چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و ویس و دوەمە
واتم: ئای بکەردېش ڕاو خوڎای، من ئینانا سەرەمەرگەنە؛ ئەچی سارانە چەنی بژیوون؟ هازەو مەنەیۆم نییەنە،
گۊششا نەڎا، بەڵام عەزرەتیېنە هاوار مەبەرېنا پەی هەرکەسێ کە تووشم ئامێ، جوانێ بە کورڎی ماچۊ: کوردەنی؟
واتم: بەڵې.
ماچۊ: ئادەی پاساپۊرتەکەت، بزانو.
بەردش و لوا، دماو تاوێ گېڵاوە:
ماچۊ: تەمامنام، لوە سواربە!
ئاخر چەنی؟
ماچۊ: من کارمەندێ ئېراقیەنا دلې ئېزگەینە، چەنی فرەو ئەفسەراو سووری کە بە قیتار ملان ئاشنانا، ڕازیم کەردې ئاڎې تا نووسەیبین بەرات و ماچان چوونکەتی پاسپۊرتەکە بە عارەبی نویسیان هیچ ئەفسەرێ تورکی بېجگە جە خەتی لاتینی نمەزانۊ بوانۊوە، مەتاوۊ تاکو حەلەب بلۊن.
ماچۊ: کاکە من یاردی تۊم دا؛ تۊیچ خاسێ چەنی من بکەرە!
واتم: سەرو چەما، هەرچیم دەسەنە بێ.
ماچۊ: من نامېم مەحمووڎەن، برێوەم ئینا چا نەوەشخانەنە کە تۊ پەیش ملی، نامێوەش پەی مەنویسو بڎەش پەنە.
واتم: خزمەت گران و داوا هەرزانە، هەر تۊ و نامې؟ کۊنە، بارەش!
دلې قېتارو ئیجارەینە، (عەببوود) نامێ عەرەب خەڵکو موسڵی و شش کەسې تەرې، کە دوېشان کوردې حەڵەبی و دیاربەکری بېنې شەریکې ڕێم بېنې. واگۆنو دەرەجە یەرې قیتارەکەی هەشت نەفەری بې. چەنی عەببوودی بییەیمې ئاشنێ، باسو تەلکۊچەریم پەی گېڵناوە، تەماشەو پاساپۊرتەکەیش کەردا، واتش: کورە تۊ ویزەو تورکانیچت نییەن!
واتم: یانی مەوەزنامەرە؟
ماچۊ: تورکی مزانی؟
واتم: کەمێ.
ماچۊ: کەم و فرەش گەرەک نییەن؛ بزانیچ نەلی قسېش پەنەبکەری. گەر واتشان ویزە، پەلې پاسپۊرتیشان پەی هوردۆ، من مەبو بە هورگېڵنت ڕزگارت مەکەرون. هەر زەڕێت پەنەن بنیەش دلې گۊرەوەکات، تەنیا چوار دینارې بازۆ، زەڕی فرە جە خەڵکی مەسانان، تاکو مەگېڵۊوە پەی مەرزی و مەڎاشۊ. من حەواڵەو حەفتا هەزار لیرە سووریام دلې پېچو عەگاڵەکەیمەنە شارتەنۊ..
شەس دینارېم پەنەبې، پەنجا و ششم نیا دلې گۊرەوەکام. جە (نوسەیبین) ئەفسەرې تورکې بە جەندرمېوە کۆتې وشکنای. ئېرانو وېمانمان ویرکۆتۊ: ئەفسەرې شۊخ و شەنگې و جلې تازې، سەربازې ڕووتې و نیمە پاپەتیې و پینە بە قڼگې، ئەفسەرێ ئاما دلې واگۆنەکەیمان:
ماچۊ: ویزا!
منیچ پاساپۊرتم پەنەدا.
ماچۊ: من ماچۊ ویزا!
پەلې پاسپۊرتەکەیم هوردێوە:
واتم: ئانە جە ویزایچ فرەتەرەن!
عەببوودی یاونانە کە فرە گېل و بەسەزوانەن، نەزانانش مەشۊم ویزە وەربگېرۊن.
ماچۊ: جەریمەش مەکەرمېن.
واتمان: چن؟
ماچۊ: دوې لیرې.
عەببوودی دوې لیرېش پەنەدا، ویزەش دریا. (لیرەی ترکی حەڤڎە فلسې ئېراقی بې، یانی چوار قڕانې کەمتەر).
کوردەکې چەنی خەڵکی و بە ئاسایی بە تورکی مەدوېنې. قسې وېشانېنە کە قاچاخی ئاژەڵ ورەتەی بې، بە کورڎی مەدوېنې تا کەس نەزانۊ. کوردێشان پەوی تەریش وات: (کناچێوەم هەنە عومرش هەشت ساڵېنە، حۆت زوانې مەزانۊ: کورڎی، ترکی، عەرەبی، فەڕەنسی، ئیتالی، کلدانی، یۊنانی. یانەکەمان ئینا دلې کووجیێنە میللەتې فرېش چەنەنې، کناچەکېم دلې وانگای یۊنانینە نیێنە وەرو وانای و بیېنە هورگېڵنەو گردو هامسایەکامان.
عەببوود کوببې موسڵیش پەنەبېنې، بەزۊر نانش دەرخوارد دانې و هامدەمێ فرە وەش بې. وەڵې نیمەڕۊی حەلەب وەستیمېرە. دلې گەراجینە مەچڕېنې: (تەکسی پەی بێرووتی). بلیتەکەو قیتاریم دڕی و فڕەمدا دلې سڼوقو زوېڵی، باوڵم دا بە ساحېبو تەکسیێ کە بەرۊم پەی بێرووتی، مڎیەو عەبوود پېڎا بی، ساییقو تەکسیەکەیش چڕی:
ماچۊ: حاجی، ئا کوڕە دۊسو منەن! بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]