وتاری #شاسوار عەبدولواحید# سەرۆکی جولانەوەی نەوەی نوێ کە خاتوو بەدریە ئیبراهیم لە ناو بارەگای UN لەبەردەم جینین بلاسخارت خوێندییەوە

سڵاوتان لێبێت و سوپاس بۆ هەوڵەکانی بەرێز (جینین بلاسخارت) تایبەت بە عێراق و هەرێمی کوردستان، وە بە تایبەت تر ئەم هەوڵانەی بۆ ئەنجامدانی هەڵبژاردنێکی پاک و بێگەرد لە هەرێمی کوردستان.
ئەم وتارەی من دەقی وتاری سەرۆکی جوڵانەوەی نەوەی نوێ (شاسوار عەبدولواحید)ە کە داوایکردوە ئەمرۆ لێرە پێشکەشی بکەین.
جوڵانەوەی نەوەی نوێ پێی وایە مۆدێلی حوکمڕانی هەرێمی کوردستان کێشەی بونیادی گەورەی هەیە لە چەندین سێکتەری گرنگدا، زۆرینەی ئەو گرفتانەش پەیوەستن بە کەموکوڕی حوکمڕانییەوە. کە هەردوو پارتی دەسەڵاتدار پارتی و یەکێتی لێی بەرپرسن بە درێژایی 31 ساڵی ڕابردوو.
لە دیدی ئێمەدا کێشەکانی هاوڵاتیانی هەرێم گەیشتونەتە ئاستێکی ئەوتۆ کەچیتر ناتوانرێ نادیدە بگیرێن، بە هۆی خراپی حوکمڕانیەوە خەڵکی هەرێم متمانەی بەدەسەڵات نەماوە.
هاوڵاتی لە هەرێمدا هەست ناکا مافی هاوڵاتی بوونی لە ڕویی سیاسیی و ئابوری و کۆمەڵایەتیەوە پارێزراوە، هەست بە ئارامی ناکا لە ڕوی پاراستنی مافەکانیەوە، هەڕەشەی جدی لە سەر بژێوی ژیان و ئازادییە گشتیەکانیان هەیە، خەڵکی هەرێم هێندەی هەست بە بونی دەسەڵاتی دوو حزب دەکەن لە دوو زۆنی جیاوازدا، هێندە هەست بە بونی حکومەتێکی یەکگرتوی بەهێز ناکەن کە مافەکانیان بپارێزێ.
پێداویستیە سەرەتاییەکانی هاوڵاتیانی هەرێم سەرباری داهاتیکی زۆری نەوتی و نا نەوتی بەردەست نین، شەفافیەت و ڕونکاری لە کۆکردنەوەی داهات و دابەشکردنیدا نیە، ئاو و کارەبا، ژینگە و ڕێگاوبان، پەروەردە و خوێندن، تەنانەت ئاشتی کۆمەلایەتیش مەترسی گەورەی لەسەرە.
هاوڵاتیانی هەرێم نیگەرانی ئەوەن کە بە سیاسییکردن گەیشتۆتە هەموو سێکتەرەکان، پەرلەمان و حکومەت وتەواوی دامەزراوەکان لاواز و بە حیزبی کراون، بە دەسەلاتی دادوەریشەوە کە ئەمەش زەنگێکی مەترسیدارە لە دیدی ئێمەوە.
ئێمە پێمان وایە حوکمڕانی باش واتا بونی پەروەردەی باش، تەندروستی باش، ڕێگاوبانی باش.
لە دیدی ئێمە:
دیموکراسی باش بریتیە لە ئازادی میدیا، لە دیدی نەوەی نوێدا حکومەتی بەهێز ئەو حکومەتەیە کە شەفاف بێ و خەڵک متمانەی پێی هەبێ. وە هاوڵاتی وەک حکومەتی خۆی تەماشای بکات و پشتی پێ ببەستێت و متمانەی پێ بکات و خۆی بە بەشێک لەو وڵاتە و لەو حکومڕانییە ببینێتەوە، نەک بەردەوام لە هەوڵی جێهێشتنی نیشتیمانەکەی بێت.
ئامانجی سیاسیی ئێمە بریتیە لە بەهێزکردنی ژیانی دامەزراوەیی، ڕێزگرتنی ڕۆڵی پەرلەمان، جێبەجێکردنی یاسا بەرکارەکانی هەرێم، بەهیز کردنی پەیوەندی نێوان دامەزراوە دەستوری و شەرعیەکانی هەرێم و دور خستنەوەی دەستی حزب لێیان.
ئێمە پێمان وایە مەترسیەکەی گەورەی سەر هەرێم کێشە ئابوریەکانن، پێمان وایە غیابی ڕوئیا و پلانە، کە هەرێم یاسای موازەنەی نیە، سەرباری داهاتی زۆر توانای هیچ جۆرە چاکسازییەکی نیە لە سێکتەری ئابوریدا، پێمان وایە کاتیەتی کە کەرتی گشتی و کەرت تایبەت جیا بکرێتەوە و دەستی حزب لە بازاردا دور بخرێتەوە.
نەوت و سەرچاوە سروشتیەکان هەتا ئێستا هێندەی بونەتە هۆی کێشە بۆ خەڵک نەبونەتە هۆکاری ئاسودەیی و ئارامیی بۆ موچە و بژێوی خەڵک، دەبێ سیاسەتی نەوتی هەرێم بەروی ناوخۆ و دەرەوەدا بگۆردڕێ و شەفاف بێت.
ئێمە نیگەرانین، کە دوو زۆنی ئیداری و دوو هێزی پێشمەرگە و تەنانەت دو دەزگای ئاسایشمان هەیە، ئێمە باوەمان وایە دەبێ دەزگاکان، هێزی پێشمەرگە، زانکۆکان، زمان و بازاڕ و میدیا بە دور بن لە دەستی حیزبەوە.
وەکو نەوەی نوێ لەگەڵ پەیوەندیەکی تەندروست و دەستورین لەگەڵ عێراقدا، پێشمان وایە دەبێ گفتوگۆیەکی نیشتیمانیی دەستوری بێلایەن لەبەرژەوەندەی هەردولا سەرپێ بخرێ و پێمان وایە چارەسەری کێشەکانی هەرێم لە بەغدادە نەک لە وڵاتانی دراوسێ.
ئێمە دەمانەوێ بڵێین کە لای نەوەی نوی #هەولێر# و بەغدا یەک پاکێجە. وە جۆری مامەڵەی دەسەلات لە هەرێم لەگەڵ ئێمە کاریگەری دەبێت لەسەر جۆری هاوکاریمان لەگەڵیاندا لەبەغدا.
واتە ناکرێت لە هەرێم خەڵک لەوپەڕی گوزەران خراپیدا بن، وە دامەزراوەکان بێ ئەهمەیت بکرين و دەسەڵات حساب بۆ پەرلەمان و دامەزراوەکانی تر و هەڵبژاردن نەکات، بەڵام لە بەغداد داوامان لێ بکرێت هەموو کورد یەکگرتوو بین لە بەرامبەر ئەو مەترسیانەی کە گوایە لەسەر هەرێم هەن.
بەرێزان:
وەک نەوەی نوێ داوای هەڵبژاردنێکی پاک دەکەین بە یاسا و کۆمسێۆنێکی نوێ، کۆمسیۆنێک کە ئەگەر باشتر نەبێت لەوەی بەغداد، ئەوا نابێت خراپتر بێت. وە ئێمە بە سەراحەت دژی دواخستنی هەڵبژاردنین لە ژێر هەر بیانویەکدا بێت، دەمانەوێ نەتەوە یەکگرتوەکان نزیک و پشتیوان بێ بۆ هەڵبژاردنێک کە وابکا خەڵک متمانەیان بۆ سندوقەکانی دەنگدان و بە سیستەمی حوکمڕانی هەرێم بگەرێتەوە.
ئێمە دژی هەرێم، دژی خەڵکی هەرێم نین، بەڵام دژی ئەم شێوازە خراپەی حوکمڕانی هەرێمین و ئامۆژگاریمان بۆ دوو لایەنی دەسەڵات ئەوەیە کە تەنها یەک ڕێگەیان لە بەردەمدایە ئەویش بەهێزکردنی دامەزراوەکان وکۆکردنەوەی تەواوی خەڵک و هێز و لایەنەکانی هەرێمە لە ژێر قوبەی پەرلەمانێکی ڕاستەقینە و دامەزراوەکانی هەرێم.
دەنا بەم شێوازەی ئێستا ئەگەر بەردەوام بن ئەوا نەک یەک ڕیزی کوردی دروست نابێت، بەڵکو ڕەنگە شتێک نەمێنێت بە ناوی دەسەڵاتی کوردی و پەرلەمانی کوردییەوە.
بەڵام بێگومان ئێمە وەک نەوەی نوێ بڕوامان وایە کە کۆمەڵگای نێودەوڵەتی هاوکاری میلەت و خەڵکەکەمانە، وە ئێمەش وەک نەوەی نوێ ئەمرۆ لێرە ئامادەین بۆ ئەوەی ئایندەیەکی ڕوناک بۆ ئەم هەرێمە و خەڵکەکەی بوننیاد بنێین و بەدی بهێنین.[1]
لەگەڵ ڕێزدا...