ساڵ و شوێنی لەدایک بوون/ 1975 #سلێمانی#
بڕوانامە/ بەکالۆریۆس لە زانستی ئامارو کۆمپیوتەر، دبلۆمی باڵا لە مافی مرۆڤ، فرە کەلتوری، بەڕێوەبردنی ململانێ.
پسپۆڕی/ کۆمەڵگەی مەدەنی و بەڕێوەبەری پڕۆژە.
بڵاوکراوە و نووسین و وەرگێڕان/ خاوەنی 1 کتێب و 2 توێژینەوە و چەندین وتارە لە بواری سیاسی و کۆمەڵایەتی جیاجیادا.
چالاکی/ ئەزموونی زیاتر لە 12 ساڵ کارکردن وەک چالاکوانی کۆمەڵی مەدەنی لەگەڵ ڕێکخراوە ناوخۆییو نێودەوڵەتیەکان.
سەرپەرشتی پڕۆچەی زیادکردنی وانەی مافی مرۆڤ بە هاوکاری 7 ڕێکخراوی ناوخۆیی بۆ خوێندنی فەرمی لە هەرێمی کوردستان.
بەشداری و ئەندام لە لیژنەی هاوکاری مەدەنی لیژنەی پەروەردەیی #پەڕڵەمانی کوردستان# بۆ ماوەی ساڵێک بۆ ڕیفۆرمی پەروەردەیی لە هەرێمی کوردستان.
بەشداری چالاک لە پرۆژەی یاسای کۆمەڵی مەدەنی لە هەرێمی کوردستان.
کاندیدی #لیسی گۆڕان#ە لە شاری سلێمانی بۆ هەڵبژاردنی پەڕڵەمانی ئێڕاق لە 2010دا.[1]

بەڕێز د. #حەیدەر عەبادی#، سەرۆکی ئەنجوومەنی وەزیرانی عێراقی فیدراڵ و فەرماندەی گشتیی هێزە چەکدارەکان
پاش ڕێز و سڵاو
هەروەک بەڕێزتان ئاگادارن لەدوای ڕووداوەکانی 16ی مانگی ڕابردوو، پاشەکشێی هێزی پێشمەرگە لەناوچە کێشەلەسەرەکان و داخڵبوونی سوپای عێراق بۆ ئەو ناوچانە بەتایبەت قەزای خورماتوو، بەداخەوە بەشێکی زۆری هاووڵاتییانی خورماتوو بەتایبەت کوردنشینانی شارۆچکەکە ئاوارە بوون، لە ئەنجامی کاردانەوەی نابەرپرسانەی تۆڵەسەندنەوەی هەندێکیش، زەرەر و زیان بە ماڵ و سامانی بەشێک لە هاووڵاتییانی ناچەکە کەوت. هەڵبەتە بۆ جێگاکانی تریش کەم و زۆر ئەم حاڵەتە نەخوازراوە ڕوویداوە، بەداخێکی زۆریشەوە ڕووداوی نەخوازراوی کوشتن و ڕفاندن ڕوویداوە، ئەمەش ترس و دڵەڕاوکێی لەلای خەڵکی ئاوارە دروستکردووە بۆ گەڕانەوە و مەترسییەکی گەورەشە لەسەر ئارامی دانیشتووانی ڕەسەنی ناوچەکە بە عەرەب و تورکمانیشەوە.
بەردەوامی پەیوەندی ئێمە لەگەڵ فەرماندەکانی حەشدی شەعبی و پارێزگاری سەلاحەدین و هێزە ئەمنییەکان لەو ناوچەیە تەنها لەپێناوی گێڕانەوە ئارامی و ئاسایش بۆ هاووڵاتییانی ناوچەکە و گەڕان بەدوای بێسەروشوێن و لێقەوماوان بووە و ناکرێ‌ سوپاسی هاوکارییەکانیان نەکەین. بەڵام ئەوەی جێگەی داخە تاوەکو ئێستا بارودۆخی شارۆچکەی خورماتوو وەک خۆی ماوەتەوە و ئاماژەیەک نییە بۆ دابینکردنی دڵنیایی تاوەکو ئاوارەکان بگەڕێنەوە شوێن و ماڵ و حاڵی خۆیان و لاپەڕەیەکی نوێ‌ هەڵبدەینەوە لەنێوان پێکهاتە ڕەسەن و لێقەوماو و خێرلەخۆنەدیوەکانی ئەو ناوچانەدا.
هەروەک چۆن لە ڕۆژانی ئاوارەیی و لێقەوماوی لە مێژووی هاوبەشی ئەم پێکهاتانەدا چەندینجار نان و ماڵیان وەک برا بەشکردووە، لەم ڕوانگەیەوە، داوا لە بەڕێزتان دەکەن پەلە بکەن لە ڕەوانەکردنی هێزی تایبەتی سوپای عێراقی بۆ خورماتوو تاوەکو کۆنترۆڵی ئاسایشی قەزاکە بکەن و بەهاوکاری هێزە چەکدارەکان و پۆلیس دڵنیایی و ئارامی بگێڕنەوە بۆ ئەم شارۆچکە لێقەوماوە، تاوەکو ئاوارەکان بتوانن بگەڕێنەوە و ژیان ئاسایی بێتەوە.
ئەوەندەی لە پەیوەندی بەردەوامیش بووین لەگەڵ سەرکردە باڵاکانی حەشدی شەعبی، ئەوانیش ئەم پێشنیازەیان لاپەسندە و چەند جاریش داوامانکردووە جێبەجێبکرێت‌.
هێشتنەوەی بارودۆخی خورماتوو بەم شێوەیەی ئێستا لە خزمەتی هیچ کەسێکدا نییە و، هاووڵاتییانی کوردی ئەو ناوچانە وەک هەر هاووڵاتییەکی تری پارێزگاکانی عێراق چاوەڕوانیان لە ئێوە هەیە بە سیفەتی فەرماندەی گشتی هێزە چەکدارەکان و سەرۆکی حکومەت بەهانایانەوە بچ و ئاوڕیان لێبدەیتەوە و کۆتایی بەنەهامەتیەکانیان بێ‌، بۆ ئەوەی ئاشتەوایی و پێکەوەژیان لە خورماتوو جارێکی دیکە دروستبێتەوە.
لەگەڵ ئەوپەڕی ڕێزدا
#ئارام شێخ محەمەد#، جێگری سەرۆکی ئەنجوومەنی نوێنەران عێراق
02-11-2017

#ئارام شێخ محەمەد# و نوێنەرانی کورد لە پەرلەمانی عێراق سەرنج و تێبینەکانیان لەبارەی پشکی هەرێم لەپڕۆژە یاسای #بودجە# لەگەڵ #حەیدەر عەبادی# تاوتوێدەکەن
پاشنیوەڕۆی ئەمڕۆ بە سەرپەرشتی ئارام شێخ محەمەد، جێگری سەرۆکی ئەنجومەنی نوێنەران و ئامادەبونی سەرۆک و پەرلەمانتارانی فراکسیۆنە کوردییەکان لەگەڵ سەرۆک وەزیرانی عێراق کۆبونەوە بۆ تاوتوێکردنی پشکی هەرێم لەبودجەی عێراق و خستنەڕوی داواکارییەکانیان.
لە کۆبونەوەکەدا نوێنەرانی کورد لەچەند تەوەرێکدا سەرنجەکانیان چڕکردەوە کە دیارترینیان ڕێژەی پشکی هەرێم لەبودجەی عێراق، موچەی فەرمانبەران، دیارینەکردنی پشکێکی تایبەت بۆ پارێزگای هەڵەبجە، شایستە داراییەکانی جوتیاران، شایستە دارایی و ئیمتیازاتەکانی پێشمەرگە، کێشەی ئاوارەکان و دۆخی قەزای خورماتو و قەرەبوکردنەوەی زیانلێکەوتوان، چارسەرکردنی کێشەی فرۆکەخانەکان، ئەنجامدانی ئاڵۆگۆڕی ئیداری لەناوچە کێشە لەسەرەکان و پرسی پترۆدۆلاری بۆ کەرکووک و گواستنەوەی میلاکی مامۆستایان و کێشەکانی تری شارەکه و چەند تەوەرێکی تر.
لەبارەی ڕێژەی پشکی هەرێم، سەرۆک وەزیرانی عێراق ئاماژەی بەوەکرد ڕێژەی لەسەدا 17 بەئیتفاقی سیاسی دیارکراوه و ئه و هەوڵی هێنانەدی دادپەروەری دەدات بۆ تەواوی خەڵکی عێراق نەک سزادانی هەرێم، سەبارەت بەموچەی فەرمانبەرانیش دڵنیایی دایە نوێنەرانی کورد کە پابەندە بەخەرجکردنی موچەی تەواوی فەرمانبەرانی هەرێم، تەئکیدیشی کرد بەنیازبون موچەی 2 بۆ سێ‌ مانگی هەرێم بدەن بەڵام کێشەی گەورەی بەردەمیان ئەوەبوە نەیانزانیوە لەسەر چ بنەمایەک دابەشی بکەن، وتیشی هەوڵەکانمان لەوچوارچێوەیە درێژە پێدەدەین و دوای وردبینی، فەرمانبەرانی هەرێم هاوشێوەی فەرمانبەرانی تری شارەکانی عێراق موچە لەبەغدا وەردەگرن.
لەبارەی نەوتی کەرکووکیش ڕایگەیاند: بەرپرسانی هەرێم خۆیان پابەندی کۆمەڵێک ڕێکەوتن کردوە کە بۆتە کێشە بۆ ئەوان و تائێستا نەیانتوانیوە نەوتی کەرکووک بفرۆشن و سود لە داهاتەکەی وەربگرن.
دوابەدوای خستنەڕوی تەواوی داواکارییەکانی کورد، ئارام شێخ محەمەد لەسەرۆک وەزیرانی عێراقی پرسی، تاچەند ئامادەیە بۆ جێکردنەوەی داواو تێبیینەکانیان لەپرۆژە یاسای بودجەی 2018 تا نوێنەرانی کورد دەنگ بەپرۆژە یاساکە بدەن، حەیدەر عبادی لەوەڵامدا وتی: ئامادەی هەمو هاوکارییەکە و داواکارییەکان بەهەند وەردەگرێت و هەوڵەکانی دەخاتە گەڕ بۆ جێکردنەوەی بەشێک لە داواکارییەکانیان.
بڕیارە ئێوارەی ئەمڕۆش لە بارەگای سەرۆکایەتی ئەنجومەنی وەزیرانی عێراق، ئارام شێخ محەمەد و سەرۆکی فراکسیۆنە کوردییەکان جارێکی تر لەگەڵ حەیدەر عبادی کۆببنەوە بۆ تاتوێکردنی زیاتری پشکی کورد لەپرۆژە یاسای بودجه و جێکردنەوەی بەشێک لە داواکارییەکانیان.
نوسینگەی ڕۆژنامەوانی جێگری سەرۆکی ئەنجومەنی نوێنەرانی عێراق
#01-02-2018#