماڵی هاوڵاتیان بدەن.
پاش پەلاماری بینای پارێزگای هەولێر لێدوانی چەند بەرپرسێکی حکومی و ئەمنی شاری هەولێر بۆ تۆمەتبارکردنی کەسانێک پێش لێکۆڵینەوه و بڕیاری دادگا کارێکی نایاساییه و بۆ متمانەی نێوان هاوڵاتیان و دەزگا ئەمنیەکان کەم دەکاتەوە.
لەپەنای ئه و ڕوداوانەدا ناوهێنانی مامۆستا سەلیم شوشکەیی ئەندامی پێشووی پەرلەمانی عێراق، بۆ شکاندنی کەسێتی و ناوزڕاندن و لەکەدارکردنه و تۆمەتی بێ بەڵگە و بێ بڕیاری دادگایه و ڕەدی دەکەینەوە، بە پاکتاوی سیاسی و مەرامی حزبی دادەنێن.
خوازیاریشین دەزگا ئەمنیەکان بێلایەنی خۆیان بپارێزن و بەکارنەهێنرێن بۆ دژایەتی هیچ کەس و لایەنێک.
فراکسیۆنی گۆڕان
فراکسیۆنی یەکگرتووی ئیسلامی
فراکسیۆنی بزوتنەوەی ئیسلامی
فراکسیۆنی کۆمەڵی ئیسلامی
#26-07-2018#

پشتیوانی لە مامۆستا سەلیم شوشکەیی
سەبارەت بەو ڕاپۆرتانەی چەند دەزگایەکی ڕاگەیاندن دەربارەی پەرلەمانتار مامۆستا سەلیم شوشکەیی ئەندامی فراکسیۆنی کۆمەڵی ئیسلامیی کوردستان لە ئەنجومەنی نوێنەرانی عیراق بڵاویانکردووەتەوە کە تیایدا چەند تۆمەتێکی بێ بنەماو نادروستیان لەسەر ناوبراو پەخش کردوە کە هەموویان دەچنە خانەی تەشهیر و شکاندنی سیاسی، ئێمە نیگەرانی خۆمان دەردەبڕین و پێمانوایە مامۆستا سەلیم شوشکەیی نوێنەرێکی دڵسۆزی گەلی کوردستانە و لێدوان و بلاوکراوە و موداخەلەکانی لە ئەنجومەنی نوێنەران، گەواهی ئەوەی بۆ دەدەن کە دژی بیری توندڕەوییە و پشتیوانی هێزی پێشمەرگەی کوردستانە.
شکاندن و بێڕێزی کردن بەرامبەر هەر ئەندامێکی کورد لە ئەنجومەنی نوێنەران خزمەت بە یەکڕیزی نیشتیمانی و سەقامگیریی کۆمەڵایەتی ناکات.
ئاڵا تاڵەبانی
فراکسیۆنی یەکێتی نیشتیمانی کوردستان
هۆشیار عەبدوڵڵا
فراکسیۆنی بزوتنەوەی گۆڕان
ئەحمەدی حاجی ڕەشید
فراکسیۆنی کۆمەڵی ئیسلامیی کوردستان
08-01-2016

بسم الله الرحمن الرحیم
جەماوەری کوردستان
لایەنە سیاسییەکان
بەداخەوە هەرێمی کوردستان لە بارودۆخێکی نالەباری خراپدایە لە هەموو ڕوویەکەوە و پەیوەندی نێوان لایەنەکان لەهەمووکات ئاڵۆزترە بەتایبەت دوای گزی و تەزویر لە هەڵبژاردنەکەی 12ی ئایاری 2018
ئێمە لە کۆمەڵی ئیسلامی کوردستان هەرگیز لەگەڵ ئاڵۆزترکردنی بارودۆخەکەنین، و بۆیە ئێمە بێ دەنگیمان هەڵبژارد بەرانبەر بە هەڵکوتانە سەر ماڵی مامۆستا سەلیم شوشکەیی پەرلەمانتاری کۆمەڵ لەلایەن دەزگا ئەمنییەکانی هەولێرەوە لە ڕۆژی 14/7/2018 لەکاتێکدا خۆی بۆ چارەسەر لەدەرەوەی وڵات بوو بەسود وەرگرتن لە نەمانی پارێزبەندی پەرلەمانتاری بەهۆی دواکەوتنی پەسەندکردنی ئەنجامی هەڵبژاردنەکان و سوێند نەخواردنی پەرلەمانتاران، ماوەی چەند ساڵە هەوڵدرا پارێزبەندی لەسەر مامۆستا لە پەرلەمانی بەغدا هەڵگیرێ.
ئێمە لە کۆمەڵی ئیسلامی کوردستان و خودی مامۆستا کۆی مەلەف و تۆمەتەکانی بۆی دروستکراوە ڕەد دەکەینەوە و پێمان باشبوو ئەم بابەتە لەلایەن دەزگا ئەمنییەکان نە قۆزرێتەوە بۆ تەسفیەی حساباتی سیاسی کە بەداخەوە لێدوانی بەرپرسە ئیداری و ئەمنییەکانی هەولێر به و ئاڕاستەیە بوو لەڕۆژانی ڕابردوو پاش ڕوداوەکەی پارێزگای هەولێر کە بەتوندی ئێمە ئه و ڕووداوە ئیدانە و مەحکوم ئەکەین و لەهەمان کاتدا ئه و لێدوانە نابەرپرسانە ڕەد ئەکەینەوە بەرامبەر مامۆستا سەلیم، کە بۆ خۆشی ئامادەیە بۆ دەرخستنی ڕاستییەکان و سەلماندنی بێ تاوانی خۆی لە تۆمەتە هەڵبەستراوەکان لەبەردەم دادگایەکی بێ لایەنی سەربەخۆ ئامادەبێ و هاوکات تۆمەتبارکردنی مامۆستا بەداعش سوکایەتی یە بەدەنگی هەزارەها دەنگدەر کەمتمانەیان بە ناوبراو داوە و بێڕێزیە بەرانبەر بەحزبێکی سیاسی کوردستانی خاوەن هەڵوێست بەرانبەر بە بیری توندوتیژی و توندڕەوی و خاوەن متمانەی جەماوەری کوردستان.
ئەنجومەنی سیاسی کۆمەڵی ئیسلامی کوردستان
#25-07-2018#