#میرزای لوڕستانی#
واتش بواچە بەڵۍ موختەسەر
نە ڕۇی ڕاستی بە بەبۍ دەردیسەر
ئاما وە گوفتار بەکری بېقەرار
وات ئەو ڕۊ ئەمیر بەرشی وە شکار
بەھانەش سازا مەم گېرتش ئارام
ناما وە شکار ئەمیری ئەنام
وېش وست وە ئازار زویر و ماتەم
پەی ئېد کەرد چەنی زین یاوۊن وە ھەم
ئەو ڕۊ شای ئەمیر ئاما جە شکار
زین جە پۊشتی مەم گېرتەبۍ قەرار
جەو بۊنە ئامایت نەخېزا وە پاﮪ
ھەر دۇ حازر بین نە دیوانی شاﮪ
وە ئەفسۇنگەری ھەر دۇشان یەقین
حاڵی کەردشان قەرە تاجئەلدین
جەو پەی ئاتەش دا یانە و دیواخان
تا نەجات یابان نە جاگەی دیوان
ئەر بە حەرفی من نەداری بەقا
یە دەسماڵی زین مەندەبۍ بە جا
ئەمیر جە بەکر شنەفت ئی خەبەر
دۊشنام دا وەنەش وات ئەی بەدگۊھەر
نایاب بەر نە چەم ڕۇ سېیای بەدگۊ
مەم جە کۊ بېیەن خاتۇ زین جە کۊ
ڕۊیێ سەد دەسماڵ خاتۇنی عەزیز
مەڎۊ وە خەڵقان و ئەھل و کەنیز
ئەر جاری ھەنی با چی ئەی گوفتار
قەسەم وە بېچۇن دارای جەھاندار
سەزایێت مەڎەون وە سەزای زەحمەت
بواچانەوە تا ڕۊی قېیامەت
بە قار خېزیا بەکری بەدکار
شی وات وە تفڵان پەی فاشی ئی کار
مەڎەون پەنەتان چەند خورمای شیرین
واچە مەم دیمان چەنی خاتۇ زین
نە ھەر جا تفڵێ کە مەڎا دېیار
مەیاوا وە لاش بەکری بېقەرار
خورما مەڎا پېش تەعلیمش مەکەرد
تا گرڎین تفڵان جزیر تەمام کەرد
ڕۊیێ سوار بی ئەمیر پەی شکار
دیش تفڵان ماچان نە کۇچە و بازار
نە سەرای دیوان ئەمیرانی جەم
مەم و زینمان دېیەنان وە ھەم
ئەمیر ئېد شنەفت بەر پېچا عەنان
نە ڕەفت ئەو شکار ئاما وە دیوان
تەڵەب کەرد بەکر واتش ئەی مەردۇد
ئی کارە جە حەرف تۊ بېیەن مەوجۇد
ئەنجامش یاوان بە خەراب ئی کار
فېکرێ لېش کەرە بکەرەش تەیار
ھەم مەبۊ مەعلۇم بداری یەقین
گوفتارانی وېت واتەی خاتۇ زین
عەرزکەرد وە خدمەت ئەمیری ئەنام
تەدبیرش ئېدەن بزانە تەمام
دەعوەت بکەرە یاران چەنی مەم
بەعدەز نان وەردەن نەرد باوەر وە جەم
نە وەقتی ئۆیین گەرمەی نەردبازی
مەبۊ تەسویرێ نە دڵ بسازی
دۇ سێ فەرد واچە وە مەم و یارش
نە ڕۇی ئېستېھزا بڎۊ ئازارش
[1]