ئاسۆکانی چارەسەر
چاوپێکەوتن لەگەڵ مەزلووم کۆبانی
پۆلات جان
لە بڵاوکراوەکانی ناوەندی غەزەلنووس

پێشەکی پۆلات جان بۆ کتێبەکە
بەر لە دە ساڵ (پاییزی 2011) و لە گەرمە و سەرەتای خۆپیشاندانەکانی سوریا و گەرمەی مشتومڕەکاندا لەمەڕ هەڵوێستی لایەنەکان لەو خۆپیشاندانانە و هەڵوێستی هەر یەک لەو لایەنانە لە یەکتر و پلان و پرۆژە و هاوپەیمانی و تەکتیکیان، مشتومڕەکان و دەنگۆ و بانگەشە و هەڵمەتەکانی ڕاگەیاندن پێبەپێ و هاوتا بوو لەگەڵ گەرمیی خۆپیشاندانەکان و کوشتوبڕ و هەڵمەتەکانی گرتن و ئاڕاستەی بەسەربازیکردنی جموجووڵی کۆمەڵانی خەڵک و ئیسلامیزەکردنی داخوازی و گوتارەکان... هەموو ئەم ژینگە گشتییە چارشێوی خۆی دابوو بەسەر شەقامی کوردیدا و پەرتەوازەی کردبوون، نزیکبوونەوەی لایەنەکان لە یەکدی و لە ئۆپۆزسیۆن کە بۆنی ئیخوانچێتی و ئیسلامگەرایی لێ دەهات، بە جۆرێک بوون کە لووتی مرۆڤیان دەگرت.
لەو هەلومەرجەدا ئێمە ئەم گفتوگۆ تێروتەسەلانەمان کردن و دەستمان کرد بە ڕاڤە و شرۆڤە و وەڵامدانەوە بەو خواستانەی کە لەسەر ڕووبەری سیاسی و شەقامی کوردیی سوریا هاتبوونە ئاراوە. ئەو کاتە ئێمە لەمیانەی ئەم چاوپێکەوتنانەوە سەرقاڵی پێناسەیەکی زانستیی ئاسان بووین بۆ پرۆژەی خۆبەڕێوەبەری و ڕێگەی هێڵی سێیەم و ئاسۆکانی خۆبەڕێوەبەری و ڕێکخستنی کۆمەڵگەی کوردی و دامەزراندنی سیستمی بەرگریکردن لە خۆ، کە لە چەند ساڵی دواتردا توانیی ببێتە گرنگترین بکەرەکان لەسەر زەمینی تەواوی سوریا و دەنگۆی بە هەموو جیهان بگات.
ئەو کاتە ئێمە هەموومان بە تەواوی نهێنییەوە دەهاتین و دەچووین، بە نازناوی نهێنی و بە بێدەنگیی تەواوەوە کارمان دەکرد و لە ئامادەکاریی هزری و تیۆری و کردەکیدا بووین بۆ بونیاتنانی خۆبەڕێوەبەری، ئەنجوومەنەکان، پێکهێنانی خۆبەڕێوەبەریی دیموکراتیک، دامەزراندنی شانە نهێنییەکانی یەکینەکانی پاراستن و داچەقاندنی کۆڵەکەکانی دامەزراوە کوردییەکان لە ڕۆژئاوای کوردستان. ئەم دایەلۆگانە لەو ساتەوەختەدا بۆ ئەوە بوون کە ڕێنمایەک بێت بۆ ئەوانەی کە چالاک بوون و لە ناو جەماوەردا کاریان دەکرد، لەگەڵ ڕکابەران و نەیاران و هێرشبەراندا لە مشتومڕ و چالاکیدا بوون بۆ پووچەڵکردنەوەی بانگەشەکانیان و ناساندنی ئەو پرۆژەیەی کە کارمان لەسەر دەکرد و بۆ ڕۆشنکردنەوەی شەقامی کوردی و بەدەستهێنان و ڕێکخستنی لەو سەروەختەدا.
دوای دە ساڵ لە تەمەنی شۆڕش و قەیرانی سوریا و هەشت ساڵ لە تەمەنی شۆڕشی نۆزدەی تەمووز، گەشەسەندن و نسکۆ و هەڵکەوتن و وێرانی و ڕیزبەندیی زۆر ڕوویان داوە و هاتوونەتە ئاراوە، ئەمە سەرباری دەستێوەردانی نێودەوڵەتی و پەلکێشیی هەرێمی و دڕندایەتیی گرووپە ئیسلامییەکان، هەروەها سەرباری زۆربوونی ژمارەی شانە چەکدارییەکانی ئەو کات دوای تەنها دەیەیەک بۆ هەزاران سەرباز و دامەزراندنی خۆبەڕێوەبەری و بەرجەستەبوونی وەک حەقیقەتێک لەسەر زەوی و بوونی کورد بە بکەرێکی سەرەکیی گۆڕەپانی سوریا و ناوچەکە... لە چەند ساڵی ڕابوردوودا کورد و هاوبەش و هاوسەنگەرانی لە عەرەب و سریان هەزاران قوربانییان لەو پێناوەدا داوە و لە ئەو شەڕگەیەی سوریادا، سەرباری داگیرکاریی نەگریس و نامرۆڤانەی تورکیا لە عەفرین و شەهبا و سەرێکانی و گرێسپی، توانیویانە خۆیان و یەکڕیزییان بپارێزن، سامی تیرۆریزم بشکێنن، چەندین سەرکەوتنی مێژوویی بە دەست بهێنن، خاک و مرۆڤ ئازاد بکەن و نموونەیەکی دیموکراسی بخولقێنن.
پاش تێپەڕینی نزیکەی یەک دەیە لە ئامادەکردنی ئەم گفتوگۆیانە و وەک دۆکیۆمێنتێکی مێژوویی گرنگ لە ڕۆژئاوای کوردستان و تۆماری بەشێکی هەستیار و ورد لە مێژووی ڕۆژئاوا و سوریا بە گشتی، بە پێویستمان بینی سەرلەنوێ و بەبێ هیچ دەستکارییەک چاپی بکەینەوە. ئەوەی زیاد کرابێت، تەنها ئەم پێشەکییە و ناساندنێکی کورتی هەڤاڵ مەزڵووم عەبدییە و هیچی تر.
ئەمە پەڕتووکە بۆ خستنەوەگەڕی یادەوەری و پاڵفتەکردنی و گەڕانەوەیە بۆ سەرەتاکانی ئەو شۆڕشە، بۆ ئاشنابوون بە چۆنێتیی بیرکردنەوەی ڕێبەر و شۆڕشگێڕانی کورد لەو ساتەوەختەدا و هێنانەپێشەوەی پرسیارەکانی ئەو سەروەختە، بۆ تۆمارکردنی ئەوەی کە چۆن زۆر لەوانەی ئەو کات خەون بوون هاتنە دی و بوون بە ڕاستیی بەرهەست، چۆن پرۆژە تیۆرییەکان بوون بە دامەزراوە و هێز و ئەنجوومەن و بەڕێوەبردنێکی کارا. ڕووداو و پێشهاتەکانی ئەمڕۆ ڕاستی و دروستیی ئەو پرۆژە و ڕێبازە نیشان دەدەن کە ڕێبەرانی ڕێڤەبەریی خۆسەر بۆ خۆیان و بۆ گەلیان پێشنیاز کردبوو، بێگومان ئەمە سەرباری هەموو کەموکوڕییەکانی ئەو ئەزموونە و خاڵینەبوونی لە کێشە و بەربەست و هەڵەش کە سەرباری هەموو ئەوانە، توانیویەتی وەک سەرکەوتووترین پرۆژە تا ئێستا درێژە بە ژیانی خۆی بدات.
ئەم پەڕتووکە بەشێکە لە میراتی تیۆری و هزریی شۆڕشی ڕۆژئاوا بە بەشداریی مرۆیی کوردانی پارچەکانی دیکەی کوردستان و هەموو ئەو گەلانەی کە دۆزیان هاوشێوەی دۆزی گەلی کوردە لە ڕۆژئاوای کوردستان. بە هومێدی ئەوەی هەموو گەلانی دونیا ئازاد و سەربەست ببن، بە تایبەت گەلی کورد لە گشت پارچەکانی کوردستان. [1]