#میرزای لوڕستانی#
ئەمیر ھەم جە نۊ تەوازعش کەرد
مۊبەت مۊبەتان جە ڕای حەد وېیەرد
وەقتی شام ئاما ئاوەردن تەعام
مورغان و بریان ئەنواعی تەعام
بەر و پەشت خوان تەمام زەڕئاڵۇد
ئەخزەری و ئەحمەر ئەسپەری و کەبۇد
تەعام پەڕ ئاڵەت فلفل و بازباز
نېیاشان نە خوان چەنی پېشئەنداز
بوزورگان یەکسەر واردشان تەعام
جە نوقڵ و نەبات جە مەغز و بادام
ھۊرداشتن سفرە دۊعاشان وانا
نېشتن بە شادی ئەعلا تا ئەدنا
جە قەھوە و قەلیان ھەر چ بۍ تەمام
واردن بوزورگان جە خاس و عەوام
موترېبان ئامان ژەندن ساز و ڕۇد
سۊچناشان وە شاد چەند مېجمەرەی عۇد
عەیشێ کەرد ئەو شه و پەرێ مەم ئەمیر
نمەیۊ شەرحش نە وەسف و تەحریر
چەند ڕۊ بەی دەستۇر عەشرەت بی نە کار
دلېران سەرمەست سەراسیمەوار
ھەر شه و بەی دەستۇر عەشرەت نە کار بۍ
تلۇعی قەمەر وادەی شکار بۍ
شکار مەکەردن تا وەقتی ئێوار
جە کەبک و خەرگۇش ماوەردن ھەزار
بەڵۍ مەم جە فەن شکار دانا بۍ
ھەم چابۇک و چوست چۇن ئەژدەھا بۍ
ھەر سەیدێ نە جا مەخېزا وە بەر
جە دەستشای مەم نمەشی وە دەر
ئەمیر جەو دەمدا ڕۇکەرد وە تاجدین
عەجەب جەوانێ ئی مەردی پاک دین
مەسڵەحەت ئینەن ببۊ وە سەرڕاو
لایق بە ئەوەن سەرڕاوی سەرڕاو
ئەمیر زینەدین خەلعەت دا دەردەم
کەردش وە سەرڕاو خاتر کەردن جەم
بەڵۍ بەکر ئاغا جە قار تاجدین
دڵ پەڕ عەداوەت پەڕ جە قار و قین
دایېم خەریک بۍ مەردی نابکار
بەکر وە ئەمیر بنمانۊن ئەزرار
فرسەت مەدۊزا شەوان تا وە ڕۊ
فېتنە پەی ئەمیر ئەبەرپا کەرۊ
ھەر ڕۊ مەم چەنی ئەمیری پوڕ فام
سەترەنجش مەکەرد دائمەلمۆدام
ئېم جار بشنەوە شەممێ جە خاتۇن
پەی دیدەنی مەم دەستکەرد وە ئەفسۇن
ھەر چاشتێ وە ڕۇی مەجلېس مەبەردن
پەڕ جە سەنگ و ڕیگ ھیچ نمەوەردن
ڕۊیێ میر زەیندین واتش ئەی خواھەر
ئانە چ نانەن مەکېیانی بەوەر
پەڕ جە سەنگ و ڕیگ وەردەنیش نېیەن
ئەمیرێ چۇن مەم مېھمانم بېیەن
جەواب دا خاتۇن بە شەرت و ئەدەب
گوناھېم نېیەن ئەی عالی نەسەب
کەنیزان تەعام ماوەران بە کار
ئەڵبەت خەلەلێ لېش مەبۊ ئېزھار
نەمەشۇن وە ئاب من جە خەوفی میر
پەوسە تەعامان بېیەن ناگوزیر
[1]