پشتیوان سادق عەبدوڵڵا
یەکێکە لە کەسایەتییە حیزبی و حکوومیەکانی هەرێمی کوردستان و لە یەک کات وەزیری پەروەردە و وەزیری ئەوقاف و کاروباری ئایینی (بە وەکالەت) لە کابینەی هەشتەمی حکوومەتی هەرێمی کوردستان و وەزیری ئەوقاف و کاروباری ئایینی لە کابینەی نۆیەمی حکوومەتی هەرێمی کوردستان.

ژیان
پشتیوان سادق لە ساڵی 1969 لە هەولێر لەدایکبووە و یەکێکە لە کەسایەتییە دیارەکانی پارتی دیموکراتی کوردستان، لە 2013 بڕوانامەی دکتۆرای لە یاسای گشتی بەدەستھێناوە، پێشتریش هەردوو بڕوانامەی بەکالۆریۆس و ماستەری لە یاسای گشتی بەدەستهێنابوو.
ئەو ئەندامی ئەنجوومەنی سەرکردایەتیی پارتی دیموکراتی کوردستانە. ھەروەھا مامۆستای کۆلێژی یاسا و ڕامیاری بووە لە زانکۆی سەڵاحەددین.
ماوەیەک بەرپرسی لقی دووی پارتی بووە و ئەندامی یەکێتی مامۆستایانی کوردستان و سەرۆکی فەخری ڕێکخراوی بڵاوکردنەوەی ڕۆشنبیری یاساییە.

بڕوانامە:
دوکتورا لە یاسا
ماستەر لە یاسا
بەکالۆریوس لە یاسا

قۆناغەکانی کارو بەرپرسیاریەتی:
وەزیری پەروەردەی حکومەتی هەرێمی کوردستان و وەزیری ئەوقاف و کاروباری ئایینی بە وەکالەت (کابینەی هەشتەم) .
ئەندامی ئەنجوومەنی سەرکردایەتی پارتی دیموکراتی کوردستان، بەرپرسی پێشووی لقی دووی پارتی دیموکراتی کوردستان.
ئەندامی یەکێتی مامۆستایانی کوردستان.
سەرۆکی فەخریی ڕێکخراوی بڵاوکردنەوەی ڕۆشنبیری یاسایی.

زمان:
کوردی (زمانی دایک) .
عەرەبی (زۆرباش) .
ئینگلیزی (باش) .

=KTML_Bold=پشتیوان سادق، ئەندامی مەکتەبی سیاسی پارتی: لە کۆتاییدا هەردەبێت لەگەڵ یەکێتی کۆ ببینەوە=KTML_End=

- وەفدی هەرێم بۆ بابەتی یاسای نەوت و غاز و بودجە چونەتە #بەغدا#.
- کێشە هەیە لەنێوان پارتی و یەکێتی، ناکرێت بڵێین کێشە نییە بەڵام کێشەکان قابیلی چارەسەرن.
- لەئەنجامدا​ لەگەڵ یەکێتی هەر دەگەین بە چارەسەر و هەر دەبێت کۆببینەوە.
- ناکرێت هیچ حیزبێک ببێتە ڕێگر لە بەردەم هەڵبژاردن و هیچ دەرفەتێک نەماوە بۆ ئەوەی جارێکی دیکە هەڵبژاردن دوابخرێت.
- پارتی، کێشەی نییە هەڵبژاردن بکرێت بە هەر چەند بازنە!
- لە کوردستان سەرتکوتکردنی ڕۆژنامەنووس بە هیچ شێوەیەک نییە.
- داهاتی ئێراق، مانگانە هەشت ملیار دۆلارە، پێمان سەیرە لەسەر 135 ملیۆن دۆلاری هەرێم کێشەیان درووستکردووە؟ [1]

لەبارەی پەیوەندییەکانی نێوان #هەولێر# و #بەغدا#، #پشتیوان سادق# ڕایگەیاند، پێش یاسای بودجە، ڕێکەوتنێک لەنێوان #حکومەتی هەرێمی کوردستان# و بەغدا هەبوو، کاتێک ئەو ڕێککەوتن و پڕۆژەیە چووە پەڕڵەمانی ئێراق، بەداخەوە گۆڕانکاری تێدا کرا، مەبەست تێیدا بچووککردنەوەی قەوارەی هەرێمی کوردستان و پێشێلکردنی مافە دەستوورییەکان بوو‌، ئێستا ئەوان هەست بەو هەڵەیە دەکەن کە ئەوکات کردیان، چارەسەریشی هەموارکردنەوەی یاسای بودجە و باشترکردنی نییەتەکانە.
هەروەها وتیشی:مەبدەئییەن ڕێککەوتنێک هەیە، بۆ ئەوەی یاسای بودجە هەموار بکرێتەوە، بەڵام نازانین جێبەجێ دەکرێت یاخوود نا.

دەشڵێت: بەهیواین لە ساڵی نوێدا کێشەکانی نێوان هەولێر و بەغدا چارەسەر ببن و ئێمە بڕوامان بە گفتوگۆ هەیە، ئەگەر چارەسەری کێشەکانی هەرێمی کوردستان بە گوێرەی دەستوور نەکرێت، بێگومان ئێراق ئارامی بەخۆیەوە نابینێت.
وەزیری ئەوقاف وێڕای پیرۆزبایی لە پێکهاتەی کریستانەکان بە بۆنەی جەژنی لەدایکبوونی حەزرەتی مەسیح، ڕایگەیاند، دڵخۆشین بەوەی کە کوردستان لە دێرزەمانەوە شوێنی پێکەوە ژیانی ئایینی و نەتەوەییە.
ئەوەشی خستەڕوو، تەواوی پێکهاتەی کریستیانەکانی هەرێمی کوردستان و دەشتی #نەینەوا# لە کڵێساکانی عەنکاوە لە هەولێر یادی لەدایکبوونی حەزرەتی مەسیح بەرز ڕادەگرن. [1]

ئەمڕۆ سێشەممە #20-02-2024#، لە بارەگای مەکتەبی ڕێکخستنی پارێزگای #هەولێر#، بەسەرپەرشتی دکتۆر #پشتیوان سادق# ئەندامی مەکتەبی سیاسی و بەرپرسی مەکتەبی ڕێکخستنی پارێزگای هەولێر و بە ئامادەبوونی چیا هەرکی یاریدەدەری بەرپرسی مەکتەب، لەگەڵ بەرپرس و مامۆستایانی #وەزارەتی خوێندنی باڵا# کۆبوونەوە.
لە کۆبوونەوەکەدا، دکتۆر پشتیوان سادق بە گرنگیەوە باسی لە ڕۆڵ و کاریگەریی دیاری زانکۆ و پەیمانگاکان، لەنێو کۆمەڵگە وەک بەرزترین ناوەندی ئەکادیمی کرد، کە لە دەستخستنی زانست و مەعریفە و پێگەیاندنی تاک پێشەنگن.
لە تەوەرێکی تری قسەکانیدا، بەرپرسی مەکتەبی ڕێکخستنی هەولێر، ڕایگەیاند لە سایەی #حکومەتی هەرێمی کوردستان#، ئێستا (2024) خاوەن دەیان زانکۆ و پەیمانگاین، بە دڵنیاییەوە، بۆ هەموو سێکتەرەکان، حکوومەتی هەرێمی کوردستان بە سەرۆکایەتی ڕێزدار (#مەسرور بارزانی#)، بەرنامە و پلانی تۆکمە و گرنگی هەیە، ئامانجی سەرەکی خزمەتکردنی هاووڵاتییانی خۆشەویستی کوردستانە.
دکتۆر پشتیوان لە بەشێکی تری پەیڤەکەیدا، ئاماژەی بەوەکرد، لە ڕووی پەیوەندی نێودەوڵەتی و سیاسی و دبلۆماسی و ئابووری، ڕۆژ لە دوای ڕۆژ هەرێمی کوردستان، بەرەوپێشەوە دەچێت، لە زۆربەی کۆڕبەند و کۆنفرانس و دیالۆگی نێودەوڵەتی « سەرۆکی حکوومەت» بەشداربوویەکی سەرەکییە.
هەر لە کۆبوونەوەکەدا، دکتۆر پشتیوان بەوردی لەسەر دوایین پێشهات و بارودۆخی هەنوکەی کوردستان و ئێراق و ناوچەکە قسەی کرد و ئەوەی ڕاگەیاند بە دڵنیاییەوە ئاسۆی ئاییندەمان زۆر گەش و ڕووناکە، بۆیە پێویستە هەموومان، پابەندی بەها بەرز و باڵاکانی خاک و نیشتمان بین و بە چەکی زانست خزمەت بە خەڵک و وڵاتەکەمان بکەین. [1]

ئەمڕۆ #24-03-2024# لە دیدارێکدا دکتۆر #پشتیوان سادق# ئەندامی مەکتەبی سیاسی و بەرپرسی مەکتەبی ڕێکخستنی پارێزگای #هەولێر# لەگەڵ ژمارەیەک مامۆستای خۆبەخشی ئایینی، لە سنووری شاری ھەولێر کۆبوونەوە.
ئەمڕۆ یەکشەممە 24-03-2024، دکتۆر پشتیوان سادق ئەندامی مەکتەبی سیاسی و بەرپرسی مەکتەبی ڕێکخستنی پارێزگای ھەولێر، لەگەڵ ژمارەیەک مامۆستایی خۆبەخشی بەڕێزی ئایینی، لە سنووری ناوەندی شاری ھەولێر کۆبوونەوە و دیدارێکی کراوەییان ئەنجام دا.
لە دیدارەکەدا دکتۆر پشتیوان سادق دەست خۆشی ئاڕاستەی مامۆستایانی بەڕێز کرد، کە خۆبەخشانە و بێبەرانبەر خزمەتی ئایینی پیرۆزی ئیسلام و کوردستان دەکەن، ھەروەھا لەنێو مزگەوتەکان دا بەوپەڕی گیانی ھاوکاری و خۆبەخشییەوە لەگەڵ خەڵک و ڕۆژوەواناندان.
بەرپرسی مەکتەبی ڕێکخستنی پارێزگای ھەولێر، لە بەشێکی تری قسەکانیدا، ئاماژەی بە دوایین گۆڕانکارییە سیاسییەکانی ئێراق کرد و ڕایگەیاند بە ناڕەوا و دوور لە یاسا و دەستوور مافە ڕەواکانی گەلەکەمان و شایستە داراییەکانی مووچەخۆران و ھاووڵاتییانیان زەوت دەکرێت، بۆیە لەسەر ھەموولایەک پێویستە بەگیانی نیشتمانیانەوە، بەرانبەر ئەو ستەمە بوەستنەوە، کە بە ناڕەوا دەکرێتە سەر مافەکانی خەڵکی کوردستان.
دکتۆر پشتیوان لە تەوەرێکی تری قسەکانیدا، ڕایگەیاند ھەمیشە مامۆستایانی ئایینی بەگیانی بەرپرسیارانەوە مامەڵەیان کردووە، کە ئەمەش بەشێکە لە ئەرکی ئایینی و نیشتمانی، بۆیە پێویستە بەرانبەر بە پێنەدانی مافی شەرعی مووچەخۆرانی کوردستان لەلایەن ئێراقەوە، دەنگ ھەڵبڕین و داوای مافە یاسایی و شەرعیەکانمان بکەین، چونکە ئەوەی پێویست بوو لەسەر #حکومەتی هەرێمی کوردستان#، جێبەجێی کردووە، بە دڵنیاییشەوە، پشت بە خوای گەورە و ئیرادەی بەھێزی خەڵکە سەربەرزەکەمان، ئاییندەی گەش ھەر بۆ کوردستانە. [1]

ئەمڕۆ #25-03-2024# لە دیدارێکدا دکتۆر #پشتیوان سادق# ئەندامی مەکتەبی سیاسی و بەرپرسی مەکتەبی ڕێکخستنی پارێزگای #هەولێر# لەگەڵ کادیرانی پێشکەوتووی پارتی لە شاری ھەولێر کۆبووەوە.
ئەمڕۆ دووشەممە 25-03-2024، لە بارەگای مەکتەبی ڕێکخستنی پارێزگای ھەولێر، دکتۆر پشتیوان سادق ئەندامی مەکتەبی سیاسی و بەرپرسی مەکتەبی ڕێکخستنی ھەولێر، بە ئامادەبوونی بەرپرسی لقەکان و ھەڤاڵان #ئومێد خۆشناو# و ھەڵگورد شێخ نەجیب و چیا ھەرکی یاریدەدەری بەرپرسی مەکتەب و ئەندامانی مەکتەبی ڕێکخستنی ھەولێر و ھەڤاڵان و کادیرانی پێشکەوتووی سنووری لقەکانی پارێزگای ھەولێر، کۆبوونەوەیەکیان ئەنجامدا.
لە سەرەتایی کۆبوونەوەکەدا، دکتۆر پشتیوان سادق باسی لە دوایین پێشھاتە سیاسییەکانی کوردستان و ئێراق کردوو، ڕایگەیاند بە پلان و بەرنامە و لە ڕێگای دادگای فیدڕاڵی، بارودۆخێکی سەختیان بۆ ھاووڵاتییان و مووچەخۆرانی کوردستان درووستکردووە، بۆیە لەسەر ھەموومان پێویستە دژی ئەم ستەم و زوڵم و سیاسەتی برسیکردنە ڕابوەستین.
لە تەوەرێکی تری قسەکاندا، بەرپرسی مەکتەبی ڕێکخستنی ھەولێر، ئاماژەی بەوەکرد کە #حکومەتی هەرێمی کوردستان#، ھەموو ئەرک و کارەکانی بەرانبەر #بەغدا# جێبەجێ کردووە، بەڵام ئەوان دوور لە یاسا و دەستوور مامەڵە لەگەڵ ھەرێمی کوردستان دەکەن، ئەمەش جێگای قبووڵکردن نییە.
ھەر لە کۆبوونەوەکەدا، دکتۆر پشتیوان سادق ڕایگەیاند، گەلی کورد بە سەرکردایەتی و ڕێبەرایەتی جەنابی (#مەسعود بارزانی#) ، نە لە ڕابردوو و نە لە ئێستا و نە لە داھاتووش، ھیچ ھێز و بڕیارێکی سەپێنراوی دژ بە مافە ڕەواکانی گەلی کوردستان قبووڵ نەکردووە و قبووڵ ناکات.
بەرپرسی مەکتەبی ڕێکخستنی پارێزگای ھەولێر، لە بەشێکی تری وتارەکەیدا ئاماژەی بەوە کرد، کە ھەرێمی کوردستان، ڕۆژ لە دوای ڕۆژ لە ڕووی پەیوەندی دیبلۆماسی و سیاسی و پرسە نێودەوڵەتییەکان، بەرەوپێش دەچێت و داھاتووی کوردستان زۆر گەش و ڕووناکە. [1]

- وەزیری ئەوقاف و کاروباری ئایینی، کە یەکێک بوو لە ئەندامانی تیمی حکومەت بۆ سەردانی جێگری سەرۆکی حکومەتی هەرێمی کوردستان بە مەبەستی چارەسەرکردنی کێشەکان ڕایدەگەیەنێت، سەردان و گفتوگۆیدان بەردەوام دەبێت بە ئامانجی چارەسەرکردنی کێشەکان.

- #پشتوان سادق#، ڕایگەیاند: ئێمە لە حکومەت پێکەوە ئیش دەکەین، بۆیە ئەم سەردانانە شتێکی ئاساییە، پڕۆسەی سەردانیکردنی جێگری سەرۆکی حکومەت بەردەوام دەبێت، ناکرێ بڵێین کۆتایی هاتووە یان گەیشتوینەتە ئەنجام، بەڵام بەردەوام دەبین.

- وتیشی: ئەو کێشانەی کە هەن کێشەی گەورە نین تا چارەسەر نەکرێن، دەکرێ بە گفتوگۆ لەناو کۆبوونەوەکانی ئەنجوومەنی وەزیران هەموو گرفتەکان چارەسەربکەین.

- ئاماژەی بەوەشکرد: پەیامی پارتی بۆ هەموو لایەنەکان پەیامی خزمەتکردنی خەڵکی کوردستانە و حزبەکان وەسیلەن بۆ خزمەتکردنی خەڵک، لێرەشەوە جەخت تەئکید دەکەینەوە کە دەستی تەبایی و یەکڕیزی بۆ لایەنەکان درێژ دەکەین. [1]

ئەمڕۆ #06-04-2024# لە دیدارێکدا دکتۆر #پشتیوان سادق# ئەندامی مەکتەبی سیاسی و بەرپرسی مەکتەبی ڕێکخستنی پارێزگای #هەولێر# لەگەڵ ژمارەیەک کادیری پەروەردەیی لە سنووری پەروەردەی #شەقڵاوە# و دەشتی ھەولێر و #خەبات# و #مەخموور# کۆبووەوە.
ئەمڕۆ شەممە 06-04-2024، بە سەرپەرشتی دکتۆر پشتیوان سادق و بە ئامادەبوونی چیا ھەرکی یاریدەدەری بەرپرسی مەکتەب و بایز زراری ئەندامی مەکتەبی ڕێکخستنی ھەولێر، لەگەڵ ژمارەیەک کادیری پەروەردەیی لە سنووری پەروەردەی شەقڵاوە و دەشتی ھەولێر و خەبات و مەخموور کۆبووەوە.
لە سەرەتایی کۆبوونەوەکەدا، دکتۆر پشتیوان سادق بە گرنگ و پڕبایەخەوە باسی لە ڕۆڵ و پێگە و کاریگەریی مامۆستایان لە کۆمەڵگە و سەرجەم قۆناغەکانی بزاڤی ڕزگاریخوازی گەلی کوردستان کرد.

لە تەوەرێکی تری کۆبوونەوەکەدا، بەرپرسی مەکتەبی ڕێکخستنی ھەولێر، ڕایگەیاند #حکومەتی هەرێمی کوردستان#، یەکێک لە ئەولەوییەتی کارەکانی بایەخدان بووە بە سێکتەری پەروەردە.
ھەر لە کۆبوونەوەکەدا، دکتۆر پشتیوان ئاماژەی بەوەکرد، ئەم قەوارە دەستوورییەی ھەرێمی کوردستان، بە خەبات و خوێنی ھەزاران شەھید ھاتۆتە بەرھەم، زۆر ھەوڵی ناوخۆی و ئێراقی ھەبووە، کە سەرجەم سێکتەرەکان پەکبخەن و قەوارەی دەستووری ھەرێمی کوردستان لاواز بکەن یاخود ھەر نەیھێڵن، بەڵام دڵنیابن تاوەکوو ڕێبەر و سەرکردەمان جەنابی (#مەسعود بارزانی#)بێت، ئەم قەوارە دەستووری و یاساییە ھەر بەھێز و بەئارامی و ھێمنی و ئاوەدانی و خۆشگوزەرانی دەمێنێتەوە.
لە بەشێکی تری پەیڤەکەیدا، دکتۆر پشتیوان ڕایگەیاند، خۆڕاگری ڕێزدار (#مەسرور بارزانی#) لەسەر سازش نەکردنی مافە ڕەواکانی گەلەکەمان، وای کردووە ھەرێمی کوردستان ڕۆژ لە دوای ڕۆژ زیاتر بەرەو پێشەوە بچێت و ئەمن و ئاساییش و ئارامی تێدا زیاتر بەرقەراربووە و لە ڕووی پەیوەندییە دیپڵۆماسی و سیاسی و نێودەوڵەتییەکانیش بەرەوپێشچوونی زۆری بەخۆییەوە بینیووە.
بەھێزکردنی ھەستی کوردپەروەری و نیشتمانپەروەری و خۆشەویستی خاک و ڕێزگرتن لە بەھا باڵاکانی وڵات ئەرکی ھەموومانە. [1]