باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و دوەمە
حەزرەت جوابو ئەبوتالیبیش داوەو فەرماواش: منیچ ئادابو قۆمایەتی بەجاماروون، بەڵام من تەنیا مەتڵەبم یەک کەلیمەن، ئاڎییچ، ئیمان، گەر بە دڵ ئا واچۍ واچان، خوڵە مەبۊ بە گوڵ پەیشان.
شای خەتمی پەنا فەرماوا ئەی عەم
ئەی خەستەی بېچار دەروون پەڕ جە غەم
منیچ هەم جە تۊ ئیلتیماس داروون
ئەرحامی خوېشان وە چەم مەداروون
ئەبوتالیب وات: دڵ وە ئەندېشەن
ئیلتیماسی تۊ، جە قەومان چېشەن
فەرما مەتڵەبم هەر یەک حەرف بېیەن
جە یەک کەلیمە زیاتەر نېیەن
ئەو یەک کەلیمە بواچان وە دڵ
پەرێشان مەودای خار مەبۊ وە گوڵ
فەرمانفەرمای ئەهل عەرەب گرد مەبان
دایېم نە عەجەم زۊر بە مشت مەبان
ئەبوجەهل وات: تۊ ئەی محەمەد
سیوا جە حرووف ئەبیەز و ئەسوەد
بواچە چېشەن ئەو حەرفی ئەعزەم
پەنسەد کەلیمە جاری کەین وە دەم
حەزرەت کەلیمەی شەهادەت وانا
وات: خوڎا بە حەقق زیندەن و دانا
منیچ پېغەممەر ئاخر زەمانەم
ڕەسوولی خوڎای هەفت ئاسمانم
قەومان مەعزەرەت پەرێم ناوەران
بە خوڎاو بە من، ئیمان باوەران
مەبوون بە زامن ڕەهنمای ڕاتان
فەردا جە مەحشەر شەفاعەت خواتان.[1]