لە ساڵی 1974 لە شاری #سلێمانی# هاتۆتە دنیاوە و هەر ئەو ساڵەش لەگەڵ خێزانەکەی ئاوارەی ئێران بووە. تا تەمەنی 18 ساڵی لەئێراق و ئێران ژیاوە و لە 1993وە لە بەریتانیا دەژی. هەر لەوێش بەکالۆریۆس، ماستەر و دوکتۆرای لە فەلسەفە و دەروونناسیدا بەدەست هێناوە. جگە لە کاری ئەکادیمی هەڵبەستیش دەنووسێت و خاوەنی دوو کۆمەڵە هەڵبەستە بە زمانی کوردی و دوا بەرهەمیشی بە زمانی ئینگلیزی لەبەریتانیا چاپ بووە. [1]

لەبەر خاتری عەدلە خانی شاعیر کە بەپێچەوانەی قانعی برایەوە تەنیا یەک دێڕ شیعری لەسەر فەرشێکی چنراو بۆ ئێمە بەجێماوە، لەبەر خاتری خاتوو ئەختەر کابان کە دەکرا وەک #کەریم کابان# و #قادر کابانی# برای ھونەرمەندێکی ناسراوی ئێمە بێت کەچی تەنیا لە پرسەدا گوێمان لە دەنگە ناوازە و لاواندنەوەکانی بوو، لەبەر خاتری ماریا کە فریای تۆمارکردنی یەک گۆرانی کەوت پێش ئەوەی بیکوژن، لەبەر خاتری مەستوورەی ئەردەڵانی مێژوونووس و شاعیر کە سەد ساڵ دوای مەرگی خۆی شیعرەکانی کۆکرانەوە، لەبەر خاتری زەینەب خانی خوشکی دڵدار کە بە پێچەوانەی براکەیەوە سەد ساڵ دوای نووسینی شیعرەکانی، بەهەمەکانی کۆکرانەوە و چاپکران، لەبەر خاتری ھەموو ژنە بێدەنگ کراو و پەراوێزخراوەکانی کوردستان و ھەموو جیھان پێویستە بەردەوام بین لە خەباتدا، پێبکەنین، ھیوامان ھەبێت. بژی خەباتی ژنان لە ڕۆژھەڵاتی کوردستان و ئێران. ھەتا ئەبەد: ژن، ژیان، ئازادی! [1]
#چۆمان ھەردی#

هەڵدەستمەوە
شەونمەکان جارێکی تر سەرنجم ڕادەکێشنەوە
شنەشنی درەختەکان
زەردەخەنە بۆ سەر لێوم دەگێڕنەوە
دوبارە من هەڵدەستمەوە

دەستەکانم دەکەونەوە قسەکردن
چاوەکانم کە دەمێکە نوقمی خەمن
پڕدەبنەوە لە بریقە، پڕدەبنەوە لە ئارەزوو
‎پێیەکانم بەهێزدەبنەوە
‎ڕێگەکان بەرەو خۆرەتاو دەمگوێزنەوە

سوپاس بۆ ئەو هاوڕێ و کەسانەی کە لە ساتە خۆش و سەختەکاندا بە ئامادەبوونیان مانایان بە ژیان بەخشی. [1]

#چۆمان ھەردی#