چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و ویس و یەکەمە
سەرنام: تووشبییەی بە نەوەشی سیلی و لوای پەی (بەحنەس)ی
دەمئەژمار پەڼجو ساعبی تاکو دواڼزەو نیمەشەوې دلې گەرماو چل و هەشت و پەنجا پلانە، دلې دوکانینە بە تەنیا و بە پێوە مدرېنا، نان و ساعبی و نیمەڕۊیم نان و شەربەت بې، فرە زاییف بییەبېنا؛ ڕەمەزانیچم گېرت، پڕێنە نەوەش کۆتا. لوانې پەی بیمارستانو (مەجیدیە). دمای حۆت ڕوا بې ئانەی خاس بووە، واتشان لوە، تومەز نەوەشی سیلیمەن و پەنەشان نەواتەنان. یەرمیا ماچۊ: هەرمانێ عالەم سەرو کەشتی دلې دیجلەی پەی پېڎا کەردەنی. دووکانەکەش پەی ورەتا؛ دمای ئانەی قەرزەکېم دێوە، هەشتا دینارېم پەی مەنۆ. ڕۊ بە ڕۊ خرابتەر مەبېنا. عومەر دەبابەی کۊیی، جە تەرەفو حېزبو پارتییۆ ئاما کە ئېمە هاگامان چەنەت مەبۊن. ڕوانە مەبەرېم پەی لاو دکتور نەجیب مەحمووڎ نامێ، چەنی و دەرمانم پەی مەنویسې. هەر دەوێوەم پەی مەنویسې هیچ دەرمانخانێ نەبېش بېجگە یەک یاگی، فرەیچ گران بې. دمایی پەنەمان زانا کە ئی دکتۊرە ساحېبو دەرمانخانەکەین و دەرمانەکا بەنامێ سڕڕییە مەنویسۊ، کەس سەرەش چەنە بەرنمەکەرۊ. ئیجازەو لوای نەوەشە سیلدارایچ بە دەسو ئاڎی بې. تاکو نەوەش قرانێش پەنە مەنێ نازې چېرو دەساشەنە بەربشۊ!
یاوانې ئانەی ۋڼی ئارېناوەو چەمېم کەم حوکمې بیېبېنې، بەردانېشا پەی ئوتیلێ، بېژنانېشارەو بە کۊڵې مەبەرېنېم پەی لاو حەکیمی. کاکە زیاد کوڕو حەمەئاغاو کۊیەی، کە کوردێ دڵسۊز بې، هەرچن خەرجی مەنەیۆ دلې ئوتیلې و دا و دەرمانیش وستەبې سەرو وېش، حۆلې مەڎې بکیانۊم پەی لبنانی.
با ئانەیچم ویرنەشۊن: چا کاتۆ کە ئامابېنا پیڎیمەرە تەنیا یەرې جارې شېعرېم واتېبېنې، یوەشام پەشتەو وېنێوەنە چەنی سدېق حەیدەری نویستە کە سەرەتاکەش: (بە دەربەدەری یام جە یانەو وېم...) و جوابەنامە شېعریێ پەی قزڵجی و ئەچا ئوتیلېچەنە: (پەی کېلەو قەبرەکېم) و (وەشی دماڕۊی).
عەلی حەیدەر سڵېمان، کە کوردێ بې، بییەبې شالیارو لەشساقی، بە خاترەو کاکە زیادی یاگېش پەی گېرتا و بە پەساپۊرت کیاستاش ئاساییشگاو (بەحنەس) جە کەشو لوبنانی سەرو حیسابو حکومەتی. وەر چانەی بلوون، دلېیانەکەم دا بە عەزیزی نانەوای؛ کە بې یانە نەبۊ و هەرمانەو چاپخانەکەیش بکەرۊن.
باعزێ خاولی و ماولی و ئەسپابو سەفەریم نیێ دلې باوڵێ و بلیتو قیتارو بەغڎا ئەستەمبووڵیم تا حەڵەبم بڕی و شەوې ڕەشیڎ قاڎر نامێ کە دانشجۊ حقووقی بې بەرداش سەرو قیتاری و دلې دەرەجە یەرېنە مەرزنانېشەرە. ڕەشیڎ دلې کۆریدۆرو قەتارینە کابرێوە ڕووتەڵەش دۊنا؛ لواو بلیتێ قیتاریش پەی ئارد، ماچۊ: (ئانە مەلا شەریف بې کە سەردارو حېزبو کۊمۊنیستو ئېراقییەن، گەرەکشبې بە قاچاخ سەفەر بکەرۊن؛ ڕازی نەبی بلیتو تا موسڵیش پەی بسانو! بلیتو تا تکریتیم پەی ئەسا!
قیتار یاوا (تەلکۆچەر)کە ئینا سەرو مەرزو سووریای، مەشیێ ئەفسەرې سووریې تەسلیمی وەربگېران و جە شارو (نوسەیبینی) تورکی بیاوان پۊرە. دمانیمەڕۊ بې وەزنایمېشارە، پەی ئانەی تەماشەو پاساپۊرتەکانی بکەران، پاساپۊرتو من سیلدار و نەوەشخانەو سیلیش سەرۆ نویسیابې، واتشان مەشۊم دوې ڕوې مدری بە قیتارو باری بلی و سیلدار پی قیتارەیە مەمنووعەن. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]