ئێران قەیرانی وێرانکەری ئابووری، کۆمەڵایەتی و سیاسیی هەیە و ئەو قەیرانە گەیشتووەتە سنووری تەقینەوە، چونکە گەلانی ئێران ئەو دۆخەیان پێ قبوڵ ناکرێت و ڕژێمێش وەک پێشتر توانای درێژەدان بە دۆخی خۆی نییە و ناچارە بە ئەنجامدانی گۆڕانکاری و دۆزینەی ڕێگاچارە.
کوردستان لە چوارچێوەی قەیرانە ناوخۆیی و دەرەکییەکانی ئێران، تورکیا، سوریا و عێراق و هەروەها بەهۆی ئامانجی هێزە جیهانییەکانەوە، بووەتە چەقی جەنگی جیهانیی سێیەم. بۆیە پێویستە لەم کێشمەکێشە چارەنووسسازەدا پرۆژەیەکی پڕاوپڕ و دیموکراتیک بۆ چارەسەری بخرێتەڕوو. ئامانج و سەرنجی کۆمەڵگەی دیموکراتیک و ئازادی ڕۆژهەڵاتی کوردستان (کۆدار) لەسەر چارەسەری بە بێ شەڕ و وێرانکارییە لە ئێران و کوردستاندا.
لەمساڵانەی دوایدا کوردستان گۆڕەپانی تەڕاتێنی داگیرکەرانی تورکیا و داعش بوو. ئەگەری ئەوە هەیە دۆخەکە بەرەوە ئەوە بڕوات، کە مەترسیی ئەم جەنگە ناوچییە لە دوای سوریا، ئێران بگرێتەوە. ئەوەش لەکاتێکدایە ڕژێمی کۆنەپارێز و موحافزکاری ئێران لە دوای تێپەڕبوونی 4 دەییە لە تەمەنی، گەلانی ئێرانی ڕووبەڕووی مەترسیی جیهانی و قەیرانی زۆر قورسی ئابووری، سیاسی و کۆمەڵایەتی کردووەتەوە. بە سەرنجدانە عەقڵییەتی گرژینانەوە و ڕەفتاری توندوتیژخوازانە و میلیتاریستی، تا ئێستا توانایی چارەسەرکردنی ئەو کێشانەی لە خۆی نیشان نەداوە.
لەمدواییانەدا و لە بەردەوامیی خۆپیشاندان و ناڕەزایەتییەکانی ساڵی ڕابردوودا، خەڵکی ئێران و کاسبکاران ڕژانە سەر شەقامەکان، بەڵام ڕژێم لەبریی چارەسەکردن دەستیکرد بە سەرکوتکردنیان. ئێستاش قەیرانە ئابوورییەکان لە پاڵ قەیرانە سیاسی و کۆمەڵایەتییەکاندا گەیشتووەتە لوتکە، سەرباری ئەوەش دەوڵەت و ڕژێم تەنها ئامانجی خۆی بەوە دەزانێت، کە شەڕ لە دژی دەرەوە و ناوخۆ ئەنجام بدات. خۆپیشاندانەکان ئیتر بۆ دواوەوە ناگەڕێنەوە و بە سەرکوتیش کۆنترۆڵ ناکرێن.
هەر وەک دەبینرێت، هیچ هێزێکی دەستێوەردەری دەرەکی و هیچ یەک لە هێزە ئۆپۆزسیۆنە ناوخۆییەکان و دەرەوەی ئێران، بەرنامە و پرۆژەیەکی ڕوونیان بۆ چارەسەری بە بێ ڕوودانی جەنگ و وێرانکاری نییە. هێزە جیهانییەکان بە باشی ئاگاداری ئەو لاوازی و بۆشاییانەی ئێرانن و هەوڵی چڕتر و قورسترکردنەوەی قەیرانەکانی ئێستای ئێران دەدەن.
کۆدار پێشتریش هۆشداریی دابوو، کە کێشەی ڕێککەوتنی ئەتۆمی، یان بەرنامەی مووشەکی، کێشەی دروستکراوی هێزەکان و خودی ئێرانە و هیچ پەیوەندییەکی بە نەتەوەکانەوە نییە. کێشەی ئازادیی نەتەوەکان و بە دیموکراسیکردن تاکە کێشەی لە پێشینە و پلە یەکە. ئەمڕۆ سیاسەتی گوشار و ڕووخاندن لە دژی ڕژێمی ئێران بەڕێوەدەچێت و لە بەرامبەردا ئەم ڕژێمە کۆنەپارێزە مل نادات بۆ چارەسەری دیموکراتیک و ڕێگا نادات هەڕەشەکان بکرێن بە دەرفەتی دیموکراتیک. تەنانەت ڕێگا بۆ بە سوریاکردنی ئێران دروستکراوە. لەلایەکی تریشەوە ڕژێمی ئێستای ئێران درێژە بە هەڵسوکەوتی سیاسیی قبوڵ نەکراو لە دژی نەتەوەکانی وەک کورد، ئازەری، بەلوچ، عەرەب و... هتد دەدات. لەم نێوانەدا کێشەی کورد چڕتر و جیهانیتر بووەتەوە و دەتوانێت هەم ڕۆژهەڵاتی ناوەڕاست و هەمو کوردستان لە زریانی جەنگی ئێستا بپارێزێت.
پێویستە لە کێشمەکێشی جەنگی جیهانیی سێیەمدا کێشەی نەتەوەکانی ئێران و ڕۆژهەڵاتی کوردستان چارەسەر بکرێت. کۆدار بە کرداری و بابەتییانە تاکە سیستمە، کە پرۆژە و بەرنامەی مۆدێڕێنی لە چوارچێوەی کۆنفیدرالیسم و نەتەوەی دیموکراتیک دا هەیە و تەنانەت جیاواز لە لایەنەکانی تر توانایی بەرگریی سەربازیی ڕەوای کۆمەڵگەی هەیە.
پرۆژەی دیموکراتیکی کۆدار بە ڕوونی دەرخەری هەڕەشەکان و دەرفەتەکان و هەڵگری پرۆژەیەکە بۆ خەڵک و شەقام ئەو لایەنانە، کە داوای چارەسەری دەکەن. داواکانی کۆداری لە چوارچێوەی پێشنیازەکانیدا لە چەند ڕەهەندێکی ڕیشەیدا خراونەتەڕوو. لەم چوارچێوەیەدا ئامانجی کۆدار لە خستنەڕووی پرۆژە بۆ بە دیموکراسیکردنی ئێران و ڕۆژهەڵاتی کوردستان، کە سروشتیترین و لۆژیکیترینە، پرۆژەیەکی دیموکراتیکە بە بێ جیاکاریکردن لە نێوان نەتەوەکان و تەنانەت پرۆژەیەکە بۆ گۆڕەپانی سیاسیی نێوان لایەنە ناوخۆیی – دەرەکی، یان ئێرانی – کوردستانییەکان.
پرۆژەکەی کۆدار ئازادیی ژنان و نەتەوەکانی کردووەتە بنەما بۆ نوێکردنەوە و بونیاتنانی کۆمەڵگە. یەکێتیی نەتەوەی کورد و ئۆپۆزسیۆن، حیزب و ڕێکخراوە مەدەنییە کوردییەکانی دەوێت تاوەکو لە ئێران ڕۆڵی سیاسی – دیموکراتیک بگێڕن. لە نێوان هیچ کیانێکی سیاسی، نەتەوەیی، ئایینی و ڕەگەزیدا جیاوازی دانانێت و تەنانەت بەشدار دەبیت لە بونیاتنانەوەی کۆمەڵگەدا.
کۆمەڵگەی ئێران و ڕۆژهەڵاتی کوردستان سات بە سات زیاتر لە ئازادی نزیک بوونەتەوە و کۆدار ڕێ لە لەدەستچوونی ئەم دەرفەتەی ئێستا دەگرێت. خستنەڕووی پرۆژەی پڕاوپڕی کۆدار و پەژاک نیشانەی نیازپاکییە بۆ کردەی سیاسی – دیموکراتیک و داوا لە هەموو لایەنەکان دەکات بۆ ئەنجامدانی ئەرکە سیاسی، ئەخلاقی و ڕۆشنگەرییەکانیان لە چوارچیوەی نەتەوەی دیموکراتیکیدا. کۆدار لەم چوارچێوەیەدا پرۆژە دیموکراتیکەکەی بەشێوەی فەرمی بۆ ڕای گشتی و ئەو لایەنانەی، کە چارەسەرییان دەوێت بڵاودەکاتەوە. بەو هیوایە ئێران و کوردستانی ئازاد و دیموکراتیک بە ڕەنج و هەوڵی گەلان بونیات بنرێت.
#08-07-2018#