ناونیشانی پەرتووک: ئەزموونی شۆڕشی کوردستان؛ حدکا بەرگی 02
ناوی نووسەر: #ئەنوەر حسێن بازگر# و #ژیلوان هەڵەدنی#
شوێنی چاپ: #سلێمانی#
دەزگای پەخش: ئایدیا
ساڵی چاپ: 2024
ژمارەی چاپ: چاپی یەکەم [1]

ئێمە وەکو فراکسیۆنی گۆڕان لە پەرلەمانی کوردستان، بەتووندی ئیدانەی پەلاماری دەوڵەتی ئێران دەکەین بۆ سەر حزبی دیموکرات و، بە کۆمەڵکوژیی و پێشێلکارییەکی گەورەی سیاسی و یاسایی لەقەڵەمی دەدەین. بۆیە بەپێویستی دەزانین و داوادەکەین حکومەتی هەرێم هەڵوێستی هەبێت و بێدەنگی بەرانبەر ئەو کارەساتە بشکێنیت و، بەڕەسمی داوادەکەین کۆبوونەوەی نائاسایی پەرلەمان ئەنجامبدەین بۆ هەڵویستی جدی و یاسایی لەسەر ئەم پەلاماردانە.
وەکو فراکسیۆنی گۆڕان وێڕای هاوخەمی بۆ حیزبی دیموکرات و کەسوکاری شەهیدان و هیوای چاکبوونەوەی بریندارەکان، پاڵپشتی خۆمان بۆ خەباتی دیموکراتییانە و چارەسەر ئاشتیانەی پرسی کورد لە ئێران دەردەبرین.
فراکسیۆنی گۆڕان لە پەرلەمانی کوردستان
#08-09-2018#

هاونیشتمانە بەڕێزەکان!
خەڵکی خەباتگێڕی کوردستان!
ئەندامان، دۆستان‌و لایەنگرانی حیزبی دێموکڕاتی کوردستان!
70 ساڵ لەمەوبەر لە ڕۆژێکی وەک ئەمڕۆدا (25ی گەلاوێژی 1324) حیزبی دێموکڕاتی کوردستان لەسەر دەستی ڕۆڵەی هەڵکەوتووی نەتەوەی کورد پێشەوا قازی محەممەدی نەمر دامەزرا بۆئەوەی بە شانازی‌یەوە ئاڵای خەباتی ڕزگاریخوازانەی گەلی کورد لە خۆرهەڵاتی کوردستان بخاتە سەر شانی ڕۆڵەکانی‌و نەوە لە دوای نەوە بە دەستی کۆمەڵێک لە فیداکارترین تێکۆشەرانی ئەم بەشە له ‌کوردستانی بسپێرێ. لەوساوە تائێستا ئەم حیزبە سەرەڕای هەموو کەندوکۆسپەکانی سەر ڕێگا، بە لێوەشاوەیی ئەرکی شۆرشگێڕانەی خۆی بە ئەنجام گەیاندوەو نەی‌‌هێشتوە ئاڵای خەباتی ئەم گەلە بکەوێتە سەر زەوی.
ئەگەر بمانەوێ بۆ ڕەمزی مانەوەو بەردەوامیی ئەم حیزبە لە مەیدانی بەربەرەکانیی پڕقوربانیی تێکۆشان‌دا بڕوانین پێش هەموو شتێک چەند هۆی سەرەکی خۆیان دەنوێنن: یەکەم،ئەوە کە پێشەواو هاوڕێکانی بە لێزانی‌و شارەزایی ئامانجەکانی کۆمەڵانی خەڵکی کوردستانیان لە بەرنامەی‌ حیزبی دێموکڕات‌دا گەڵاڵە کردوە، بەجۆرێک کە پاش تێپەڕینی نزیک بە سێ‌چارەکە سەدەش هێشتا لە هێڵە گشتی‌یەکان‌دا ئامانجی هەموو چین‌وتوێژە نیشتمانی‌یەکانی کۆمەڵی کوردەواریی تێدا بەدی دەکرێ. دووەم، ئەوە کە هەر بەوهۆیەی سەرەوە حیزبی هەموو خەڵکی کوردستان بووەو هەموو جۆراوجۆری‌یەکانی کۆمەڵ خۆیان‌و ئامانجەکانیان لەم حیزبەو بەرنامەی ئەم حیزبەدا دیتۆتەوەو هەربۆیەش لە هەموو بارێکەوە لە پشتی وەستاون. سێیەم، ئەوە کە له ‌درێژەی ڕێگادا ئەم حیزبە لە هەڵبژاردنی دروشمەکانی خەبات‌و دەست‌نیشانکردنی دۆستان‌و دوژمنانی‌‌‌دا وردو واقیع‌بین بووە. سەرەنجامیش ئەوە کە تێکۆشەرانی دێموکڕات له ‌دژواری‌یەکانی سەر ڕێگای خەبات نەپرینگاونەوەو “کەندوکۆسپ هەنگاوی پێ شل نەکردوون”.
حیزبی ئێمە لەو ڕێبازە دوورودرێژو پڕهەورازو نشێوەدا سەرکەوتنی گەورەی تاقی کردوونەوەو نوشوستیی تاڵیشی تووش هاتوون: گرنگترین ڕووداوی مێژووی خەباتی ڕزگاریخوازانەی نەتەوەی‌ کورد (دامەزرانی کۆماری کوردستان) لەسەر دەستی ئەم حیزبە پێک‌هاتوەو بەناوی ئەم حیزبەوە تۆمار کراوە، له ‌بەرامبەردا ڕووخانی کۆشکی هیوای کوردی هاتۆتە سەر ڕێ‌و سەری سەردارانی بەسەر سێدارەوە دیوە. چەندجار کەوتۆتە بەر هێرشی بەر‌بڵاوی پۆلیس‌و بەسەدان خەباتگێڕی ڕیزەکانی کەوتوونە بەندیخانەو حوکمی زیندانی درێژخایەن‌و تەنانەت ئیعدامیان بەسەردا سەپاوەو سەدانی دیکەیان پەڕیوەی هەندران بوون‌و ژیانی ئاوارەیی‌یان بەسەردا سەپاوه.‌ بەو حاڵە لە یەکێک لە ڕەشترین دەورانەکانی حکوومەتی دیکتاتۆری‌دا گۆمێ مەندی “جزیرەی ئارام”ی حەمەڕەزاشای شڵەقاندوەو بانگی “ئەی ڕەقیب هەر ماوە قەومی کوردزمان”ی بەگوێی بێ خەبەران‌دا داوە. چەندجار تووشی لێک‌دابڕان هاتوەو لەبەرامبەردا ڕووداوی وەک “وەسەریەک‌کەوتنەوەی بنەماڵەی گەورەی حیزبی دێموکڕات”ی تۆمار کردوە.
بەکورتی ئەم حیزبە سەرکەوتن‌و تێ‌شکانی زۆری دیون‌. بەڵام نە لەسەرکەوتن‌دا لەخۆ بایی بووەو نە لە نوشوستی‌دا چۆکی داداوەو تووشی بێ‌هیوایی هاتوە، هەر سەرکەوتن‌و پێشکەوتنێکی کردۆتە پردەبازی سەرکەوتنێکی دیکەو لە هەر تێشکانێک دەرسێکی خەباتگێڕانەی وەرگرتوە.
گەلی ئازادیخوازی کورد!
ئەو دەسکەوتانە کە حیزبی دێموکراتی کوردستان لە ڕێڕەوی 70ساڵە‌ی ژیانی خەباتگێڕانەی خۆی‌دا بەدەستی هێناون، بەرهەمی ڕەنج‌و تێکۆشانی تەنیا کۆمەڵێک‌و گرووپێک نین. هەرچەند بەڕواڵەت لە بەشی زۆریان‌دا ڕێبەری‌و کادرو ئەندام‌و فەرماندەرو پێشمەر‌گە فیداکارەکان خاوەنداری‌یان لێ‌دەکەن، بەڵام ئەو شانازییانە به ‌هەوڵ‌و هیممەتی چین‌وتوێژو دەستەو گرووپی جۆراوجۆری کۆمەڵی کوردەواری بەدەست هاتوون. ئەو زیندانییانە کە بەشێکی زۆر لە باشترین ساڵەکانی تەمەنیان لە چاڵەڕەشەکانی دوو ڕێژیمی پیاوکوژی پادشایەتی‌و ئاخوندی‌دا بەسەر بردوە، ئەو کەس‌وکارانەی شەهیدان‌و زیندانییانی سیاسی که ‌ڕەنجی دووری‌و تەنانەت لەدەستدانی ئازیزانیان قبووڵ کردوە، بەڵام قەت بەچۆک‌دا نەهاتوون‌و ڕێگایان نەداوە دوژمنانی ئازادی هەست بە سەرکەوتن بکەن، ئەوانە کە یەک یان چەند ئەندامی لەشیان لە مەیدانی بەربەرەکانیی چەکدارانە یان لەژێر ئەشکەنجەدا لەدەست داوە، ئەوانە کە “لەسەر وەتەن بێ‌وەتەن بوون”‌و ڕەنجی دووروڵاتی دەچێژن بەڵام قەت له ‌یادو غەمی گەل‌و نیشتمانەکەیان غافڵ نەبوون، ئەو ژنە تێکۆشەرانە کە سەرباری بەشی خۆیان لە خەبات بەشێک له ‌ئەرکی خەباتگێڕانەی پیاوەکانیشیان گرتۆتە ئەستۆ، ئەو مامۆستا ئایینی‌یە نیشتمانپەروەرانە کە له ‌تاڵترین ساڵەکانی زەبروزەنگ‌دا خۆیان ئەرکی حیزبی‌یان بەڕێوە بردوەو حوجرەو مزگەوتەکانیان کردۆتە قوتابخانەی پێگەیاندنی ڕۆڵەی بەجەرگی مەیدانی خەبات‌و بەکورتی هەموو ئەوانەی لە هەر ڕێگایەکەوە کۆمەگیان بە بەرەوپێش‌چوونی ئەم کاروانی سەروەری‌یە کردوە، هەرکامیان خاوەنی بەشێک لە شانازییەکانی مێژووی حیزبی دێموکڕاتن.
هاوڕێیانی خۆشەویست!
حیزبەکەتان حیزبی دێموکراتی کوردستان خاوەنی زۆر شێوازو نەریتی خەباتگێڕانە بووەو هەیە کە له ‌ڕابردوودا بوونە مایەی ڕێز‌و ئیعتیباری‌ ئەم حیزبەو درێژەدانیان لە تێکۆشانی لەمەودواشمان‌دا دەتوانێ کۆمەک بە چوونەسەری جێگەوپێگەی حیزب‌و سەرەنجام سەرکەوتنی ڕێڕەوی خەباتە ڕەواکەی بکا:
حیزب هیچ‌وەخت شێوەیەکی تایبەتی لە خەباتی بە تاقەڕێگا دانەناوەو ڕێزێکی زۆری بۆ خەباتی شارستانی داناوە، تێکۆشانی فکری‌و سیاسی‌و کۆمەڵایەتی بەتایبەتی نەخشی ڕووناکبیرانی بە ئەڵقەیەکی گرنگی خەباتی ڕزگاری‌خوازانەی نەتەوەکەمان زانیوە. حیزب پێی وا بووە چووکترین پاشەکشە بە ڕێژیمی دەسەڵاتدارو بەدەست‌هێنانی هەر داخوازێکی خەڵک بڕینی قۆناغێک لە خەباتە درێژخایەنەکەمانە.
ئەم حیزبە هەمیشە باوەڕی بە چارەسەری ئاشتی‌خوازانەی مەسەلەی کوردو تەنانەت چارەسەری هەموو گیروگرفتە ناوچەیی‌و نێونەتەوەیی‌یەکان لەڕێگای ئاشتی‌خوازانەوە هەبووه. بەڵام‌ هەرکات لەلایەن حکوومەتە سەرکوتکەرەکانەوە خەباتی چەکدارانەی بەسەردا سەپابێ قارەمانانە بەرگریی لە ماف‌و ئازادی‌یەکانی کورد کردوەو لەبەرامبەر زۆرو ملهوڕی‌دا تەسلیم نە بووە.
دەگەڵ ئەوەی هەمیشە باوەڕی به ‌مافی دیاریکردنی چارەنووس بۆ گەلی کورد هەبووە، واقیع‌بینانە هەلومەرجی خەباتی نەتەوەکەی خۆی هەڵ‌سەنگاندوەو دروشمی چارەسەری مەسەلەی کورد له ‌چوارچێوەی ئێران‌دا (خودموختاری یان فیدڕالیزم)ی هەڵگرتوە.
زانیویەتی کە بۆ بەدەست‌هێنانی ماف‌و ئازادی‌یەکانی کورد لە چوارچێوەی ئێران‌دا پێویستیی بە هاوخەباتی دەگەڵ گەلانی دیکەی ئێران‌و ڕێکخراوە سیاسی‌یەکانیان هەیەو لەو ڕێگایەدا هەوڵێکی زۆری بۆ لێک‌نزیک‌بوونەوەو تەنانەت هاوپەیمانی دەگەڵ حیزب‌و ڕێکخراوە سەرانسەری‌و ناوچەیی‌یەکانی ئێران داوە.
ئەم حیزبە هەمیشە باوەڕی بەوە هەبووە کە کورد نەتەوەیەکەو لەنێو چەند وڵات‌دا دابەش کراوە. بۆیە لە هەموو دەرفەتێک‌دا هەوڵی هاوکاری‌و هاودەردی دەگەڵ بەشەکانی دیکەی کوردستانی داوەو بەتایبەتی دەگەڵ باشووری کوردستان زۆر لاپەڕەی زێڕینی مێژوویی لەو بوارەدا تۆمار کردوون.
حیزبی دێموکڕاتی کوردستان لە کۆنەوە بایەخێکی شیاوی بە دیپڵۆماسی‌و هەوڵی ناساندنی مەسەلەی کورد بەدنیاو ڕاکێشانی پشتیوانیی نێونەتەوەیی بۆ لای مەسەلەی کورد داوەو لەو ڕێگایەدا سەرکەوتنی باشیشی بەدەست هێناوە. لەبیرمانە کە یەکەمین کۆنفڕانسی نێونەتەوەیی لەسەر مەسەلەی کورد له ‌پاریس بە هەوڵ‌و تێکۆشانی ڕێبەری شەهید دوکتۆر قاسملوو پێک‌هات‌و لەبەر ئەوەی پێش بەسترانی کۆنفڕانسەکە تێڕۆر کرا، ئەو کۆنفڕانسە پێشکەش بە یادی وی کرا.
خەڵکی تێکۆشەری کوردستان!
ئەگەرچی لە هەلومەرجی ئەمڕۆدا خۆرهەڵاتی کوردستان‌و بەگشتی هەموو ئێران لەژێر دەسەڵاتی دیکتاتۆریی کۆماری ئیسلامی‌دا کپ‌و بێ‌دەنگ دیارە. بەڵام بەدڵنیایی دەڵێین ئەم وەزعە ناتوانێ درێژخایەن بێ. ئەو هەورە ڕەشەی بەری ئاسمانی کوردستان‌و ئێرانی گرتوە سەرەنجام دەڕەوێ‌و خۆری ئازادی لە ئاسۆی وڵاتەکەمان وەدەر دەکەوێ. حیزبی دێموکڕات بەڵێن تازە دەکاتەوە کە به ‌ئیرادەیەکی پتەوترەوە ڕێگای وەدیهێنانی ئامانجەکانی ئێوە درێژە دەدا. بۆیە هیوامان ئەوەیە وەک هەمیشە پشتی بگرن، متمانەی پێ‌بکەن‌و ڕێگای پێشان بدەن. ئەم قافڵەیە بە هەوڵی هەمووان دەگاتە مەنزڵ‌و گومانیش نیە کە نەخشی بنەڕەتی بە هەوڵ‌و هیممەتی ئێوەیە.
له ‌70ساڵەی دامەزرانی حیزبی دێموکڕاتی کوردستان‌دا وێرای پیرۆزبایی لە هەموو خەڵکی کوردستان‌و دۆستان‌و دڵسۆزانی حیزب، سڵاوی وەفاو ئەمەگداری بۆ گیانی پاکی دامەزرێنەرو پێشەوای حیزب ‌شەهید قازی محەممەدو هەموو هاوڕێکانی دەنێرین‌و بەڵێن تازە دەکەینەوە کە تاسەر بە ڕێبازەکەیان وەفادار بین.
سڵاو لەگیانی پاکی هەموو شەهیدانی کوردستان‌و بنەماڵە سەربەرزەکانیان.
سڵاو لە زیندانییانی سیاسی قارەمانانی بەرەنگاری‌و بنەماڵە فیداکارەکانیان.
سڵاو لە هەموو خەڵکی کوردستان قەڵای هەرە قایمی دێموکرات.
سەرکەوێ حیزبی دێموکڕاتی کوردستان بۆ بەجێ‌گەیاندنی ئەرکە نیشتمانی‌و نەتەوەیی‌یەکانی.
کۆمیتەی ناوەندیی
حیزبی دێموکڕاتی کوردستان
25ی گەلاوێژی 1394 (16ی ئووتی 2015)

سایتی خواکوڕک و پەیجەکەی لەسەر تۆڕی کۆمەڵایەتی فەیسبووک هەواڵێکی ناڕاستیان بڵاو کردۆتەوە کە گوایە ئاسیاسێل پێش هێرشی ئێران بۆ سەر هەردوو حزبی دیموکرات، خەتی مۆبایلی بەرپرسانی دیموکراتی لەکار خستووە.
ئاسیاسێڵ کە باش دەزانێت کێ لە پشت ئەم سایتە هەواڵییە ناڕاستگۆیەوەیە داوا دەکات کە حکومەتی هەرێمی کوردستان و داواکاری گشتی و دەزگا پەیوەندیدارەکان ڕێگری بکەن لە کارکردنی ئەم جۆرە سەرچاوانە کە جگە لە بوختان و هەواڵی ژەهراوی هیچ سوودێکیان نییە.
ئاسیاسێڵ وەک کۆمپانیایەکی خزمەتگوزار و خێرخواز و سیستماتیک، داوای یاسایی لە سەر دەزگای خواکوڕک و هەموو ئەو کەسانەی کە ئەم دەزگایە بەڕێوە دەبەن تۆمار دەکات و دەیانداتە دادگا تا ڕاستییەکان بسەلمێندرێن بۆ هەمووان.
ئاسیاسێڵ کە خاوەنی کەسێتی مەعنەوی و بەهای بەرزی کارکردنە و خاوەنی ئیدارەیەکی هۆشیارە کە پەیڕەوکاری ئاکاری بزنز و پێودانگە یاساییەکانە، هەرگیز بەم بوختانانە ناوو ناوبانگی لەکەدار نابێت.
ڕاگەیاندنی کۆمپانیای ئاسیاسێڵ
#سلێمانی#
#08-09-2018#

بۆ ڕای گشتی...

دوابەدوای سەفەرە زەنجیرەیەکانی کاربەدەستانی ئاسایشی کۆماری ئیسلامی ئێران بۆ باشووری کوردستان و بەرنامەرێژی قۆناخێکی نوێ لە شەڕی تایبەت دژی بزووتنەوەی ئازادیخوازی ئاپۆیی لە ڕۆژهەڵاتی کوردستان و ئەحزابی گرێدراوی بارزانی لە ڕۆژهەڵاتی کوردستان (حدکا، حدک) بوونەتە‌ کەرەستەیەکی ئەساسی ئەم شەڕە تایبەتە.

ئەم ئەحزابە زەردانە کە تەجروبەیەکی دەمدرێژیان لە بە فیڕۆدانی وزەی کۆمەڵگای کوردی و تکهەڵچوون لەگەڵ تێکۆشەرانی کورد هەیە، دەیانەوێت تا بە فەرهەنگی فالانژیستی، کۆمەڵگای کوردستان بەرەو‌ گۆڕەپانێکی بیرتەسکانە و مۆغرەزانە ڕابکێشن، ئەم ئەحزابانە لەم ماوە درێژە لە پاسیڤ بوون و کەمپنشینی خۆیان بوونەتە‌ حەوانگەی سیخوری چەند لایەنە و مۆرەی وەزارەتی ئیتڵاعات و سوپای پاسداران.

یەکێک لە ڕێگا ئەساسیەکانی شەڕی تایبەت، ڕەشکردنی ئەو کەسانەیە کە بیروڕای جیاوازیان هەیە و ئەو کەسانەی کە لە چوارچێوەی سیاسەتە هاوبەشەکانی دەوڵەت و ئەم ئەحزابانە جێ ناگرن.

لەم ڕۆژانەی دواییدا بەشێک لەم کەسانە کە ئەندامێتی ئەوان لە ناوەندە ئیتڵاعاتیەکان و ئاسایشی ڕژیم ئاشکرایە و لەهەمان کاتدا خۆیان وەک پشتیوانانی ئەحزابی زەرد نیشان دەدەن و پدەچێت کە کارتی ئەندامێتی ئەم ئەحزابانەشیان له گیرفانیاندا بێت، هێرشێکی بەرفراوانیان بۆ بەدناوکردنی کەسایەتییە مەدەنییەکان و وڵاتپارێزانی کورد دەستپێکردووە.

بێگومان ئەم کردەوە نا ئەخلاقیانەی مۆرەکانی ڕژێم ناتوانن ئەم کەسایەتییە تێکۆشەرو وڵاتپارێزانە ڕەش بکەن، هەروەها ناتوانن ئەو سەرکەوتنانەی‌ کە گەلی تێکۆشەری کورد ڕۆژبەرۆژ بەدەستی دێنێت، کەمڕەنگ بکەنەوە.

لەم ڕێگایەوە سەرەنجی ڕای گشتی کوردستان بۆ‌ سەر ئەم نەخشە چەپەڵه ڕادەکێشین، هەروەها ئەم مۆرانە و پشتیوانانیان وشیار دەکەینەوە کە هەوڵی تاقیکردنەوەی ئاستی سەبری بزوتنەوەی ئاپۆیی و گەلی وڵاتپارێز کوردستان نەدەن.

مەجلسی پارتی ژیانی ئازادی کوردستان

کۆمەڵانی خەڵکی تێکۆشەری کوردستان، هاوبیران و ڕێبوارانی ڕێگای سەربەخۆیی کوردستان.
هەروەک ئاگاداران لە ڕۆژانی ڕابردوو دا جوڵەی هێزی #پێشمەرگە#ی هاوخوینانی حیزبی دێموکرات لە ناوخۆی وڵات و بوونیان بەکردەوە گڕوتێنێکی زۆری خستۆتە نێو کۆمەلانی خەڵکی نیشتمان پەروەری کوردستان، و هاوکات ئەم جوڵە و چالاکییانە لە چەند ناوچەی کوردستان تیکهەڵچوونی لەگەڵ هێزە داگیرکەرەکانی ڕژیمی ترۆریستی ئێران هەبووە، و وێرای وەشاندنی زەبری کاریگەر لە پەیکەری لاوازی ڕژیم، بە خۆشییەوە هێزی پێشمەرگە لە هەموو ئەو پێکدادانانەدا بەسڵامەتی و بە بێ خەساری ئینسانی توانیویانە خۆیان دەرباز بکەن.
#پارتی سەربەستیی کوردستان#، هەر وەک چۆن وەک خەتی فکری و ڕیبازی سیاسی بە ئاشکرا لە پەیرەو وپرۆگرامی خۆیدا بە ڕوونی ئاماژەی بە پشتیوانی و هاریکاری هەرچەشنە جوڵانەوەیەک لە ڕۆژهەڵاتی کوردستان و، بە ئامانجی زەربەدان لە داگیرکەرانی کوردستان، کە بتوانێ خزمەت بە بەرژەوەندییەکانی گەلی کوردستان بکات، جەخت دەکەینەوە کە ئێمە وەک پارتی سەربەستیی کوردستان: بەهەر چەشنێک بۆمان بلوێت و بە تەواوی هێزو ورەوە پشتیوانی لەم چەشنە چالاکییانە دەکەین، و ئامادەی هاوکاری و هاوفکرین لە هەر بارودۆخ و قوناغێکی هەستیاردا، هاوکات داوا لە هەموو ڕێکخستنەکانی خۆمان هەر لە #ماکۆ# و #سەڵماس#ەوە تاکوو #ئیلام# و #کرماشان# دەکەین ئاگادار و بەرپرسیاربن لە ڕووی هاوکاری و یارمەتی هێزی پێشمەرگە بە بێ جیاوازی حیزبی و بە ئینتیمایەکی نەتەوەیی هەوڵ بۆئەم ئەرکە پیرۆزە بدەن.
خەباتی چەکداری نوێ لە ژێر ناوی ڕاسان یاهەر ناوێکیتر لای ئێمە پیرۆزە و بەتەواوی واتا و هێز و توانامانەوە پشتگیری دەکەین، و خۆشمان لە ئەگەری پێویستی هەر جۆرە چلاکییەک لە ڕووی سەربازی و نیزامییەوە تەیار کردوە، و دەتوانین شان بە شانی هەموو تیکۆشەرانی حیزبی دیموکرات لە قوڵایی دڵی زێدی داگیرکراومان بوون و چالاکیمان هەبێت.
ئاواتەخوازین کە ڕاسان، ببێتە هۆکاری پێکهێنانی ‌هێزێکی سەرتاسەری پێشمەرگەی کوردستان، بۆ وەدەرنانی ئێرانی داگیرکەر لە سەر خاکی کوردستان.
سلاو لە هێزی پێشمەرگەی کوردستان بژی کوردو کوردستان مەرگ و نەمان بۆ داگیرکەرانی کوردستان
ئەنجومەنی سەرکردایەتی پارتی سەربەستیی کوردستان
18 ی پوشپەری 2718ی کوردی
#09-07-2018#

#03-04-2018#

بەناوی خودای بەخشندە و میهرەبان
بە پەلاماری مووشەکی و بوردومانی کۆماری ئیسلامی ئێران بۆسەر بارەگای حیزبی دیموکرات لە شاری #کۆیە# زۆر نیگەران و خەمبارم بە تایبەت کە زیانێکی زۆری گیانی و ماددی بەجێهێشتووە. لە کاتێکدا کە ئیدانەی ئەو پەلامارە دەکەم، سەرەخۆشیی خۆم ئاراستەی کەسوکاری شەهیدانی ئەو پەلامارە دەکەم و هیوای چاکبوونەوە بۆ برینداران دەخوازم.
داوا لە هەموو لایەکیش دەکەم کە هەرێمی کوردستان نەکرێتە گۆڕەپانی ململانێ چونکە خودی هەرێم کێشە و تەحەددیات و هەڕەشەی گەورەی لەبەردەمە. بە پێویستیشی دەزانم ئەوە بە گشت لایەک ڕابگەیێنم کە کێشەی گەلی کورد بە توندوتیژی و کوشتن و بوردومان چارەسەر ناکرێت و ڕێگە و شێوازی ئاشتیانە باشترین چارەسەرە بۆ هەموو کێشەکان.
#مەسعود بارزانی#
#08-09-2018#

بەناوی خودای بەخشندە و میهرەبان

زۆر بە توندی ئیدانەی ئەو شەڕ و بارگرژییە دەکەم کە ڕۆژی 24ـی 5ـی 2015 لەنێوان پارتی کرێکارانی کوردستان و حزبی دیموکراتی کوردستانی ئێران لە ناوچە سنوورییەکانی نێوان هەرێمی کوردستان و ئێراندا ڕووی داوە. داوا لە هەر دوو لا دەکەین کە دان بەخۆدابگرن و کێشەکان قووڵتر نەکەن و نەبنە هۆی بڵاوبوونەوە و تەشەنەکردنی بارگرژیی نێوانیان و کێشەکانیان لەڕێگەی گفتوگۆ و لێکتێگەییشتن چارەسەر بکەن.

شەڕی خۆکوژی زیانی گشت لایەکی تێدایە و کەسیش لەم شەڕەدا سەرکەوتوو نابێت. نە لە ئاستی حزبی و نە لە ئاستی نەتەوەیی هیچ بەرژەوەندییەک لە گرژی و شەڕی خۆکوژیدا نییە. پێشتر ڕامگەیاندووە کە دەبێ بە هەموو شێوەیەک شەڕی خۆکوژی تەحریم بکرێت و ئێستایش بە هەمان شێوە دووبارەی دەکەمەوە کە نابێ شەڕی خۆکوژی هەبێت و خوێنی کورد بە دەستی کورد بڕژێت. پێویستە لایەنەکان لە ئاستی بەرپرسیارێتیی نیشتیمانی بن. هەر جۆرە شەڕ و پێکدانانی نێوان لایەنە کوردییەکان زیان لە پێگە و ناوبانگی گەلی کوردستان دەدات و ئاسوودەیی و هیوای خەڵکی کوردستانیش تێکدەدات.

بە گشت لایەکیش ڕادەگەیێنین کە ڕێگە نادەین گۆڕەپانی کوردستان ببێتە شوێنی تەسفیەی حساباتی سیاسیی لایەنەکان لەگەڵ یەکتر. پێویستیشە حکوومەتی هەرێمی کوردستان هەموو هەوڵی خۆی بخاتەگەڕ بۆ کۆنتڕۆڵکردنی دۆخەکە و ڕێگەگرتن لە تەشەنەکردنی بارگرژیی نێوان ئەم دوو لایەنە.

مسعود بارزانی

سەرۆکی هەرێمی کوردستان

25ـی 5ـی 2015

Dieser Artikel ist gemäss Kurdipedia noch nicht finalisiert