ئەڤرۆ:
ھەڤسەرۆکێ باژێرڤانیا مێردینێ د داخۆیانیەکی دا ڕاگەھاند د سەدسالا 21 دا گەلێ کورد دیرۆکێ سەرەراست دکەت و ژ نوو ڤە دیرۆکا بەرخوەدانێ و سەرفرازیێ د نڤیسینیت و بەرخوەدان و سەرکەڤتنا کۆبانێ و شنگالێ سەلماند کو تاکە ھەڤپەیمانێ جیھانا پێشکەڤتی ل ڕۆژھەلاتا ناڤین کوردن و دڤێت بۆ ب تەمامی ژ ناڤبرنا تیرۆرستان و ژ نوو ڤە ئاڤەدانکرنا کۆبانێ و شنگالێ جیھان دەستێ ھاریکاریێ درێژی کوردان بکەت.
ئەحمەد تورک ھەڤسەرۆکێ باژێرڤانیا مەزن یا مێردینێ د داخۆیانیەکا تایبەت دا بۆ ڕۆژناما ئەڤرۆ ل سەر بابەتێن گەرم یێن ڕۆژەڤێ و ھەلبژارتنا بھێت یا تورکیا و ڕەوشا کۆبانێ و شنگالێ ئاخڤی و ڕاگەھاند کۆ د سەدسالا 21 دا ڕەوشەکا زێرین و د ھەمان دەمێ دا ژی مەترسیدار ھاتیە پێشیا کوردان و گۆت: (ئەڤرۆ ھەموو دەرفەتێن ئازادیێ کەڤتیە دەستێ گەلێ مە و ھەکە ئەم یەکگرتنا خوە د وارێن سیاسی، سەربازی، دبلۆماسیێ و ژیانا جڤاکی دا دروست بکەین و بەرژەوەندێن نەتەوی بدەینە پێش ھەموو بەرژەوەندیێن دی ئەز باوەر دکەم ئەم دشێین ئازادیا خوە ڕاگەھینن و ھەموو مافێن خوە گەرەنتی بکەین، ژ بەر کو ڕۆلێ گەلێ کورد ئێدی ل بەر چاڤە و بێی کوردان چو پرسێن ڕۆژھەلاتا ناڤین چارە نابن و گەلێ کورد بوویە کلیلا چارەسەریێ و ئەڤرۆ سەرکەڤتنا گەریلا، پێشمەرگە و شەرڤانان ل دژی تیرۆرستێن قاعیدە و داعشێ سەرنجا جیھانێ ڕاکێشاندیە سەر کوردستانێ و بوویە سەدەم کو پشتەڤانێن ئازادیا گەلێ کورد د ئاستێ نێڤدەولەتی دا گەلەک زێدەتر ببن و دڤێت ئەم ڤێ دەرفەتێ بۆ خوە بکەینە دەرفەتا زێرین و بنگەھێ یەکگرتنا نەتەوی دروست بکەین).
ھەڤسەرۆکێ باژێرڤانیا مەزن یا مێردینێ ل سەر بەرخوەدان و سەرکەڤتنا ھێزێن کوردان ل کۆبانێ، شنگال و دەڤەرێن کەرکووکێ ژی ڕاگەھاند دوژمنێن گەلێ کورد وەسا ھزر دکرن کو ھێزێن کوردان ناھێنە ل گەل ھەڤ و ناکەڤنە د یەک سەنگەری دا و دێ ل ھەمبەر تیرۆرستێن داعشێ تووشی شکەستنەکا دیرۆکی ببن و گۆت: (لێ ھەم ل باشورێ وەلات ب ھەوار چوونا ھێزێن گەریلا و ھەم ژی ل کۆبانێ ب چوونا ھێزێن پێشمەرگە ھاتە سەلماندن کو ئێدی گەلێ کورد ب ھەموو ھێزێن خوە ڤە پشتا ھەڤدو دگرن و ھیڤیێن نەحەز و دوژمنان د قرکا وان دا ھشت و باوەریەکا مەزن دا گەلێ کورد و ڕایا گشتی یا جیھانێ کو کورد ئێدی بۆ ئازادی و سەرفرازیا خوە یەک دەستن و پێکڤە نە، ل دووڤ ھزرا من کلیلا سەرکەڤتنا ھێزێن کوردی ل ھەمبەر داعشێ ژی ئەڤ یەکە).
ئەحمەد تورک د پشکەکا دی یا ئاخڤتنا خوە دا ژی ل سەر ھەلبژارتنێن #07-06-2015# یێ پەرلەمانێ تورکیا ژی ڕاوەستیا و دیار کر، ھەلبژارتنێن ڤێجارێ یێن پەرلەمانێ تورکیا بۆ گەلێ کورد گەلەک گرنگن و دڤێت ئەم بەندا 10% یێ ھەلبژارتنان دەرباز بکەین و گۆت: (بۆ سەرکەڤتنا قۆناغا ئاشتیێ و چارەکرنا پرسا کوردی دڤێت گەلێ کورد د مەیدانا سیاسەتێ دا بن و ل پەرلەمانێ تورکیا بۆ وەرگرتنا مافێن گەلێ کورد کار بکەین و بۆ ڤێ یەکێ ژی دەربازکرنا بەندا 10% بۆ مە ژ ھەر تشتەکێ گرنگترە و ئەز باوەر دکەم ئەم دێ ب باشی لێ ب خەباتەکا گەلەک مەزن سەرکەڤتنا خوە ڕاگەھینن و بۆ ڤێ یەکێ ژی داخواز ژ ھەر کوردەکی دکەم کو بەرژەوەندیێن خوە یێن تاکەکەسی یان مالباتی بدەنە ڕەخەکی و د بەرەیێ ئازادی و دیمۆکراسیێ دا جھێ خوە بگرن و دەنگێ خوە بدەنە پارتا دیمۆکراسیا گەلان، ژ بەر کو دۆزا گەلێ کورد ئێدی ھاتیە وێ ئاستی کو بگەھیتە ئەنجامەکا باش و بۆ ڤێ یەکێ ژی یەکگرتن پێدڤیە).
ھەڤسەرۆکێ باژێرڤانیا مەزن یا مێردینێ د ئاخڤتنا خوە دا ل سەر پاشەرۆژا گەلێ کورد ژی ڕاوەستیا و دیار کر ئەو ژ ھەر پێشکەڤتنەکا گەلێ کورد ل باشور، ڕۆژئاڤا و ڕۆژھەلاتێ کوردستانێ دلخوەش دبن و گۆت: (ئەز گەلەک گەشبینم کو دۆزا گەلێ کورد ل ھەر چار پارچێن کوردستانێ ژی بگەھیتە سەرکەڤتنێ و دڤێت ھەر پارچەکا کوردستانێ پارچێن دی ژی حەمبێز بکەت و د ڕەوشا خراب دا بگەھیتە ھاوارا وێ و ئەزموونا کۆبانێ و شنگالێ ببیتە ئەزموونا یەکگرتنا نەتەوی و ھەموو ھێزێن کوردستانی د چارچۆڤێ بەرژەوەندیێن بلندێن کورد و کوردستانی دا دەستێ ھەڤدو بگرن و ژ سەرکەڤتنا ھەڤدو دلخوەش ببن و ئێش و ئازارێن ھەڤدو ژی پارڤە بکەن، ژ بەر کو دیرۆکێ ڕەوشەکا زێرین بۆ گەلێ کورد ئافراندیە و ھەکە ئەم ژ ڤێ ڕەوشێ مفایێ وەرنەگرین و نەگەھنە سەرکەڤتنێ و ئازادیێ دیرۆک چو دەمەکێ مە نابۆریت).[1]