وەرە یارم، وەرە ئەی تازە یارم !
وەرە ئەستێرەکەی شەوگاری تارم !
وەرە ئەی شاپەڕی باڵی خەیاڵم !
وەرە ئەی شەوچرای ڕووناکی ماڵم !
وەرە خاسە کەوی ڕام و کەویی من !
وەرە ئیلهامەکەی نیوە شەوی من !
وەرە ئۆخژنی سینەی پڕ گڕی من !
وەرە پیرۆزەکەی بەرزە فڕی من !
وەرە ئاونگی سەر پەلکی گوڵی سوور!
وەرە ئاورینگی گەرم و مەشغەڵی نوور!
وەرە ئەی ڕێژنە بارانی بەهاری !
وەرە شیعری تەڕی پڕ وردەکاری !
وەرە ئەی نەونەمامی باخی ژینم !
وەرە ئەی شاگوڵی مێرگی ئەوینم !
وەرە کاروانکوژەی کاتی بەیانیم !
وەرە بیرەوەری و ئاواتی جوانیم !
وەرە ئەی بووک هەتاکوو بت پەرستم !
وەرە مەمکۆڵەکەت بگرم لە مستم !
وەرە ئەی (خەج)، وەرە ئەی(خاتو زین)م !
وەرە با بەژن و بەڵاکەت ببینم !
وەرە با دامرێ ئاوات و تاسەم !
وەرە با بسکەکەت لادا هەناسەم !
وەرە با هەڵمژم ئه و لێوە گەرمە !
وەرە با هەڵکوشم ئه و ڕانە نەرمە !
وەرە جوانێ، وەرە نازت بکێشم !
وەرە وەک دەستە گوڵ داتنێم لە پێشم !
وەرە با بەس بکەم ئه و باوە باوە !
وەرە با بێن بکەم ئه و بسکە خاوە !
وەرە با دەس لە بالاکەت وەرێنم !
وەرە کوڵمەم لە کوڵمەت تۆ خشێنم !
وەرە سووربە لە سەر وادە و بەڵێنێ !
وەرە کورد بە و مەکە پەیمان شکێنێ !
وەرە گیانم فیدای چاوی ڕەشی تۆ !
وەرە با هەست بکەم گەرمیی لەشی تۆ !
وەرە ماچم دەیە ماچی خودایی !
کە بێزارم لە ماچی سینەمایی !
12-01-1976