گەلێک چەپڵە بۆ دوژمنەکانی لێدەدات
ماڵئاوا پەڕڵەمانی کوردستان
بەشی دووەم و کۆتایی
د #کامەران مەنتک#
#14-06-2023#
ئەو دۆخەی ئێستا لە هەرێمی کوردستان دەگوزەرێت، ڕێک لە ساڵی (1972) دەچێت، کاتێک پلانی بنکۆڵکردنی ئەو بزووتنەوە چەکدارییە بەڕێوە دەچوو، کە لە مێژووی کورد دا بە شۆڕشی ئەیلوول دەناسرێت، ئەگەر شەڕی ئیسرائیل – عەرەب 1973 ئاسۆکەی دەرنەکەوتبوایەو دواتریش ڕووینەدابوایە، ئەوە ئەو بزووتنەوە چەکدارییەی، کە زیاتر لە 14 ساڵ خوێنی گەنجانی کوردی لە پەنای دروشمی گەورەو قەبەی ناسیونالیستی وکوردایەتی کرایە قوربانی، هەر لەو سالەدا بە کۆتا دەهات و ڕێکەوتنامەی جەزایر لەو ساڵەدا گرێدەدرا، کە ئەگەر وابوایە کورد زیانی کەمتری بەردەکەوت وژیانی هەزاران مرۆڤیش ڕزگار دەکرا!.
ئەو پاشا گەردانی و نابەرپرسیاریەتییەی هەندێک نووسەر و مێژوونووسی بەویژدان، کە ژمارەییان زۆر کەمەو لە پەنجەی دەست تێناپەڕن، دەربارەی ئەو قۆناغە بۆمانی دەگێڕنەوە، ئەوە دەسەلمێنێت، کە ئەو دوێنێیە بە تەواوی لە ڕۆژگاری ئەمڕۆمان دەچێت، دزی و گەندەڵی، تاڵانی وقاچاخچییەتی، برسیکردنی خەڵک، .... هتد، سەرباری بوونی پارەیەکی بێشوومار، سیمای قۆناغی دوێنێ و ئەوەی ئێستان، لە ئێستادا بەڕوونی ئەوە هەست پێدەکرێت، کە بەرپرسەکانی کورد ماڵی خۆیان دەپێچنەوە و خۆیان بۆ ماراسۆنێکی تر تر ئامادە دەکەن، جگە لەوە ئەو دۆخە هیچ خوێندنەوەیەک لە خۆوە ناگرێت، نەوت ڕادەستی بەغدا کرایەوە، پەڕڵەمان، کە خەونی ملیۆنان مرۆڤی کوردە، بەبڕیارێکی دادگای فیدڕاڵی، کە ئەو دادگایە لە بنەڕەتدا ئەو شەرعیەتییەی نییە بڕیار لەسەر چارەنووسی پەڕڵەمانی کوردستان بدات، چونکە کورد بەویستی ئەو دادگایەو سیستەمی سیاسی لە ئێراق هەڵبژاردنی نەکردووە و پەڕڵەمانی هەڵنەبژاردووە، دەرگاکانی خۆی داخستووەو ئەندام پەڕڵەمانەکانی ڕەوانەی مالەوە کردۆتەوە، دوای ئەوەی خۆیان ئەو پەڕڵەمانەیان هیندە بێبەها کرد، کە خەڵک بەدواداچوونێکیشی بۆ نەکات وەک خائینێک بڵێت بڕۆ بەغدا نیوەی ڕێگەت بێت ( ) !
لەوە سەیرتر هەیە میللەتێک پەڕڵەمانەکەی دابخرێت و نقەی لێوە نەیەت! هۆی ئەمەش وەک پێشتر ئاماژەی پێکرا دەگەڕیتەوە بۆ بێەهاکردنی پەڕڵەمان، بە تایبەتی لەو دە ساڵەی دوایی، کە خەڵکی وا نێردراییە پەڕڵەمان، نەک شایەنی نوێنەرایەتیکردنی خەڵک نەبوو، بەڵکوو نوینەرایەتی خۆیشی پێنەدەکرا!. نەک خەڵکی هەرێم بە تەنیا، بگرە هێزە سیاسییەکانیش هەموو گرەو لەسەر ئەوە دەکەن، کە لەبەرئەوەی کۆمیسیۆنی هەڵبژاردنەکانی کوردستان ماوەی بەسەرچووە، پێویستە کۆمیسیۆنی ئێراق هەڵبژاردنی ئاییندەی هەرێم بەڕێوەبەرێت، ئەو بیرکردنەوەیە بەتەواوی پێچەوانەی ئەو شۆڕگشێڕی و وڵاتپارێزییەیە، کە بانگەشەی بۆ دەکەن، کەی ئێراق ویستوویەتی کورد پەڕڵەمانی هەبێت، تاوەکوو خۆی ئاسانکاری بۆ بکات! بەڕای من ئەو چاوەروانییە لە بەغدا لە چاوەڕوانی گۆدۆ دەچێت، وەک خەونی حوشترە و نایەتەدی، گرەو کردنیش لەسەر ئەو خەونە واتای چاوەڕوانکردنی تێپەڕینی کات و تەواوبوونی ئەو گرێبەستەیە، کە بۆ تێکدانی ئەو دەرفەتەی کورد، ئەو هێزە بەناو کوردیانە لەگەڵ داگیرکەرانی کوردستان بەستوویانە، جێگەی داخە، ئەو ڕەفتارانەی لە ماوەی سی ساڵی ڕابردوودا ئەو هێزانە بەرانبەر کورد کردیان، جگە لەوە هیچ خوێندنەوەو شیکردنەوەیەکی تر بەخۆوە هەلناگرێت، کە کۆمەڵێک چەتەی چەکداربووینەو مەسەلەی میللەتێکیان وەک ئامڕازیک بەکارهێناوە بۆ دەوڵەمەندکردنی خۆیان، ئەگینا هەرگیز بەو خوێن ساردییە ڕەفتاریان نەدەکرد، لەکاتێکدا میللەت ڕۆژبەڕۆژ زیاتر ڕیسسوا دەبێت و ئەو خەونەی کورد ڕۆژبەڕۆژ تاڵتر دەبێت و دەبێتە ژەقنەبووت!.
وەک لە زۆر شوێنی تر ئاماژەمان بۆ کردووە، ئەم دۆخە بەکۆتایی قۆناغێک دەچێت، پێدەچێت ئەو هێزانەش ئەو ڕاستییە باش بزانن وقبووڵیشیان بێت، ئەگینا واتای چییە هەموو دنیا دەڵێت پێویستە هێزی پێشمەرگە یەکبگرێتەوە، کەچی ئەوان ڕۆژبەڕۆژ زیاتر لەیەکی دەترازێنن! هێزێک، ئیرادەی لەدەستی حکومتێکدا بێت، کە حکومەتی کاربەرێکەر بێت وشەرعیەتی نەمابێت، بێگومان ئەو هێزەش شەرعیەتی نامێنێت، بۆیە یەکەم بیانوو لە ئاییندەدا بۆ لێدانی هەرێم ناشەرعیبوونییەتی، واتای چییە حکومەتێک تەنیا بەناو یەکگرتوو بێت و پەڕڵەمان نەمابێت و لەبەر گەندەڵی نەتوانێت مووچەی فەرمانبەرەکانی دابین بکات، هەر بەرپرسەی هێزێکی خۆی هەبێت ولەناو کۆمەڵگەی نێودەوڵەتیش شوێنی ببێتەوە! ئەگەر تا ئێستا دۆخەکە لەرکابەری وململانێیەکدا بوو بێت ئەو دۆخەی هەزم کردبێت، ئەوا ئەو دۆخە تا سەر بەو شێوەیە نامێنێتەوە ولەچرکە ساتێکدا سازشەکان دەگەنە ئامانج و دۆخێکی وا دێتە ئارا، کە ئەو قەوارەی پێ نامۆ بێت، بۆیە دەبێت لە ئێستاوە ڕۆشنبیرو دڵسۆزانی ئەو وڵاتە لەخەمی ئەوە دابن، کە ئەگەر ئەمجارەشیان ئەو هێزانە ڕایانگەیاند، کە ئەرکی ئەوان تەواو بووە وخۆیان ملیۆنان دۆلار ڕایانکرد بۆ وڵاتانی تر، دەبێت خەڵکی کوردستان چی بکات، ئایا دەبێت ڕێگە بدات، جارێکی تر کۆمەڵێک هەلپەرست و بەکرێگیراویتر بەناوی شؤڕشەوە خەڵک فریوبدەن و لاپەڕەیەکی تاریکتر دەست پێبکەنەوە! یاخود دەبێت لەسەر بنەمایەکی جیۆستراتیژییەوە بە پەیوەندییەکانی خۆیان لەگەڵ دەوروبەریان دابچنەوەو شۆڕشێکی کۆپەرنیکییانە لە شێوازی بیرکردنەوەی کوردی بهێننە ئارا! ئەوە ئەو پرسیارەیە جدییەیە، کە دەبێت شەقامی کوردی خۆی بۆ وەڵامدانەوەی ئامادەبکات![1]
Dieser Artikel wurde in (کوردیی ناوەڕاست - Central Kurdish) Sprache geschrieben wurde, klicken Sie auf das Symbol
![](https://www.kurdipedia.org/images/flags/ku.png)
, um die Artikel in der Originalsprache zu öffnen!
ئەم بابەتە بەزمانی (کوردیی ناوەڕاست - Central Kurdish) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Dieser Artikel wurde bereits 235 mal angesehen
Schreiben Sie Ihren Kommentar zu diesem Artikel!