خادیم نازناوی شاعیری کلاسیکی کورد حاجی میرزا عەبدوڵڵا کوڕی حاجی محەمەدی کوڕی مەولود چاوڕەشی کۆییە.. لە ساڵی 1895دا لە شاری کۆیە، شاری ئەدەب‌و هونەری کوردی لەدایک بووە، لە تەمەنی شەش ساڵیدا دەستی بە خوێندنی ئایینی کردووە‌و لە تەمەنی 12 ساڵیدا خوێندنی سوختەیی تەواو کردووە‌و بە چاکی فێری خوێندنەوە‌و نووسین بووە‌و بەردەوام کتێب‌و دیوانی شیعری کوردی‌و فارسی خوێندۆتەوە‌و خۆی پێگەیاندووە‌و لە ساڵی 1920دا کۆیە جێدێڵێ‌و بە ماڵەوە دەچێتە قەڵادزێ‌و لەوێ بە پیشەی بەرگدروین بەڕێوەدەچێ‌و لەبەر ئەوەی خوێندەوار بووە پێیان گوتووە(میرزا عەبدوڵڵای کۆیی)‌و کە لە ساڵی 1935 چۆتە حەج، لەو ساوە بە ناوی(حاجی میرزا عەبدوڵڵای کۆیی) ناسراوە.
ئەم زاتە لە ساڵی 1946دا چۆتە سلێمانی‌و تاکو ڕۆژی کۆچی دوایی لە ڕۆژی 5ی کانوونی دووەمی 1971دا لێی نیشتەجێ بووە.. دوکانێکی بووە لەسەر شەقامی مەولەوی‌و یانەی شاعیرانی وەک بێخود‌و عەلی کەمال باپیر‌و ڕەمزی مەلا مارف‌و گەلێکی تر بووە.
خادیم‌و شیعر:
خادیم شاعیرێکی کلاسیکی لێهاتوو بووە، لەسەرتای شاعیرییەتیدا کەوتوەتە بەر کاریگەریی شاعیرییەتی نالی‌و سالم‌و مەحوی‌و حاجی قادری کۆیی.. بەڵام لە دواییدا دەبێتە خاوەن دەنگ‌و شێوازی خۆی‌و هۆنراوەی بەرز‌و پتەو دا دەرێژی‌و دەڵێ:
لە گوڵشەن ناڕۆی سەروی وەکو ئەم سەروی مەوزوونت
بە خوێنی عاشقان ڕەنگینە لەعلی لێوی مەیگوونت!

دڵم وەک مورغی وەحشی کەوتە قەیدی توڕەیی زوڵفت
تەلاشی چی ئەکەی ئەی دڵ مەحاڵە تازە بەربوونت!!
خادیم هەنگاو بە هەنگاو شاعیرییەتی بەهێزتر دەبێ‌و هۆنراوەی ناسک‌و بەهێزترمان پێشکەش دەکات.. دەبا سەرنجێک بدەینە ئەم هۆنراوە پتەوەی تاکو بزانین چ هونەرێکی ڕەوانبێژی خستۆتە نێو وشە‌و ماناکانی‌و دەڵێ:
توڕەیی مشکباری تۆ حەڵقە بە حەڵقە خەم بە خەم
حەڵقە بە دەوری عاریزە، وەک گوڵی سوبحدەم بە دەم

شەوقی جەماڵی حوسنی تۆ ئاگری زەوقی عیشقی من
روو لە زیادە هەردەمێ، لەحزە بە لەحزە دەم بەدەم

نان‌و تەعامی شامی من دەرد‌و غەمی فیراقی تۆ
بوو بە عەزابی ڕۆحی من لوقمە بە لوقمە جەم بە جەم!!
کاتێک لە داڕشتنی ئەم دێڕە شیعرانەی خادیم ورد دەبینەوە دەبینین بەپێی تەرازووی شیعری کلاسیکی کوردی گەلێک گرانە‌و بە نرخن‌و خوڵقاوی هەست‌و هۆش‌و ئەندێشەی قووڵا‌و بە پێی شاعیرێکی بەهرەداری لێهاتووە.
دوا بەدوای ئەم هۆنراوەیشی هەڵبەستێکی سەرکەوتوو تر دادەنێ‌و پتر وشە ئارایی تێدادەکات‌و هونەری ڕەوابێژی سەرکەوتووانە بەکاردێنێ، هەروەک لەم هۆنراوەییدا کە دوو بەیتی‌و دەڵێ:
وەک دەماوەند بووم لە ماتەم والە سەرما تەم نەما
دڵ لە حوزنا ڕووی لە شادی کرد، لە سەرما تەم نەما

دیدە بێ بینا بوو وەک یەعقووب لە کوڵبەی حوزنەوە
بۆنی پیراهەن بەسەریا هات لە سەریا تەم نەما

وەعدەیی وەسڵی کە دولبەر دوایە نێزیک بۆتەوە
مژدەیەکی خۆشە یاران گریە ڕۆیی غەم نەما
کاتێک کە لەم چەند دێڕە شیعرەی ورد دەبینەوە، هەست دەکەین خادیم بووەتە شاعیرێکی بە دەستەڵاتی لێهاتوو ‌و بەسەر هونەری شیعردا زاڵە‌و خۆی هێناوەتە ڕیزی شاعیرە مەزنەکانی کورد‌و بەرهەمێکی بەهاداری لە بواری شیعری کلاسیکی کوردی پێشکەش بە شیعرناس‌و ڕەخنەگرانی ئەدەبی کوردی کردووە.
خادیم تا سەر خۆی بە فەرهەنگ‌و قاڵبی شیعری کلاسیکیەوە نابەستێتەوە، وەک ئەوەی بڵێی زوڵفی یار ڕەیحانە.. یان لە بۆن خۆشی دا موشکی خەتایە بەڵکو بە سەر سوڕماوییەوە دەڵێ: عەتری زوڵفی بە چ بچوێنێ؟ ئەگەر بڵێ بە موشکی خەتا دەچێ لەوانەیە خەتا‌و گوناهێکە دەی کات، چونکە لەویش بۆن خۆشتر‌و نایابترە‌و دەڵێ:
بۆ وەسفی عەتری زوڵفی بڵێم چی؟ وەکو چییە؟
تەشبیهی ئەکەم بە خەتا ئەگەر خەتا نەبێ!
شاعیر لە گۆشەی ئیمان‌و خوا پەرەستیەوە دەچێتە مەیدانی خۆشەویستی نیشتمانەکەی‌و ئەوەمان بۆ دەردەبڕێ کە بە هۆی خۆشەویستی نیشتمانەکەیەوە خوای گەورە لە خۆی ڕازی دەکات‌و خۆی لە پێناوی خاکی وڵاتەکەیدا بەخت دەکات‌و دەڵێ:
لە حوبی نیشتمانە خوای لە خۆم ڕازی دەکەم کوردم
لەسەر ئەم خاکە بۆ ئەم خاکە جانبازیی دەکەم کوردم
ئەگەر چی گۆشەگیرم، فەخر‌و شانازی دەکەم کوردم
کە زیندوو بوونەوەی گۆڕم لەبەر تەلقینی کوردیمە
خادیم لە هۆنراوەیەکی دیکەیدا خۆشەویستی نەتەوەکەی وای لێکردووە کە لە ناو شاعیرانی جیهاندا هەر شانازیی بە زانا‌و شاعیرانی کوردەوە بکات، بۆیە لە پاڵ ناوهێنانی زانا‌و ئەدیبە بێگانەکانی زنجیرەیەک لە ناوی زانا‌و شاعیرانی نەتەوەکەی خۆی بهێنێ.. بۆیە دەبینین دەڵێ:
مەڵێن ئەهلی مەحەببەت، هەم ئەدیب‌و شاعیری کامیل
لە فورسا زۆرە ئەمما دەست نەکەوت هەرگیز لە کوردانا

میسالی ئەنوەری‌و جامی‌و نیزامی شەوکەت‌و بێ دڵ
یەکێ بوو حاجی قادر، قاسید‌و ئەختەر لە دەورانا

بەرامبەر شیعری قائانی هەموو عالەم ڕەزامەندن
بە ئەشعاری(رەزایی تاڵەبانی)دا لە کوردانا!!

لە لاێی نالی‌و مەحوی، لە لاێی(سالم)‌و (کوردی)
لە لاێی عالیمی عامیل کە جێگەی فەخرە(مەولانا)
لە ڕاستیدا خادیم شاعیرێک بووە لە ڕیزی شاعیرە مەزنەکانی کورد‌و لە دوای کۆچی دواییدا دوو بەرگ لە دیوانی شیعرەکانی لە پاش بەجێماوە‌و دەزگای ڕۆشنبیریی‌و بڵاو کردنەوەی کوردی لە ساڵانی 1980‌و 1982دا بەچاپی گەیاندووە.



وشەیەکی فارسییە بە مانا کراس دێت.
قاسید نازناوی شیعری شاعیری کورد حاجی بەکراغای حەوێزییە.
مەبەسی(لە مەولانا)- مەولانا خالید نەقشبەندییە.