ناونیشانی بابەت: فیدراڵی و کۆنفیدراڵی
ئامادەکردن: #ژیان جەلال#

فیدڕاڵیەت، لەسەر بنەمای لامەرکەزیی سیاسی پێک دێت، واتە بوونی چەندین قەوارەی دەستووری لەناو دەوڵەتێکدا.
فیدڕاڵیەت، لەسەر بنەمای لامەرکەزیی سیاسی پێک دێت، واتە بوونی چەندین قەوارەی دەستووری لەناو دەوڵەتێکدا. هەر یەک لەم قەوارانە مافی ئەوەیان هەیە بنەمای یاسایی تایبەت بە خۆیان هەبێت، بەمەش لەچوارچێوەی ئەو دەوڵەتەدا چەندین دەسەڵاتی سیاسی بوونی دەبێت. واتە دەوڵەتی فیدراڵیی دەوڵەتێکی ئاوێتەیە. بەڵام دەوڵەتە ئەندامەکان کەسایەتیی دەوڵەتییان نییە.
کۆنفیدڕاڵیی، بریتیی یە لە پێکەوەبوونی چەند دەوڵەتێکی خاوەن سەروەریی تەواو، کەلەنێوان خۆیانداهاوپەیمانییەک دەبەستن بۆ دیاریکردنیی دەستەیەکی هەمیشەیی، بە مەبەستی ڕێکخستنی هەندێک کێشەی هاوبەش، کە پێی دەوترێت کۆمەڵە، یان کۆنگرە، یان کۆنگرێس، هەندێک دەسەڵاتی دەخرێتە ئەستۆ جا بەهاوبەشی بێت یان بەتەنیا. هەریەک لەم دەوڵەتانە سەربەخۆیی سیاسی، مافی پەیمانبەستن لەگەڵ دەوڵەتانی بیانیی هەیە، هەروەها دەسەڵاتێکی سنووردار بەپێی ئەوەی لە پەیماننامەی یەکگرتنەکەدا لەسەری ڕێککەوتوون دەدرێتە دەستەکە، ئەو تایبەتمەندییانەش بە ڕەزامەندی تەواوی دەوڵەتانی یەکێتییەکە دەبێت. هەندێک جار دەستوورێکیش لەنێوان خۆیان دەنووسن، ئەم سیستمە زۆربەی کات بۆ مامەڵەکردنە لەگەڵ بابەتە هەستیارەکانی وەک بەرگریی، کاروباری دەرەوە، یان دراوی هاوبەش، نموونەی کۆنفیدراڵی سەردەم، وەک؛ (یەکێتیی ئەوروپا، ئۆپیک، ناتۆ) .
دەتوانرێت سیستمی فیدراڵی بگۆڕدرێت بۆ کۆنفیدراڵیی، نموونەی ئەوەش: بەر لەهەڵوەشانەوەیی یۆگۆسلاڤیا، (سلۆڤینا و کرواتیا) ، لە ساڵی 1989-1990، (سربیا ومۆنتینیگرۆ) لە ساڵی 2000 سیستمەکەیان گۆڕی بۆ کۆنفیدراڵی. هەروەها کۆماری عەرەبی یەکگرتوو (میسرو سووریا) ، لە ساڵی 1958-1961 کۆنفیدراڵیی بوو.
، ، =KTML_Bold=جیاوازیی نێوان فیدڕاڵیی و کۆنفیدڕاڵیی:=KTML_End=
1- کۆنفیدراڵی، بەسیستمێکی نێودەوڵەتی دادەنرێت و دەکەوێتە نێو چوارچێوەی، گشتی نێودەوڵەتییەوە، بەڵام فیدڕالی بەپێی دەستوور پێکدێت، واتە سیستمێکی نێوخۆییە، دەکەوێتە ناو چوارچێوەی یاسای گشتی نێوخۆوە.
2- لەکۆنفیدراڵیدا، دەوڵەتە بەشدارەکان سەروەریی ناوخۆیی ودەرەکییان هەیە، بەڵام لە فیدراڵیەتدا، دەوڵەتانی ئەندام لەسەر ئاستی دەرەوە بۆ دەوڵەتە نوێیەکە کە دەوڵەتی فیدڕالە تەنازول دەکات، بەڵام لە کۆنفیدرالدا دەوڵەتێک نییە لەسەرووی دەوڵەتە ئەندامەکانەوە، بەمەش خاوەن سەروەری نابێ.
3- لەکۆنفیدراڵیدا ئەو دەستەیەی پێکدەهێنرێت ئیرادەی لەسەروو ئیرادەی دەوڵەتە ئەندامەکان نییە، بەڵام لەفیدراڵیەتدا دەوڵەتی ناوەندی ئیرادەو دەسەڵاتی لە سەرووی دەوڵەتە ئەندامەکانەوەیە.
4- لە کۆنفیدراڵیدا، وڵاتانی ئەندام یەکێتییەک پێکدەهێنن، بەڵام لەفیدراڵیدا وڵاتێکی یەکگرتوو پێکدێت.
5- هەموو بڕیارەکان لەسیستمیی کۆنفیدراڵی دەبێت بەڕەزامەندیی هەموو دەوڵەتە ئەندامەکان بێت، لەفیدراڵیەتدا مەرج نییە، تەنیا ڕەزامەندی سێ لەسەر چواری ئەندامانی بەسە.
6- ئەو دەستانەی پێکدەهێنرێت لە یەکێتیی کۆنفیدراڵیدا، دەسەڵاتی بەسەر وڵاتانی ئەندام نییە، هەر وڵاتەو سەروەریی خۆی پارێزراوە، بەڵام دەوڵەتی فیدراڵ دەسەڵاتی بەسەر وڵاتانی ئەندام وهاووڵاتییەکانیشیدا هەیە.
7- یاساناسانیی قوتابخانەی کلاسیکی پێیان وایە، دەوڵەتی فیدراڵی کەسێتیی مەعنەوی یاسایی هەیە، ئەم کەسێتییە بۆ دەوڵەتە فیدراڵەکەیە، بەڵام لە کۆنفیدراڵیدا لەبەرئەوەی تەنیا یەکێتییەکە و نەبووەتە دەوڵەتێکی یەکگرتوو، کەسێتی یاسایی نییە.
8- لە کۆنفیدراڵیدا، دادگایی باڵا بوونی نییە بۆ یەکلایکردنەوەی ناکۆکییەکانی نێواندە دەوڵەتانی ئەندام، تەنیا لە ڕێی دەستەکان وبەپێی ئەو پەیماننامەیەی دەیبەستن هەوڵی چارەسەری ناکۆکیەکان دەدەن. بەڵام لە فیدراڵیەتدا دادگایی باڵای دەستووری هەیە.
9- لەکۆنفیدڕاڵیدا جیابوونەوە مافێکیی یاساییە بۆدەوڵەتانی ئەندام، بەڵام لە فیدراڵیدا جیابوونەوە ڕێگەپێدراو نییە.
10- لە کۆنفیدراڵیدا، وڵاتان ڕەگەزنامەی خۆیان هەیە بۆ هاووڵاتییەکانیان، هاووڵاتی وڵاتێکی تر بە بیانیی دادەنرێت. بەڵام لە فیدراڵیەتدا هەموو وڵات و هەرێمەکان یەک ڕەگەزنامەیان هەیە.
11- لە کۆنفیدراڵیدا، شەڕو ناکۆکیی نێوان ئەندامان بە شەڕێکی نێودەوڵەتیی دادەنرێت، چونکە هەموو وڵاتان سەروەریی خۆیان هەیە، بەڵام لە فیدراڵیەتدا بە شەڕی ناوخۆ دادەنرێت.
12- یەکێتیی کۆنفیدراڵیی چەند وڵاتێکن یەکێتییەک پێکدەهێنن، بەڵام فیدراڵیەت چەند وڵات و هەرێمێک وڵاتێکیی یەکگرتوو پێکدەهێنن.
13- حکومەتی فیدراڵی ڕێگە بەهەرێمەکان نادات هێز دژی هیچ وڵاتێک بجوڵێنن. بەڵام لە کۆنفیدراڵیدا ئەم مافە بوونی هەیە.
14- هەرێمی فیدراڵ ناتوانێت ببێت بە ئەندام لە نەتەوە یەکگرتووەکان، کۆنفیدراڵ دەتوانێت.
15- وڵاتانی کۆنفیدراڵ دەستووری تایبەت بە خۆیان هەیە، بەڵام لە فیدراڵیدا یەک دەستوور بوونی هەیە.
16- کۆنفیدراڵیەت بەپێی ڕێککەوتننامەی نێودەوڵەتیی درووست دەبێت، بەڵام فیدراڵیەت بەپێی دەستوور. [1]

نووسینی: عارف باوەجانی.
$لەم وتارە باس لەم خاڵانەی خوارەوە دەکرێت$
1- دەستپێک: مێژووی کورد لە پەیماننامەی سیڤەر و خۆرهەڵاتی ناڤین.
2- پێناسەی پەیماننامەی سیڤەر
3- ئاسانکارییەکانی سیڤەر بۆ سەربەخۆیی کوردستان.
4- باشوری وڵات بەرەو کۆنفیدرالی ڕیگەی بۆ خۆشکراوە.
5- کورتەیەک لە سەر کۆنفیدراڵی یاخود کۆنفیدراسیۆن (Confederation)
6- نموونەی چەند یەکێتی و کۆنفیدراڵییەکی مێژوویی.
One hundred and two years after the Treaty of Sevres. Confederation is the best chance to get South Kurdistan KRG out of this cage. By Arif Bawecani
مائة واثنان سنة بعد معاهدة سيفر. کونفدرالية هو أفضل فرصة لإخراج جنوب کوردستان من هذا القفص.
دەستپێک: ڕووداوەکانی مێژووی خۆرهەڵاتی ناوەڕاست و پێشهاتەکانی ئەو سەردەمە لە سەر ئەو سنوورانە، ساڵانە بۆنی نوێبوونەوەیان لێدەکرێت ولاپەڕەکان دووبارە هەڵدەدرێنەوە پێداچوونەوەیان پێدادەکرێت. لەم ئان و ساتەدا کە 102 ساڵ بە سەر ڕێکەوتننامەکەی سیڤەردا تێپەڕدەبێت، بینەرو بیسەری کۆمەڵێک ڕووداو گۆڕاونکاری ناوچەکانی خۆرهەڵاتی ناڤینین. کە بەرچاوترینیان، ئاشتی عەرەب ئیسرائیل، پەرە سەندنی کێشەی ناوخۆیی شیعە بە شیعە. لاوازبوونی پێگەی ئێرانی لە ناوچەکانی خۆرهەڵاتی ناوەڕاست. ئاڵۆزی پەلامارەکانی ئەردووغانی تورکیا بۆ سەر کوردستان و کێشەی دیپلۆماسییەکانی لە ئاست جیهاندا. لاوازی سووریا و مانەوەی بە نیوەچڵی، و دەبینین کە سوپای وڵاتانی زلهێز لە سەر خاکەکەی تارتارێنیتی.
گەلی غەدر لێکراوی ئێمەش کە یەکێکە لە نەتەوە ڕەسەنەکانی خۆرهەڵاتی ناڤین، هەمیشە لە سەرەوەی لاپەڕەکانی ئەو مێژووەدایە. لە ڕویجینەتیکییەوە و لە ڕەگ وڕیشەشدا، بە هیچ شێوەیەک لە ڕەگەزی فارس و تورک و عەرەب نزیک نین. نە کەمینەیەکی نادیارین لە گۆشەیەکی بچووکی جوگرافیای خۆرهەڵاتی ناوەڕاستدا ژیابین، تا لە مێژووی نەیارانماندا بە ئاسانی ون بکرێین.
هەر بۆیە ئاور لە هەر جۆرە ڕێکەوتننامە و پەیماننامەو گۆانکارییەکی مێژوویی لە خۆرهەڵاتی ناڤین بدەینەوە، کە لە سەدان ساڵ پێشەوە ڕوویدابێت، یا لە سەدان ساڵ پاشتریش ڕووبدات. گەلی ئێمە لەو مێژووانە بە زەقی دیارەو ڕۆڵی کاریگەریشی بووەو دەشبێت.
ڕێکەوتننامە(پەیماننامەی) سیڤەر : سەدو دوو ساڵ پێش واتە لە 10-08-1920 لە سەردەمێکی ئاڵۆزی ناکۆکییەکانی جەمسەرەکانی ناوچەکە. پەیماننامەیەکی گرنگی مێژووی لە شاری سیڤەری فەرەنسا، کە ناسناوی پەیماننامە یا ڕێکەوتننامەی سیڤەری لێنرا، لە نێوان چەند وڵاتێک و ئیمپراتۆرێکی ئەو سەردەمەدا واژۆ کرا. لەو هاوپەیمانییە کە ئەوەی مێژوو باسی لە هێندێک لە ناوی وڵاتەکان کردووە. ئاماژە بە دەوڵەت و ئیمپراتۆرییەکەی خەلافە تی عوسمانی، و دەوڵەتانی دیکەی هاوپەیمانی لە نێوان بەریتانیا و فەرەنسا و چەند دەوڵەتێکی دیکەی ناو ئەو هاوپەیمانیە کراوە. ئەگەر دەچینە ناو وردەکاری ئەو هاوپەیمانییە و دابەشکردن و دیاریکردنی هێندێک سنوور بۆ وڵاتانێک کە ئێستا خۆیان بە زەبەلاح دەزانن، بۆمان ڕووندەبێتەوە کە نە پانتایی ئەرزیان، و نە سەرژمێر، و نە پیت و بەرەکەتی سەر خاکەکەیان، ناگات یەک بەشی داگیرکراوی کوردستان.
بەداخەوە! یا دەکرێت بڵێن لە کەمشانسی کورد لە ناو گڕێکوێرەکانی مێژوودا، لەو دابەشکردن و سنوور دیاریکردنەشدا، کورد هەر بە دەوڵەتی سەربەخۆ دیاری نەکرا. بەڵام لە چەند مادەیەکدا ناڕاستەوخۆ ڕێگە ئاسانی بۆ بەرەو سەربەخۆبوونی کوردستان کراوە.
بە شێوەی خوارەوە ئاماژە بە مادەکان وئاسانکارییەکان دەکەین:
لە سەر بڕیاری ئەو هاوپەیمانییە، بەندێک لە ژیر ناوی بەندی 62و بە سەرپەرشتی لیژنەیەکی دیاریکراوی پێوەندیدار بەو بەندەوە، پەسەندکرا، بۆ چارەسەرکردنی کێشەی کوردەکان. کە نوێنەری 3 وڵاتی گرنگی وەک بەریتانیا و فەرەنسا و ئیتاڵیا لەو لیژنەیە دەبن. ئەو سنوورانەی کە ئەو لیژنە لەو 102 ساڵ پێشە ئاماژەیان پێکردووە، هەموو سنووری کوردستانی مەزنی تا سنووری ئەرمەنستان دەگرتەوە. دوای چەندین مانگ و چەندین دانیشتنی دیکە، کە کوردیش تێیدا بەشدار بووە، پەسەند کردن و زیادکردنی چەندین بەندی دیکەی، وەک بەندی 63 و 64 لێکەوتووەتەوە.
مخابن ئەو شانسە هەر بەر کورد نەکەوت و ئەو کارەش بە دەسیسەی عوسمانییەکان و تورکەکان، تێکچوو. هۆکارە بەرچاوەکەش کە تورکەکانی تەواو ترساندبوو، ئەویش لە بەندی 64 دا بوو، کە لەو بەندەدا ڕەزامەندی تێدادرابوو. واتە بەو شێوە ئەو خاڵە پەسەندکرابوو، کە ئەگەر زۆربەی گەلی کورد لە چوارچێوەی ئەو سنوورەی، کە بە سنوورەکانی پەسەندکراوی بەندی 62 دا دیاریکرابوو. لە پاش ماوەیەکی دیاریکراو، کە هێندێک لە $سەرچاوەکان$ ئاماژە بە ماوەی ساڵێک تا 2 ساڵ دەکەن.
ئەگەر بیانەوێت و داوای سەربەخۆیی لە کۆمەڵەی نەتەوەکان بکەن، و لە ژێر دەسەڵاتی تورکیا جیاببنەوە، ئەوا مافی خۆیانەو یاساییە و ڕێگەپێدراوە، کە دەوڵەتی خۆیان ڕاگەیەنن. هەر بۆیە تورکەکان چی وەک خەڵک و چی وەک دە وڵەتەکەش بەهیچ شێوەیەک ئەو مافەیان بۆ گەلی کورد پێ ئەزم نەدەکرا. تا سەرئەنجام هەوڵێکی زۆری لۆبیگەرییان لە ڕێگەی بەخشینی ئەرزو ئاو مادییەوە خستەگەڕ، ئەو پەیماننامەیان گۆڕی و پەیماننامە شوومەکەی لۆزان واتە لە ڕێکەوتی24-04-1924 لە شۆێنی سیڤەر دامەزراند.
ئیتر لەو کاتەوە ڕێگەی یاسایی لە دروستبوونی دەوڵەتی کوردی ئاستەنگی تێکەوت، و داگیرکاری و ستەمی داگیرکەران بۆ سەر گەلی کورد لە هەموو بەشەکان پەرەی سەند.
باشوری وڵات بەرەو کۆنفیدرالی ڕیگەی بۆ خۆشکراوە.
وەک دەبینین کە تورکیا بە بیانووەکانیەوە بەرنامەی پەلاماردانی بەشی زۆری ڕۆژئاوای کوردستانی خستووەتە پڕۆژەی کارییەوە. ڕوونە کە مەترسی لە دەستدانی دەسکەوتەکانی ڕێکەوتنەکەی لۆزانی هەیە، دەیەوێت هەنگاوی زیاتر بنێت، و لە حەدی سنوورەکانی ژێر دەسەڵاتی خۆی زیاتر زیادەڕەوی دەکات. تا وڵاتان ناچار بکات بە نیوەیش لەگەڵی ڕێکەون، بۆ ئەوەی زۆر لە سنوورەکانی دەسەڵاتی سەردەمانی لۆزانی لە دەست نەدات.
دۆخی ئێرانیش ڕوونە کە لە چی حاڵێکدایە، چۆن زۆرینەی نەتەوەکانی بندەست، بەرنامە ڕێژی بۆ وەدەرنانی فارسەکان دەکەن لە سەر سنوورەکانیان. یا چۆن لە ئاست ناوخۆ و دەرەوە ڕووبەڕووی داڕمانی سیاسی و ئابووری و دیپلۆماسی بووەتەوە.
وەک دەبینین کە ئێراقی پاش2003 بەردەوام بەرەو نا ئارامی و داڕمانی سیاسی وئەمنی دەبێتەوە. ئەمەش باشترین بەڵگەیە کە باشووری وڵاتمان بتوانێت ڕێکخراوی نەتەوەیەکگرتووەکان، یا وڵاتانی زلهێز و خاوەن باوەڕ لە ناوچەکە، بهێنێتەوە سەر ئەو باوەڕەی، کە گەرەنتی پێکەوە ژیان لە نێو ئەم ئێراقەدابۆ خوودی ئێراقییە عەرەبەکانیش نەماوە، تا بگات بە مافەکانی گەلی کوردستاندا. لەوەتی ئێراق لە سەردەمانی کۆنی دەسەڵاتی خولەفاکانەوە تا سەردەمانی بە حکومەتکردنیان، بەردەوام لە نێو کێشەی ئاینی و ناوچەیی و تایفەیی بووەو دەبێت. کەوابێت ئێراقێکی یەکپارچەیی و دیمۆکرات سەرکەوتوو نەبووە، بگرە تەنیا چووەتە بواری خەیاڵ و خۆزگەوە. کردەوەکان و شەقامی ئێراقیش دەیسەلمێنن نە ئەم سەردەمە، بگرە و بۆ دەیانساڵی دیکەش چاوەڕوانکراو نییە.
ڕوونیشە کە ئاستەنگیەکانی سیاسی و نێودەوڵەتی لە ئێستادا بۆ هەنگاوی کۆتایی: کە سەربەخۆیی یەکجارییە هێشتا لەئارادایە. کەوابێت دەکرێت لایەن و دەزگاکانی باشووری وڵاتمان، لە دەوری یاسا و پڕۆسەیەکی یەکگرتوویی و تەباییەکی سەرنجڕاکێشدا، دڵنیایی بە دۆستانمان بدات، کە کوردستان بەرەو پێشکەوتن و ئاشتی و ئاوەدانییەکی باش دەڕوات. بەو شێوەیە دەتوانن کار بکەن بۆ کەڵک وەرگرتن لە ڕاگەیاندنی دەسەڵاتی باشووری وڵات بە شێوەی کۆنفیدراڵی. بۆ ئەوەی لە زۆربواردا دوورببنەوە لەو کێشەو نائارامییانەی کە پەیتا پەیتا لە بەغدا ڕوودەدات. ئەو کۆنفیدراڵیە دوای ماوەیەک بە کرداری یەکگرتووانە و پێشکەوتوانە و بۆژانەوە، بە ئاسانی ڕێگاکە خۆشدەکات بۆ هەنگاوی کۆتایی سەربەخۆیی گەلەکەمان. ئاکامی ڕێفراندۆمی2017 بەڵگەیەکی سیاسی و خواستی گەلی باشووری وڵاتە، کە بە ویستی 93٪ نایانەوێت لە گەڵ ئەم وڵاتە پڕگێژاوە بمێنێتەوە.
گەلۆ: کاتێک مێژوو شایەتیمان بۆ دەدات کە سەدو دووساڵ پێش، لە ئاست وڵات و ئیمپراتۆرە گرنگەکانی ناوچەکە حسابی زۆرمان لە سەر کراوە، بۆ دەبێت دوای 102ساڵیش هەر بە گوومانەوە و سارد و سڕی و ترسەوە باس لە مافی سەربەخۆیی گەلەکەمان بکەین. نەوەی دەیان ساڵی دیکە بە تووندی بەر ڕەخنەمان دەگرن و لێمان دەپرسن، باشە ئەوانەی سەدو دوو ساڵ پێشووتر کە ئەگەر زۆر ئەزموون و شارەزاییان نەبوو، ئەی نەوە و تێکۆشەرانی داهاتوومان بۆ نەیانتوانی لەو هەموو گۆڕانکارییانە، هەلێک بقوۆزنەوە و ڕزگارمان بکەن. وا دیسانەوە لاوازی ئێراق هەڵێکی زۆر لە بوارە لە ئاست نێونەتەوەییشدا. دەسەلمێندرێت کە گەلی کورد نزیک بە 20 ساڵ چاوەڕوانی ئێراقی نۆییشی کرد ئەویش وڵامی نەدایەوە.
لە #25-09-2017# کە هەلێکی مێژوویی گرنگ لە باشووری کوردستان هاتە ئاراوە، وێرای ئەوەی کە 93% خەڵک بە خرۆشەوە بە دەنگ ئەو پرۆسە گرنگەوە هاتن، ئەویش جێبەجێکردنی پرۆسەی ڕێفراندۆم بۆ باشووری کوردستان بوو. کەچی ئەوەندەی لایەن و هێندێک بە ناو ڕووناکبیری کورد، تا ئێستاش لۆمەی ئەو ڕێفراندۆمە دەکەن، ئەوەندە لە داگیرکەرانی کوردستان نابیستین. هێندێک دەڵێن ئەو ڕێفراندۆمە وایکردووە، کە بووجە نەماو، وەک ئەوەی وابێت ئەو هەموو مێژووی خەباتەی کوردستان، تەنیا لە پێناو مووچەو پارە بووە کە داگیرکەران بۆمان بنێرن. یا هەندێک دەڵێن ئەگەر ئەو ڕێفراندۆمە نەبایە، #کەرکووک# و ناوچەکانی دیکە لە دەست نەدەدران، لە حالێکدا ئەو ناوچانە تەنیا لە سەردەمانی هاتنی داعشدا دەس کورد کەوتبوونەوە.
هەموو بەڵگەو لێدوانەکانی بەرپرسانی ئێراقی شایەتی لەوە دەدەن، کە ڕێفراندۆم بکرایە یا نەکرایە، ئەوان لە پاش شەڕی داعش هێزەکانی خۆیان بە پشتیوانی تەواوی ئێران دەهێنایەوە بۆ ئەو شوێنانەو، و ئەو گێچەڵەیان هەر بە گەلی کورد و باشووری وڵاتمان دەکرد.
بەو هیوایە کە گەلەکەمان بەو هەموو ڕووداوانەی لە مێژوودا تووشی دەبن، لە ویستی سەربەخۆیی نەکشێنەوەو کۆڵنەدەن، و بگرە فشارە نێونەتەوەییەکان بۆ بە دەستهێنانەوەی ئەو مافە ڕەوایانە هەر لە سەر مادەکانی 62 و63 و64ی پەیماننامەی سیڤەری ساڵی 1920 دووبارە بهێننەوە، ناو کۆڕ و کۆبوونەوەی نەتەوە یەکگرتووەکان و ڕێکخراوە گرنگەکانی جیهان.
کورتەیەک لە سەر کۆنفیدراڵی یاخود کۆنفیدراسیۆن (بە ئینگلیزی: Confederation)
بۆ هەرکام لەم چەمک و وشانە، مێژووییەک یا هۆکارێک هەبووە کە هۆکاری سەرهەڵدانی بوون. وشەیەکی فەرانسییە و لە ناوەڕۆکدا مانای یەکێتی ویەکبوون و هاوبەشی دەدا.
بۆ یەکەمجار لە مێژوودا چەمکی کۆنفیدراڵی لە وڵاتی سویسرا وەک چارەسەری گوونجاو بۆ هەرێمە جیاوازەکانی ئەو وڵات پێکهاتبوو. چوون لەو سەردەمانە واتە سویسرای کۆن، خاک و جوگرافیای ئەو وڵاتە تایبەت بە یەک نەتەوەو زمان و ڕەگەز نەبوو. بەڵام چەند نەتەوەیەکی هاوسنوور بوون. دواتر کە هەموو نەتەوەکان خۆیان لەم ولاتەدا بە خاوەن خاک و ماف بینییەوە، لە سەر ویستی خۆیان لە کۆنفیدراڵییەوە گەڕانەوە بۆ سوسیرایەکی فیدراڵی.
کۆنفیدراڵی یا کۆنفیدراسێونی، واتای بوونی وڵات و کیانێکی سەربەخۆی تەواو، بەڵام وەک ئاڵیانسێک یا جۆرە ڕێکەوتنێک و هاوبەشییەک لە نێوان چەند دەوڵەتێکی سەربەخۆ و هاوسنوور درووست دەبێت. واتە ئەو دەوڵەتانە بێجگە لە ڕاپەڕاندنی کاری خۆیان وەک دەوڵەتێکی تەواو سەربەخۆ، هاوکات پێکەوە لیژنەیەکی کاری هاوبەشیان دەبێت، بۆ هەبوونی هەماهەنگی لە سیاسەتەکانی هاوبەشیان. وەک نموونەی هێزی بەرگری هاوبەش بۆ پاراستنی سنووری ئەو وڵاتانە پێکەوە، وەک گۆڕینەوەی وزەی هاوبەش، وەک سیاسەتی هاوبەش لە ئاست نێونەتەوەییدا و زۆر خاڵی دیکەش کە لە نێو یەک ناوی هاوبەشدا. بەڵام هەرکات هەر کام لەو وڵاتانی ئەندام لەو کۆنفیدراسێونە بە دەنگدانی زۆرینەی پێکهاتەکان بیانەوە لەو هاوبەشییە جیا دەبنەوە. کەوابێت کوردستانیش بەو پێناسە دەتوانێت کۆنفیدراڵی ڕاگەیەنێت، ئەگەر باشی ئێراق وایکرد، کوردستان بگەڕێتەوە بۆ فیدراڵی، یا پێچەوانەکەی ئێراقی نا ئارام ناچاری بکات بۆ سەربەخۆیی یەکجاری.
لە مێژووە کۆنەکان زۆر سیستەمی کۆنفیداڵی هەبوو، خوێنەر بە هەموویەوە ماندوو ناکەم، من لێرەدا تەنیا ئاماژە بە چەند نموونەیەکی گوونجاو هاوشێوە دەکەم. کە چۆن دوای ماوەیەک پێکەوە کارکردن، لایەنی مەبەستدار بە ئاسانی یا گەڕاونەتەوە ناو وڵات یا بە تەواوی لێی دابڕاون.
$نموونەی چەند یەکێتی و کۆنفیدراڵییەک.$
1- کە باشترین نموونە هەر لە مێژووی ئێراقدا. درووستبوونی یەکێتی عەرەبی(یەکێتی هاشمی) بوو لە نێوان هەردوو دەسەڵاتی پاشایەتی عێراقی وئوردن، هاوشێوەی کۆنفیدرالی لەساڵی1958. لە پاش پێنج مانگ بە هۆی شۆڕش یا کۆدیتای 58 لە ئێراقدا. کۆتایی بەو کۆنفیدراڵیە 2 پاشایەتییە هێنرا.
2- کۆماری عەرەبی یەکگرتوو، کە یەکێتیەکی کۆنفیدراڵی بوو لە نێوان میسر و سووریا و باکووری یەمەندا لە ساڵانی 1958-1961دا. ئەوان کە یەک نەتەوەو یەک زمان و یەک کولتور و یەک ئایینیش بوون، بەڵام چوون پێکەوە نەسازان دوای3 ساڵ کۆتاییان پێهێنا.
3- یەکێتی سۆڤیەت یا یەکێتی کۆمارە سۆشیالیستەکانی سۆڤیەت، بە شێوەی کۆنفیدراڵی پێکهێنەری (دەوڵەتێکی هاوبەشی سۆشیالیستی زلهێز بوو لە نێوان ئاسیا و ئەورووپادا. کە لە ساڵی 1922دا دامەزرا، لە 26-12-1991 هەڵوەشا و کۆتاییهات. هۆکارەکەشی سەرهەڵدانی هەژاری و لاوازبوونی دەسەڵاتی چەند وڵاتێکی ئەندام تێیدا.
4- نموونەی سڕبیا و چیای ڕەش، کە لە نێوان ساڵانی 1982 تا 2006 بەڵام بە هۆی سەرنەکەتوویی چەند وڵاتێک لەو کۆنفیدراڵیە، چوونە دەرەوە و کۆتایی پێهات.
5- کۆنفیدراڵیەتی سێنیگال و گامبیا، لە ئەفریقا لە ساڵانی 1982-1989
6- یەکێتی نێوان شانشینی یەکگرتوویی سوید و نەرویج لە ئاکامی ڕێککەوتنی مۆس لە14-08-1814 درووستبوو. دوای پەسەندکردنی یاسایەکی تایبەت بە سەربەخۆیی نەرویج کە لە 17-05-1814 ئامادەکرابوو. لەو ڕێکەوتەوە لە ڕووی یاساییەوە نەرویج پێگەی دەوڵەتی سەربەخۆیی هەبووە، لە1905بەڕێکەوتنێکی ئاشتیانەی دوولایەنە لەگەڵ سوید، وڵاتی نەرویج یەکلایی بوونەوەی خۆی وەک وڵاتێکی تەواو سەربەخۆ و جیا ڕاگەیاند.
7- یەکێتی یا کۆنفیدرالێ نێوان دەوڵەتانی ئەفریقا هەندێک جار پێی دەوترێت یەکێتی غانا-گینیا-مالی، لە ساڵی 1958 پێکهات. بەڵام لە ساڵی 1963 هەڵوەشایەوە.
8 - کۆنفیدراڵی وڵاتانی یوگۆسلاڤیا لە 1992 تا 2003 زۆربەیان لێ جیابووەنەوە. لە نێوان 2003 تا 2006 مونتینیگرۆ و سربیا کە 2 وڵاتی پاشماوەبوون لەو کۆنفیدراڵیە گەورەیە مانەوە. بەڵام لە 2006 مونتینگیرۆش سەربەخۆیی خۆی ڕاگەیاند و کۆتایی بە تەمەنی ئەو مێژووەش هات.
سەرچاوەکان:
1- کوردەکان نووسینی: حەسەن ئەرفەع.
2- کوردستان و کورد. نووسینی: د عەبدولڕەحمانی قاسملوو.
3 - کتێبی کوردستان و ستراتیژیی دەوڵەتان، لەنوسینی حسێن مەدەنی،
4 - هەنگاوەکان بەرەو سەربەخۆیی: نووسینی عارف باوەجانی.
5 / چەند سەرچاوەیەکی کتێبی و دیگیتاڵی مێژووی وڵاتانی کۆنفیدراڵی
[1]

ناونیشان: کۆنفیدراڵی ئێراق بەهێزدەکاتەوە
نووسەر: #هێمن عەبدوڵڵا#
ڕۆژی دەرچوون: #04-11-2019#
لە ڕاڕەوی یەکێک لە بەشەکانی باڵەخانەی پەڕڵەمانی کەتەلۆنیا، لەگەڵ سەرکردەیەکی سۆسیالیستەکانی ئەو وڵاتە، بەدەم ڕۆیشتنەوە قسەمان دەکرد. قسەی پاش هەڤپەیڤین هەمیشە لە قسەی نێو هەڤپەیڤین باڵکێشترن. بەتایبەتیش کە باسەکە باسی فیدراڵیزم بێت و لەگەڵ یەکێک بێت کە لەکاتێکدا خەڵکی وڵاتەکەی داوای سەربەخۆیی دەکەن، ئەو و حیزبەکەی بێن و داکۆکی لە فیدراڵیزم بکەن. لەوەش تایبەتتر ئەوە بێت کە سەرۆکوەزیرانی ئیسپانیا سۆسیالیست بێت و لەبەر ڕاستڕەوەکانی وڵاتەکەی و لە سەروبەندی هەڵبژاردنەکاندا نەوێرێ خۆی لە باسی فیدراڵیزم بۆ کەتەلۆنیا بدات.
لە هەڤپەیڤینەکەماندا پرسیارم لەسەر ئەوە لێکرد کە لەکاتێکدا لە ئەزموونی کوردستان و ئێراقدا دەرکەوتووە فیدڕالیزم چارەسەرێکی نموونەیی نییە بۆ کێشەی نەتەوایەتی، چۆن دەکرێ بۆ کەتەلۆنیا نموونەیی بێت. وەڵامەکەی زۆر سیاسییانە بوو، بۆیە پاش هەڤپەیڤینەکە دەمەویست بە زمانێکی سادەتر قسەی لەگەڵ بکەم. قسەکانمان هاتنە سەر باسی کۆنفیدراڵی و پێموت بۆ گەلی وەکوو کوردستان و کەتەلۆنیا کە جەبری جوگرافیا و زۆر هۆکاری دیکە وادەکەن خەونی سەربەخۆییان نەکرێ وەدیبێت، داواکردن و پێداگیری لەسەر کۆنفیدراڵی بۆ درێژمەودا ڕاستترە.
ئەو کە خۆی لێکۆڵەری یاساییە و باوکی کۆنگرێسمانی ئیسپانیا بووە و دایکیشی پەڕڵەمانتار، پێیگوتم ساڵانی زۆر لە کۆنفیدراڵیی کۆڵیوەتەوە و وڵاتێک ناناسێ کە ئەو سیستمە تێیدا سەرکەوتوو بووبێت. نموونەی سویسرام بۆ هێنایەوە، پێکەنی و گوتی: بڕوا بکە ئەویش هەر فیدراڵییە و بەناو کۆنفیدراڵییە. بەڵام ئەویش دەیوت کەیسی کوردستان تایبەتە و مادام فیدراڵی سەرکەوتوو نەبووە و تەنیا یەک هەرێمی فیدراڵی لە ئێراقدا هەیە و ناشکرێ کوردستان سەربەخۆ بێت، ڕەنگە داواکردنی کۆنفیدراڵی واقیعیتر بێت.
ئەو گفتوگۆیە چەند مەترێک دوور لەو هۆڵە کرا کە ساڵی 2017 سەرکردەکانی کەتەلۆنیا تێیدا کۆبوونەوە و پاش گشتپرسییەکەیان خواستی جیدیی خۆیان بۆ جیابوونەوە لە ئیسپانیا ڕاگەیاند. ئەوکات من لە کوردستان بووم و چەند هەفتەیەک پێشتر لەگەڵ هاوڕێیەکم گفتوگۆیەکمان هەبوو لەگەڵ کەسێکی زۆر نزیک لە لوتکەی بڕیاری سیاسی، لەسەر دەرهاویشتە چاوەڕوانکراوەکانی گشتپرسیی سەربەخۆیی کوردستان. ئەو پێیوابوو ئەگەر بتوانین لە فیدراڵییەوە بچینە قۆناخی کۆنفیدراڵی شتێکی باش دەبێ.
ڕاستییەکەی ئەوکاتیش هەموو کەس دەیزانی بەو هەموو دوژمنکارییەوە و بەو واقیعەش کە هەیە ناکرێ یەکسەر سەربەخۆیی جاڕبدرێ و لە بەرژەوەندیی کوردستانیشدا نییە ئەوە بکات، بەڵام بەداخەوە خیانەتەکەی شازدەی ئۆکتۆبەر وایکرد نەتوانین لە پێگەی هێزەوە ئەو دانووستاندنە بکەین.
ئێستا کە باسی بەناو چاکسازی لە دەستووردا و بەکردەوە هەڵگەڕانەوە لە دەستوور لە ئێراق هاتووەتە ئارا، هەقوایە لەجیاتی داواکردنی دەستکارینەکردنی فیدراڵیزم و پاڕانەوە، ئێمەش هەم لەگەڵ دۆستەکانمان و هەم لەگەڵ ڕەقیبەکانیشمان باسی کۆنفیدراڵی بکەین، کە بە هەموو پێوەرێک چارەسەری هەرە گونجاو و گەرەنتیکراوە بۆ ڕێکخستنەوەی پەیوەندییەکانی #هەولێر# و بەغدا. ڕێگەگرتنیشە لە دابەشکردنی ئەو ئێراقەی هەمووان دەزانن کۆتایی هاتووە، بەڵام دەبێ بۆ ماوەیەکی دیکەش بە یەکپارچەیی بمێنێتەوە.
سەرۆکوەزیرانی ئێستای ئێراق یەکێک بوو لەو کەسانەی بە تێگەیشتنەوە بڕوای بە کۆنفیدراڵی هەبوو بۆ ئێراق و نموونەشی بەو سیستمەی ئیمارات دەهێنایەوە کە هەر میرنشینێک نیوە دەوڵەتێکە و ئەو یەکێتییەی هەیانە بەهێزتری کردوون. ڕاستییەکەی بۆ ئێراقیش هەر وایە و فیدراڵی هەمیشە وەک بۆمبێکی تەوقیتکراوە هەم بۆ چەوساندنەوەی کورد و هەم بۆ دابەشبوونی ئێراقیش، بەڵام بەپێچەوانەوە کۆنفیدراڵی بەهێزتری دەکات و کێشەکانیشی زۆرزۆر کەمدەکاتەوە. [1]